BAG I 21

Faʼ nesoñ nkùn mebwô nke ntôg à ndùke?

Ntshùade njam ze Nufen, ndaʼndaʼ Yaweh Nsi biagde njoñ tsebe ngùtni fa. Be bag ke léʼ taʼ mbwô nkùn mba yennà là. Yésu naʼ kô mbe ghaziʼde nu i soñ yen nkùn nà njoñ benntùn fa. (Matio 28:19, 20) Ghakwénta Yaweh Nsi tshwèt nze yen ntshùʼ lʼà ndùke?

1. Matio 24:14 tshwèt ndunde sènni à ndùke?

Yésu naʼ tshob mbe: “Bo nsi tshob yen nkùn mebwô Nufen Nsi là ntùm njoñ njù fa.” (Matio 24:14) Ghakwénta Yaweh Nsi num ntsiañde nefaʼ sen faʼ ndùb là. Bag tshwèt nsoñ nkùn mebwô ntùm njù sagkuà ntùm ntshob 1000 ntôgde. Num nefaʼ sen faʼ ndùb là, a bètte mbe bo tshagde tshu kuaʼ mebwô mbèn nke mbètte nkagtùn yàme. Bag keʼ kuʼni nefaʼ sen faʼ là ke be ndù Yaweh Nsi ywimde yage.

2. Tsit nkagtùn bag num ngù num nesoñ nkùn mebwô benntùn à?

Bag num nsoñ nkùn mebwô njoñ dùʼ fa bag kuʼni netèt benntùn bwe là. Ndañndañ mba benkristô mbwe ngelañ nà, bag num nsoñ nkùn mebwô “[nzendà nzendà].” (Mfaʼ Ghantum 5:42) Yen mat nesoñ nkùn mebwô là num njwimde yag nekwag ntshuʼ ntshuʼ benntùn njoñ nguʼ fa. Mba benntùn keʼ be tswe ndà njoñ ngelañ fa là, bag num nsoñ nkùn mebwô mba tèt yàme. Bag num ndiag ba manze netshob mfà num Yaweh Nsi bo ze nekô tsemoʼo njoñ ngelañ fa.

3. Bo fà faʼ nesoñ nkùn mebwô à we?

Njoñ benkristô tse nenùn fa ghù nesoñ nkùn mebwô tsemoʼo. Bag num mfaʼ sen faʼ lʼà ntù ntshùʼ. Bag num nkagtùn nesoñ nkùn mebwô mba bag kuʼni là nummbe a bʼa nu yôg. (Siañ 1 Timôtio 4:16.) Bo keʼ be fà nkàb bag num nefaʼ sen faʼ là nummbe Ñwaʼni Nsi mbe: “Bin naʼ nkwé à bànbàn, bin bèn mfà zin bànbàn.” (Matio 10:7, 8) A be be ndù tsemoʼ benntùn keʼ be bam nejuʼ bag, bag num nkagtùn ke bot mbu nesoñ nkùn mebwô, nummbe a taʼ bag ndùb yag ghamde, a bèn nke ntsiañde ntù Yaweh Nsi.

TSWEʼ NTUN MI

Ziʼde njen mba ghakwénta Yaweh Nsi num nkagtùn nesoñ nkùn mebwô ntùm njù sagkuà là, mbèn njen mba Yaweh Nsi num njwimde yub là.

Nesoñ nkùn mebwô ntùm njù sagkuà (A) Costa Rica, (B) États-Unis, (C) Bénin, (D) Thaïlande, (E) Yap, (F) Suède

4. Bag num mfaʼ neta nesoñ nkùn mebwô njoñ benntùn fa

Ghakwénta Yaweh Nsi num nkagtùn neshu nesoñ nkùn mebwô benntùn njoñ dùʼ fa. Lôde LAʼDE NETSHAÑ, mbèn mbùnde yen bètte li.

LAʼDE NETSHAÑ: Nesoñ nkùn mebwô “tà nèn nkum num miagde tshaʼ là” (7:33)

Ke zʼa bwô o num nkagtùn ghakwénta Yaweh Nsi num ngù num nesoñ nkùn mebwô à?

Siañ Matio 22:39 bo Roma 10:13-15, mbèn mbùnde tshen mbètte li:

Faʼ nesoñ nkùn mebwô tshwèt ndaʼde à ndùke mbe bag kô benntùn à?
Yaweh Nsi nke nkwadʼà ke mfà num benntùn bo num nsoñ nkùn mebwô à? (Lôde Roma 10:15.)

5. Bag bʼa shunfaʼ Nsi

Bwoñ tshô laʼde mbe Yaweh Nsi tshwèt ntshagde sag faʼ. Mba mfiʼ là, taʼ mvèt lén se Paul mà Nouvelle Zélande, naʼ be soñ nkùn mebwô nzendà nzendà taʼ mvetnjù, ntèt taʼ mènnzwi. Yen mènnzwi là naʼ lo nsi yen nkebnjù là, ndeʼde Nsi, ntsi lén se Yaweh, mbèn mbètte mbe mènntùn seʼ njôg i. Paul tshob mbe, “a ke ghù hawa tat, me seʼ nkeʼde nzendà i.”

Siañ 1 Korintô 3:9, mbèn mbùnde yen bètte li:

Ba tshô mba yennà là tshwèt ndaʼdʼà ndùke mbe Yaweh Nsi num ntshagde faʼ nesoñ nkùn mebwô à?

Siañ Mfaʼ Ghantum 1:8, mbèn mbùnde yen bètte li:

Numke a mbètte Yaweh Nsi ywimde ben nedunde seben faʼ nesoñ nkùn mebwô à?

O naʼ lèn ké?

Njoñ ngab fa, ngelañ ntseʼde ngabnjù, bo num ntswide yag ba mat nesoñ nkùn mebwô yi. A be zʼo yà seʼ yen ntseʼde là là, ke zʼo kwade mfà num bwe à?

6. Bag num nze ntshùʼ Nsi nesoñ nkùn mebwô

Num mbwe ngelañ, ghakebàn naʼ diag netshètte ghaziʼde nu Yésu nesoñ nkùn mebwô. Mbwe benkristô naʼ ghù bo lèn mbe bo ghù nesoñ nkùn mebwô, “nkwé nta nkùn mebwô mbwe ghatshoʼde ntsha.” (Filipi 1:7) Ghakwénta Yaweh Nsi sènni num ngù à be ju ntshùʼ. *

Lôde LAʼDE NETSHAÑ.