BAG I 03
Bʼo bam ju ze Ñwaʼni Nsi tshwèt ntswide ké?
Ñwaʼni Nsi ghù nkaʼni bo ntag yàme. Moʼndù o tshwèt naʼ nkô nelèn ju zʼa tshwèt ntswide là, ndaʼndù nke mbètte wul o a be zʼa bʼa nenùn nà. Bʼo so ntshém ba nkaʼni bo ntag tsʼa be ntùm yen njwèn ñwaʼni là ké? Ju ze Ñwaʼni Nsi tshwèt ntshob là kuʼni neywimdʼo sènni ké? Bʼo bam ju zʼa tshwèt ntshob mfà num ndùmànyam ké? Ntshuʼ ntshuʼ benntùn num mbam ju ze Ñwaʼni Nsi tshwèt ntswide là. Bag bin yen mba bʼo bam yu là.
1. Tshu tsʼa be ntùm Ñwaʼni Nsi là bʼa kuaʼ nenùn ké?
Ñwaʼni Nsi mbe ntshob mi “kuʼni, mbèn mbe mi nenùne.” (Eklésia 12:10) Ba tshô boa benntùn bo be ntùm Ñwaʼni Nsi là bʼa kuaʼ nenùne. (Siañ Lukas 1:3; 3:1, 2.) Ghaziʼde tshô bo ghafoʼ njwèn tshu diag njen mbe benntùn, dùʼ, tshô tsʼa be ntùm Ñwaʼni Nsi là bo ngelañ tshen tshô là tôg là bʼa nenùne.
2. Numke be nkuʼni netshob mbe Ñwaʼni Nsi keʼ bʼa taʼ njwèn ñwaʼni à?
Tsemoʼ ngelañ, Ñwaʼni Nsi num ntshob tshu, ngelañ yàm tôg kʼa yôg mbumde. Mba mfiʼ là, a num ntshob mfà num tsemoʼ ntswide ba dibandèn. Bwoñ benntùn ngelañ mbwe naʼ ke nke mbam tshu tsʼa naʼ nke ntshob mfà num tshen ntswide là là. Ndaʼndù, ngelañ be tôge, bo diag njen mbe ju ze Ñwaʼni Nsi tshwèt ntshob là bʼa nenùne. Ñwaʼni Nsi “bʼa nenùne, sènni mba matmat.”—Yobkwi 111:8.
3. Numke bag bin kuʼni neso ntshém nkaʼni Ñwaʼni Nsi mfà num ndùmànyam à?
Ñwaʼni Nsi ghù ba ntshob ndamnjù * tsʼa tshwèt nsoñ “tshu tsʼa nsi seʼ là.” (Esaya 46:10) A naʼ soñ ba tshu, ngelañ yàm tôg kʼa yôg mbumde. A naʼ bèn ntshob mfà num ba ngùtni tse be tshwèt njen sènni là. Ntùm yen bag i li, bag bin aʼ bèn nziʼde tsemoʼ ntshob ndamnjù Ñwaʼni Nsi. A bʼa ju netshàm neyen mba bo tshwèt ndunde là!
TSWEʼ NTUN MI
Yen mba ntswide ba dibandèn zin ku ntshùʼ bo ju ze Ñwaʼni Nsi tshwèt ntshob là, mbèn ntsweʼ ntun tsemoʼ ntshob ndamnjù Ñwaʼni Nsi.
4. Ntswide ba dibandèn num nzin ku ntshùʼ bo Ñwaʼni Nsi
Ngelañ mbwe, benntùn naʼ nke nkwadʼà mbe nsitshaʼ tswe à num taʼ ju. Lôde LAʼDE NETSHAÑ.
Yen ju ze ñwaʼni Yob naʼ ntshob a nguʼnjù 3500 li ndonni là njene. Siañ Yob 26:7, mbèn mbùnde yen bètte li:
-
Ke zʼa be netshàm num mba Ñwaʼni Nsi tshob mbe “Nsi ghet tshaʼ à num dùʼ bànbàn” à?
A ghù à ndaʼ nguʼ 200 mba benntùn juʼ mat ze ntse num ndoʼ ntshét wul i yi là. Ndaʼndù, a yà ghù nguʼnjù 3500 mba Ñwaʼni Nsi naʼ tshob nu mfà num bwe là. Siañ Yob 36:27, 28, mbèn mbùnde tshen mbètte li:
-
Numke yen mat nebagde mba ntse num ndoʼ ntshét wul i yi là be netshàm à?
-
Ba nka Ñwaʼni Nsi tsʼo siañ nà so neta num yu bamntù mfà num Ñwaʼni Nsi ké?
5. Ñwaʼni Nsi naʼ soñ tshu ndùb tsʼa tôg là
Siañ Esaya 44:27–45:2, mbèn mbùnde yen bètte li:
-
Ke ze Ñwaʼni Nsi naʼ nsoñ num ze negwù Babilon nguʼ 200 tôg kʼa mbumdʼà?
Tshô tswhèt ndaʼde mbe, Sirus mven Persia bo ze ntshu ntsho naʼ loʼ ngô Babilon ntùm nguʼ 539 K.Z.N. * Bo naʼ ba koñntse zʼa naʼ nke ntshètte ngô là. Mba bo naʼ mbe ke fùn nze kab ngô là, bo tsho ntùm ngô, ndoʼ i ke leʼ ntsho. Sènni, nguʼ 2500 yà tôg mba ngô Babilon tùʼ mfam nà.
Siañ Esaya 13:19, 20, mbèn mbùnde yen bètte li:
-
Men ntshob ndamnjù li mfà num Babilon dunde à ndùke?
Fam ngô Babilon sènni mà Iraq
6. Ñwaʼni Nsi soñ tshu tsʼa tshwèt ntôg sènni là
Ñwaʼni Nsi tshwèt ntshob mbe bag bin bʼa ntùm “ba miagde léʼnjù.” (2 Timôtio 3:1) Yen ju ze Ñwaʼni Nsi naʼ nsoñ mfà num ba miagde léʼnjù là.
Siañ Matio 24:6, 7, mbèn mbùnde yen bètte li:
-
Ñwaʼni Nsi naʼ soñ mbe ke zʼa nsi tôg ntùm ba miagde léʼnjù à?
Siañ 2 Timôtio 3:1-5, mbèn mbùnde tshen mbètte li:
-
Ñwaʼni Nsi naʼ tshob mbe benntùn nsi bʼa ndùke ntùm ba miagde léʼnjù à?
-
O yen mbe benntùn ghù à tsit mat sènni à?
TSEMOʼ BENNTÙN NUM NTSHOB MBE: “Ñwaʼni Nsi bʼa ñwaʼni tshô me sañ ke fe.”
-
Num yu tu, ke zʼa tshwèt ndaʼde mbe Ñwaʼni Nsi bʼa kuaʼ nenùn à?
JU NETSHÙBE
Tshô njù, ntswide ba dibandèn bo ba ntshob ndamnjù tshwèt ndaʼde mbe o kuʼni nebam ju zʼa be ntùm Ñwaʼni Nsi là.
Mbètte nekwimde
-
Tshu tsʼa be ntùm Ñwaʼni Nsi là bʼa kuaʼ nenùn ké?
-
Tsit ntswide ba dibandèn num nzin ku ntshùʼ bo Ñwaʼni Nsi à?
-
O kwade mbe Ñwaʼni Nsi tshwèt nsoñ tshu tsʼa nsi tôg ndùmànyam ké? Numke?
DIAGE
Ñwaʼni Nsi tshob tshu a ke zin ku ntshùʼ bo ntswide ba dibandèn ké?
“La science est-elle dʼaccord avec la Bible?” (Ñwaʼni num jw.org)
Ke zʼa tshwèt ndaʼde mbe bag bin bʼa ntùm “ba miagde léʼnjù” à?
“6 prophéties qui se réalisent sous vos yeux” (La Tour de Garde, 1er mai 2011)
Yen mba ntshob ndamnjù Ñwaʼni Nsi mfà num netô Grikia dunde là.
Yen mba ntshob ndamnjù Ñwaʼni Nsi bade ze mat taʼ mandum neyen Ñwaʼni Nsi yi là.
“Pour moi, Dieu nʼexistait pas” (La Tour de Garde n° 5 2017)
