MVOLAN ASU MENDA ME BÔT

Aval ô ne liti môt ô nga lu’u na wo nye’e nye

Vô’ôlô nkobô

Ane mimbu mia lôt, nye’an ô ne zañe belu’u béziñ wo sis. Nge nda alu’u jôé ja tôbane njuk ôte, ye wo yiane tyelé nleme yôp?

Jam wo yiane yem

E liti nye’an nda aluk a ne angôndô ya mfi, nalé a yemete nda aluk. Môt a kômbô bo ngul a mvo’é minsôn a yiane bo mbane ya di bidi a nyu mendim. Avale da fe, éyoñe beluk be ne mbane ya liti na ba nye’esan, nalé a ba’ale nda alu’u jap mvo’é a yemete je. To’o mimbu mewôm mi lôteya, nnôm a ngal ba yi na môt ase a ke ôsu a liti nyu mbo’o na a nye’e nye, a na, a nyoñe nye ngap.

Nya nye’ane a nji jeñe ve mfi wé ôbien. A jeñe na môte mbok a bo mevak. Ajô te môt a ne nlu’an a nji yiane liti nyu mbok nye’an fo’o ve éyoñ a kômbô, ve nluk ase a yiane bo ngule ya yemelane na môte mbok a kômbô yene mendeme ma liti na wo nye’e nye, a jeñe mezene ya jalé wô.

Binga mbe be wô’ô dañe yi nye’an a dañe beyôme bap. Nnôm a ne ñhe fo’o nye’e minga wé édo’o nye’an. Ve nge a liti ngal nye’an ôte fo’o ve mame tyé nge mame ngô’é, nge ke ôsusua na ba ke binoñ, ngal a ne simesane na nnôme wé a nji tu’a nye’e nye. Da dañe mfi ya liti môt ô nga lu’u nye’ane abui biyoñe môs.

Jam ô ne bo

Bifiaé biôé bia yiane bo njalan a nye’an. Bone minkobô aval ane “Ma nye’e wo,” nge ke “Ô ne ma mfi abui” be ne bo na môt ô nga luk a yeme na wo nye’e nye.

Ñye’elane ya Bible: “Jam anyu da jô e ne di da fuluku nlem.”—Matthieu 12:34, Mfefé Nkôñelan.

Melep: Ô nji yiane liti nye’ane wôé fo’o ve a mame wo jô. Tili’i môt ô nga lu’u bone bifia, lôme’ nye kalate, nge sms.

Liti’i nye’ane wôé a mimboan. Éyoñe wo wuban nyo nnôm nge nyo ngal, nge latane nye anyu, nge ke bi nye wo, a ye yeme na wo bele éyoñe wo jô nye na, “Ma nye’e wo.” Ô ne fe liti nye’ane wôé éyoñ wo nambe nye ô kele wo nyeñele nye, éyoñe wo fombô nye a mise m’édiñ, nge ke éyoñe wo ve nye bone bedas biyoñe biziñ. Nge ô ne nnôm jé ô ne beta bo? Ô ne volô be’e nyo ngal bikpwaé bié, ô ne yoé nye mbé, ô ne sôbe bisua, biyé nge yame bidi. Abui binga da jô na a ne fatane ya liti a mimboane na beyôme bap ba nye’e fo’o be nya nye’ane.

Ñye’elane ya Bible: “Mbo’an te nye’ a nkobô, nge a ôyem; ve a mboan a benya mejôô.”—1 Jean 3:18.

Melep: Nyoñe’e ngap a môt ô nga lu’u fo’o ve aval ô mbe ô bo’o ôsusua na mia lu’an.

Nyoña’ané éyoñe ya tabe nsamba. E ta’a na mia ye bo mi tabe’e biyoñe biziñe ve mia bebaé aye yemete nda alu’u jenan. Nalé aye fe liti môt ô nga lu’u na wo nye’e mia nye mi too. E ne été na e nji bo tyi’ibi ya bo nta’an ôte éyoñe mi bili bon. Éko éziñe mi bili fe abui mame ya bo môs ôse. Mi ne ta’a jôm é ne tyi’ibi ya bo aval ane e ke mia wulu fo’o ve mia bebaé.

Ñye’elane ya Bible: “Mi aye yemelane mam me adañ mvaé—Bephilippien 1:10.

Melep: Belu’u béziñe be wô’ô nyoñ éyoñ asu dap étam ngô’é éziñ nge ke amane sondô.

Yeké’é na wo yeme môt ô nga luk. Bôte bese be nji yi nye’an avale da. Nyoña’ané éyoñe ya laan asu ya na môt ase a yem aval a yiane liti nyu mbo’o nye’an. Kate’e nge wo yi na môte mbok a dañe liti wo nye’ane mfa’a éziñ. Môt ase a va’a ngule ya jalé ñyiane nyu mbok.