Zi’te 4

Diabolo b’a we?

Satan Diabolo—na’mfe à ya? (1, 2)

Satan na’ mfù benntùn à ndùke? (3-7)

A bwô ne ta tu Satan à num ke? (7)

1. “Diabolo” b’a mèn za num ntshob tatte num mo’ mèn nà. Lèn “Satan” ke mbagt’à ndù ngakeban, ngatshette mànze. Men dèn ni b’a mi bo fà mbwe ngakebàn Nsi là. A lo be to’te mb’a ta’ angél nelàn z’a ke tswe bo Nsi mfe kamànyam nà. A lo be miagte, nto’te, neko’te wul i, nke nkô mbe bo ke ngamt’é. Ndù ghamte b’a nda’ ze Nsi.—Matio 4:8-10.

2. Yen angél là, Satan, lo lo’ nyu ngù ze nganze netshobte bo Eva. A lo soṅ i tatte, a ju’ mbame, tsin neju’ ntshu Nsi. Ndùlala, Satan lo kam ntanta num ju ze bo ke ntsiaṅ: “ze netô” Nsi là. Satan lo bèn ntatte mbe Nsi ke’ be tô njù mebwô, kebèn nke mfà ju ntùn benntùn. Satan lo bèn ntatte mba ndù, sàm mènntùn nyiaṅtu ke’ ku’ni neju’ ntshu Nsi. Ngùninu Satan lo kaṅ i a tù’ ngankeban Nsi. A ndùlala bèn ngù kà bo na’ ntsiaṅ Satan Diabolo.—Neto’te 3:1-5; Yob 1:8-11; Apokalipse 12:9.

3. Satan kô nelo’ mfù ntènte benntùn bo nke ngamt’é yi. (2 Korintô 11:3, 14) Mo ta’ mànze z’a num ntshùa bwe, kà nke mfù benntùn nà b’a matghamte kebwô. Matghamte z’a ke ntswite tatte num Nsi là, ke ngù à zenekô Satan. (Yohané 8:44) Benntùn tse bo bét njam mfuni ghamte là num nkwate mbe bo ke mgamt’à Nsi nenùne: kelà ndù bo ke mfa’ à Satan. A b’a yi bèn mbe ‘nsi yen njù li.’—2 Korintô 4:4.

4. Mo mànze ze Satan num ntshùa bwe kà nsoṅ benntùn bo tam njam i là b’a: netshaṅ ka. Tsemo’ num ntsiaṅ bà ywèt num nelo’ mbéb wut yub yi, num nelo’ ngù kebwô tsemo’ benntùn, num nelèn nu ndam njù, ke nelo’ ngù ba nsa yi lo. Satan bèn mbe tshùagkèt neta z’a lem njam njoṅ men mfa’ li là. Neghù ndù ntù Nsi tsiaṅte num be, a ke’ bètte ndù be laṅte ne tshaṅ ka.—Nebwôgte 18:10-12; Mfa’ghantum 19:18, 19.

5. Satan num mbèn mbe fù benntùn: ntènte yub ndù bo ke ntsiaṅte num bag nzwit yub, ke neke nghamte ba ntsé’te  nkùnkù lo. Tsemo’ num nka’te ndù ngô yub, ke nzwit yub lo, tshùa tse tsemo’o benntùn. Là, a ke’ b’a nenùne. (Mfa’ghantum 10:34, 35) Tsemo’ benntùn num nywinte mbe ba ntsé’te nkùnkù a’ ghù ntôtni benntùn nyiaṅtu mi. Bo num mbe nywinte ndùlala nke nga nufen Nsi, z’a b’a nda’ ju nelo’ mbiagte ntôtni yi là.—Daniél 2:44.

6. Mo’ manze Satan num mfù benntùn yi là b’a ntshamntù num tshukebwô. Mba Yehovah lèn mbe nefa’ tshukebwô ku’ni nelo’ ntôtni ntèt be yi là, a tshob ndù be kù tshen tshu là. (Galatia 6:7, 8) A be tsemo’ benntùn se’ diagt’o ndù bin a bo ghù nukebwô là, kà lagte mbe a b’a Satan bèn nkô ndù bin ghù tshen tshu là.—1 Korintô 6:9, 10; 15:33.

7. Satan ku’ni nelo’ nkeban, ngutni ntel o yi, mba neghù bo tshett’o njam Yehovah. A be mo’ ndù tsemo’ benntùn ts’o kô yub là, kaṅ nke njantù wù num mb’o tshwèt nzi’te Bibel là. Tsemo’ nke nzwi o. O kô nebwô à we? We z’a fà yôg wù à? Satan nebwe’to, ndù o bwôg ntsin nezi’te nelèn Yehovah. K’o bam Satan ma’ o nsi! (Matio 10:34-39; 1 Pétro 5:8, 9) A be z’o ta ntshùa Diabolo là, mba Yehovah Nsi tsiaṅte num o, mbèn nda’te mb’o tomte Nufen se.—Tankùt 27:11.

[Netshaŋ bag fe ki 9]

Maghamte kebwô, ka netshaṅe, boa neghamte ngô ntôg ndù i, num mfù benntùn

[Netshaŋ bag fe ki 9]

Bin ke nta tu mbwe Satan, mbèn ndo’ nezi’te nelèn Yehovah nèn yi mbwe