MBWE BAG I
Be Ñwaʼni Nsi ywimdʼo à ndùke?
Njoñ ben fa ghù ba mbètte mfà num yôg, ngeʼ, vùkob mba ndùmànyam. Bag bin num mbèn ndab wut njoñ léʼ fa num jujù, mba num ntswe mebwô tunndà. Bwoñ benntùn yen mbe Ñwaʼni Nsi num njwimde yub nefon bùnde ba mbètte ndùb ntùm yôg, mbèn nke mfà ba ntag ntùn num neghù taʼ mbwô yôg. O keʼ yen mbe Ñwaʼni Nsi kuʼni neywimde njoñ benntùn fa ké?
1. Tsit mbètte Ñwaʼni Nsi be mfà mbùnde mi à?
Ñwaʼni Nsi be mfà mbùnde tshen mbètte ndùb li: Yôg toʼdʼà ndùke? Bin yôg bʼa ke? Numke be nke njen ngeʼ à? Ke zʼa be ntôg ngelañ mènntùn kwù à? A be ze njoñ benntùn fa tshwèt ndiag fide là, ke zʼa ghù bo nke ndeʼ ntsho à? Bo nsi biagde nsitshaʼ ké? A keʼ bag nefà tshen mbètte là. Mba ntshuʼ ntshuʼ benntùn nà, mbùnde ze Ñwaʼni Nsi fà wù là aʼ bwô o neshu.
2. Ñwaʼni Nsi kuʼni neywimde be neghù taʼ mbwô yôg à ndùke?
Ntag tse Ñwaʼni Nsi be mfà ben nà bwô neshu. Mba mfiʼ là, a num ntswide mba ba tunndà kuʼni netswe ntùm tsiañde ntùn nà. A num mbèn mfà ba ntag num mba be kuʼni nemaʼ nenywin ntshùa, mba mba be kuʼni nebe faʼa, njuʼ tsiañde là. Oaʼ ziʼde ju ze Ñwaʼni Nsi tshwèt ntswide mfà num yen bag i li, mbèn nziʼde tshu yàm ngelañ nswade ntshobe. Moʼndù oaʼ be miagde mbam mbe “njoñ Ñwaʼni Nsi fa [njoñ tshu fa tsʼa be ntùm Ñwaʼni Nsi là] . . . be njwimde.”—2 Timôtio 3:16.
Sen buʼ ñwaʼni li keʼ bʼa Ñwaʼni Nsi. A nke njwimdʼo à neziʼde Ñwaʼni Nsi yu tu. Ndùlala bag tshwèt nso kù num o, mbʼo siañ njoñ ba nka Ñwaʼni Nsi fa tse bo tunde ntùm mba zit bag i lo, mbèn ntàmde bo ju zʼo tshwèt nziʼde là.
TSWEʼ NTUN MI
Yen mba Ñwaʼni Nsi ywimde benntùn nà, yen mbʼo kuʼni nejù bin njam nesiañ i, mbèn njen ju zʼa ghù a bwô bo ywimdʼo nejuʼ Ñwaʼni Nsi là.
3. Ñwaʼni Nsi kuʼni netshagde ben
Ñwaʼni Nsi bʼa mba taʼ lambo num zebe manze là. A kuʼni neywimde be neloʼ mbwô mfiʼ, mba nelèn mba ndùmànyam nsi be yi là.
Siañ Yobkwi 119:105, mbèn mbùnde tshen mbètte li:
-
Ngakide yen Yobkwi li tshwèt njen Ñwaʼni Nsi à ndùke?
-
O nke njen yu Ñwaʼni Nsi à ndùke?
4. Be Ñwaʼni Nsi fà mbùnde tsebe mbètte
Taʼ mènnzwi fon mbùnde ba mbètte tsʼa naʼ nke ndiag ntùm Ñwaʼni Nsi là. Lôde LAʼDE NETSHAÑ, mbèn mbùnde tshen mbètte li.
-
Ntùm yen laʼde netshañ ni, tsit mbètte mènnzwi li naʼ ngù à?
-
Ziʼde Ñwaʼni Nsi ywimdʼé à ndùke?
Ñwaʼni Nsi tshwèt nso kù num be nefà ba mbètte. Siañ Matio 7:7, mbèn mbùnde yen bètte li:
-
O ghù à tsit mbètte ze Ñwaʼni Nsi kuʼni nebùndʼà?
5. Be o juʼ tsiañde nesiañ Ñwaʼni Nsi
Mbeʼyàm benntùn num njuʼ tsiañde nesiañ Ñwaʼni Nsi mbèn njù bin ju ze bo siañ nà. Lôde LAʼDE NETSHAÑ, mbèn mbùnde tshen mbètte li.
-
Ntùm laʼde netshañ, ghuan benntùn nke nkwadʼà ke mfà num nesiañ ju à?
-
A be be ndù bo keʼ be yà kô nesiañ ju, numke bo nke njuʼ tsiañde nesiañ Ñwaʼni Nsi ndonni à?
Ñwaʼni Nsi kuʼni nefà ba ntag tse be a fide ntù, mbèn mfà nywinde ben nà. Siañ Roma 15:4, mbèn mbùnde yen bètte li:
-
Ntshob fidentù bo nywinde zʼa be ntùm Ñwaʼni Nsi là bwô o ké?
6. Tsemoʼ benntùn kuʼni neywimde be nejuʼ Ñwaʼni Nsi
Bwoñ benntùn yen mbe, o num mbèn njù bin neswade ntshob mfà num Ñwaʼni Nsi boa tsemoʼo ntshùa neziʼdʼà ndaʼ tùʼ wù. Siañ Mfaʼ Ghantum 8:26-31, mbèn mbùnde yen bètte li:
-
Be kuʼni nejuʼ Ñwaʼni Nsi à ndùke?—Lôde nka 30 bo 31.
Mandum ze Etiopia naʼ kô mbe bo ywimdʼé nejuʼ Ñwaʼni Nsi. Mbeʼyàm benntùn sènni yen mbe, o num njù bin neswade ntshob mfà num Ñwaʼni Nsi boa tsemoʼo
TSEMOʼ BENNTÙN NUM NTSHOB MBE: “Neziʼde Ñwaʼni Nsi bʼa nebi ngelañ.”
-
O kwade yu à mbe ke? Numke?
JU NETSHÙBE
Ñwaʼni Nsi num mfà mbùnde num ba mbètte ndùb, mfà ba ntag ntùn num yôg, mbèn mfà nywinde bo fidentù.
Mbètte nekwimde
-
Tsit ntag be kuʼni nefon ntùm Ñwaʼni Nsi à?
-
Ñwaʼni Nsi nke mbùndʼà tsit mbètte à?
-
O kô neziʼdʼà ke ntùm Ñwaʼni Nsi à?
DIAGE
Ñwaʼni Nsi ghù ba ntag tsʼa kuʼni neywimde be sènni là.
“Une sagesse à lʼépreuve du temps” (La Tour de Garde No. 1 2018)
Yen mba Ñwaʼni Nsi ywimde taʼ mandum nezwe bo nkwade kebwô zʼa naʼ ngù fe mbʼa be metoʼ mèn nà.
Yen ba ntag Ñwaʼni Nsi mfà num yôg tunndà.
Yen mba nkwade Ñwaʼni Nsi mfà num mèn zʼa tshwèt ntô njù là bade bo nkwade bwoñ benntùn nà.
