BAG I 10
Bʼo jù bin ntseʼde Ghakwénta Yaweh Nsi à ndùke?
O yà toʼ nèn taʼ ntseʼde ghakwénta Yaweh Nsi ké? A be ndù o keʼ toʼ nèn, mba moʼndù o tshwèt naʼ mbwôg nenèn bwe. Moʼndù mba o keʼ toʼ seʼ tshag ntseʼde là, ndaʼ nekwade neseʼ num yu mbwe yoñ tshwèt ngù o bwôg. Bʼo tshàm mbètte mbe: Ke zʼa be ntôg ntùm ba ntseʼde ghakwénta Yaweh Nsi à? Numke tshen ntseʼde là be ju ndùb à? Numke a nke mbètte me nèn tshen ntseʼde lʼà? Ntùm yen bag i li, oaʼ yen mba ntseʼde kuʼni neywimdʼo neghebte Nsi mbèn njwimdʼo mba ntùm yôg so là.
1. Ghakwénta Yaweh Nsi nke nkùmdʼà numke?
Yen ju ze taʼ ngakide naʼ ntshob mfà num ju ndùb zʼa ghù bag bin nke nkùmde là. A naʼ tshob mbe: “Me be nyàmde [Yaweh Nsi] ntùm bumde.” (Yobkwi 26:12) Be ndañndañ, ghakwénta Yaweh Nsi num njuʼ tsiañde ne nke nkùmde. Ntùm njoñ ngô fa, bo be nkùmde njoñ ngab fa num neghamde Nsi, njob kwi mbèn ndeʼdʼé. Tsemoʼ ngelañ ntùm tamnguʼ, bo num nkùmde num ba bumde ndùb num neghamde Nsi.
2. Ke zʼo ziʼde ntùm tshag ntseʼde à?
Ngelañ tshag ntseʼde, bag num njéʼdʼà num Ntshob Nsi, “nke ntodʼé mbʼa tshob là, num neghù ndù [mba we lo] juʼ ju ze bo siañ nà.” (Siañ Néhémi 8:8.) O nke nseʼ ba ntseʼde, mba oaʼ ziʼde nelèn Yaweh Nsi boa tse mat. Oaʼ be nèn mbwe neyen mba Nsi num nkô o là, o ghebte mbañ i. Oaʼ bèn njen mba bʼa ywimdʼo neghù taʼ mbwô yôg ndonni là.—Esaya 48:17, 18.
3. Tsit bin o jù ne nke nkùmde boa tsemoʼ ntùm ntseʼde à?
Yaweh Nsi tshwèt mbètte mbe “bag à bin zi tshùalo num be, be be, ndù bag à bin nànde num nkôni mba mfaʼ mebwô, kà bag à bin ghuaʼ koʼ ntseʼde be.” (Héber 10:24, 25) Ntùm tshag ntseʼde, oaʼ yen mbe mba we lo num ndaʼde nkôni mvèl i, mbèn nke ndiag neziʼde yàm mfà num Nsi mba wù là. Oaʼ yen mba mba we lo nke nso kù num mvèl i bo ba nkwade tsʼa fe ntùm Ñwaʼni Nsi là. (Siañ Roma 1:11, 12.) Oaʼ bèn nkuʼni netshobte bo benntùn bo maʼ ba ngùtni nandà mba nebe ke na ndà ntshùa là. Tshù tsemoʼ tshu tsʼa num ngù Yaweh Nsi nke nkô mbe bag bin nke nkùmde njoñ ngelañ fa là!
TSWEʼ NTUN MI
Diag nelèn mba ntseʼde ghakwénta Yaweh Nsi be ntôg là, mbèn njen bin o jù a be zʼo kagtùn nenèn tshen ntseʼde là là.
4. Ba ntseʼde ghakwénta Yaweh Nsi
Benkristô ngelañ mbwe naʼ nke ntseʼde njoñ ngelañ fa num neghamde Yaweh Nsi. (Roma 16:3-5) Siañ Kolosé 3:16, mbèn mbùnde yen bètte li:
-
Benkristô ngelañ mbwe naʼ nke ngamde Yaweh Nsi à ndùke?
Sènni, ghakwénta Yaweh Nsi be nkùmde njoñ ngelañ fa ntùm ba dùʼ ghamde. Neyen mba tshob ntseʼde num ntôg là, lôde LAʼDE NETSHAÑ. Mbe nèn mbwe, lôde netshañ ntùm yu ñwaʼni neyen mba ntseʼde num ntôg là, mbèn mbùnde tshen mbètte li.
-
Tsit ntamde o yen netèt ju zʼa be ntôg ntùm taʼ ndà ntseʼde Nufen bo ju zʼo siañ ntùm Kolosé 3:16 à?
-
Ntùm laʼde netshañ ke num netshañ no, ke zʼo bèn njen mfà num ba ntseʼde, a bwô o neshu à?
Siañ 2 Korintô 9:7, mbèn mbùnde yen bètte li:
-
Numke netsho ntseʼde ghakwénta Yaweh Nsi bʼa bànbàn à?
Bo yu ngatswide, yen ju ze bo ziʼde ntùm ntseʼde ngabnjù zʼa tshwèt nseʼ là.
-
Zit bag ziʼde aʼ bwô o mbèn njwimdʼo neshu à?
O naʼ lèn ké?
Num jw.org, o kuʼni nefon dùʼ bo ngelañ ba ntseʼde num ntôg ntùm njù sagkuà là.
-
Nkazin tshag ntseʼde ghù ba tu ntshob, ba mfiʼ nswade ntshob, bo ba laʼde netshañ. Ntseʼde num ntoʼde mbèn miagde bo kwi ngù leʼde
-
Ngelañ ziʼde, mba we lo kuʼni nefà ze bùnde
-
Mba we lo kuʼni neseʼe—ba tunndà, ben bo keʼ na ndà là, ben bo tènde ntùm nguʼnjù là, mba ba bônkeʼ
-
Netsho bʼa bànbàn. Ghakwénta Yaweh Nsi keʼ be maʼde nkàb
5. A bètte nkagtùn yàm ne nke nseʼ ntseʼde
Yen mfiʼ tunndà Yésu. Nelo Nazarèt, nkoʼ mà Yérusalém num neghù jùa njoñ nguʼ fa, a naʼ bètte bo zin ndañ manze kilometa 100 netèt ba nkônga. Siañ Lukas 2:39-42, mbèn mbùnde tshen mbètte li:
-
O kwade mbe nekoʼ nèn mà Yérusalém naʼ fiag ké?
-
Numke aʼ bètte o nke nkagtùn ne nke nseʼ ntseʼde à?
-
O kwade mbe nenèn ntseʼde aʼ ywimdʼo mba tà ndù a num mbètte nkagtùn ké? Numke?
Ñwaʼni Nsi tshwèt ntshob mbe nekùmde num neghamde Yaweh Nsi bʼa ju ndùb. Siañ Héber 10:24, 25, mbèn mbùnde yen bètte li:
-
Numke a mbètte be nke nèn ntseʼde njoñ ngelañ fa à?
TSEMOʼ BENNTÙN NUM NTSHOB MBE: “Bin ne nke nkùmde boa tsemoʼo keʼ be. Netswe ndà, nziʼde yu Ñwaʼni Nsi kuʼu.”
-
Zit nka Ñwaʼni Nsi ke mfiʼ ntùm Ñwaʼni Nsi lo tshwèt ndaʼde ju ze Yaweh Nsi kô à?
JU NETSHÙBE
Ne nke nèn ntseʼde aʼ ywimdʼo neziʼde tshu yàm mfà num Yaweh Nsi, neso neta num yu kushun bo yi, mbèn nke ngamdʼé boa tsemoʼo.
Mbètte nekwimde
-
Numke Yaweh Nsi nke nso kù num ben ne nke nkùmdʼà?
-
Ke zʼo ziʼde ntùm ntseʼde ghakwénta Yaweh Nsi à?
-
Tsemoʼ bin bʼo jù ne nke nseʼ ntseʼde là bʼa tsile?
DIAGE
Nkwade nenèn ntseʼde num ngù o bwôg ké? Yen mba taʼ mandum zʼa naʼ nke njuʼ wul i ndùlala tshwèt nkô ntseʼde ndonni là.
Yen mba taʼ nguanmèn jù bin ntseʼde, mbèn njen ju zʼa ghù ne nke nèn ntseʼde ke tag là.
Yen mba tsemoʼ num njuʼ wut yub ngelañ bo seʼ ntseʼde là.
“Pourquoi assister aux réunions tenues à la salle du Royaume?” (Ñwaʼni num jw.org)
Yen mba yôg taʼ ngaghù mvamva bade ngelañ a naʼ nseʼ ntseʼde ghakwénta Yaweh Nsi là.
“Je ne sortais jamais sans mon arme” (La Tour de Garde, 1er juillet 2014)
