BAG I 22
O kuʼni nesoñ nkùn mebwô à ndùke?
Oaʼ be nèn mbwe neziʼde nenùn Ñwaʼni Nsi, moʼndù o tshob mbe, ‘A fe mbwô mbe njoñ benntùn fa lèn yenni!ʼ Nenùne, a bètte njoñ benntùn fa ziʼde nenùn! Ndaʼndù bʼo bwôg nesoñ tshu tsʼo ziʼde là tsemoʼo. Bag bin yen mbʼo kuʼni nemaʼ yen bwôg là ntshùa, mbèn njen mba bʼo toʼde nesoñ nkùn mebwô bo tsiañde là.
1. O kuʼni nesoñ tshu tsʼo ziʼde là tsemoʼ à ndùke?
Ghaziʼde nu Yésu naʼ tshob mbe: “Bag keʼ kuʼni nebe ke tshob tshu tse bag naʼ njen mbèn njuʼ là.” (Mfaʼ Ghantum 4:20) Neta nkôni ze bo naʼ ngù mfà num ba nenùn Ñwaʼni Nsi là naʼ tènde yub nesoñ tshu bo naʼ nziʼde là bwoñ benntùn. O tshwèt njuʼ wul o mba bo là ké? A be ñ, diag manze netshob tshu tsʼo ziʼde là yu tunndà mba shun tsho bo nkuʼni.—Siañ Kolosé 4:6.
Tsemoʼ ntag num netoʼde
-
Ngelañ o tshobte bo yu tunndà là, bʼo be toʼde taʼ nswade ntshob num Ñwaʼni Nsi ntshob mbe: “Me ziʼde taʼ mbwô ju yen ngab li.”
-
Laʼde taʼ nka Ñwaʼni Nsi taʼ nshun o zʼa tshwèt ngon nà ke ne nywin no.
-
Taʼ nshunfaʼ bèttʼo mbe, yu tshô bʼa ndùke? mba bʼo soñ yi ju zʼo ziʼde ntùm yu ziʼde Ñwaʼni Nsi ke ndà ntseʼde lo.
-
Laʼde zebe dùʼ num koñnkùn, jw.org shun tsho.
-
Tsiañ tsemoʼo num yu ziʼde Ñwaʼni Nsi, ke là o laʼde bo mba bo kuʼni nebètte taʼ ziʼde Ñwaʼni Nsi num jw.org là.
2. Numke nesoñ nkùn mebwô bo ntseʼde bʼa taʼ mbwô mfiʼ à?
Ghaziʼde nu Yésu naʼ ke be soñ nkùn mebwô à ndaʼ benntùn bo lèn nà. Yésu naʼ “tum yub bàa bàa mbwe i, ntùm njoñ ngô fa,” bo soñ nkùn mebwô. (Lukas 10:1) Yen mat netshagde faʼ nesoñ nkùn mebwô là naʼ ywimde bwoñ benntùn nejuʼ mbwô nkùn a be ntùm Ñwaʼni Nsi là. Netamde nsoñ nkùn mebwô ndùlà, bèn mfà tsiañde yàm ghaziʼde nu Yésu. (Lukas 10:17) O kuʼni mba bo là nemaʼ mfiʼ nesoñ nkùn mebwô bo ntseʼde ké?
TSWEʼ NTUN MI
Yen mbʼo kuʼni nemaʼ bwôg ntshùa mbèn njuʼ tsiañde a be njam nesoñ nkùn mebwô là.
3. Yaweh Nsi aʼ ywimdʼo
Tsemoʼ benntùn bo kô nesoñ nkùn mebwô là num mbwôg mat benntùn yen yub ke neloʼ yub yi là lo.
-
O num mbwôg nesoñ tshu tsʼo ziʼde là tsemoʼ ké? Numke?
Lôde LAʼDE NETSHAÑ, mbèn mbùnde yen bètte li.
-
Tshen ghuan benntùn nà naʼ maʼ tshob bwôg ntshùa à ndùke?
Siañ Esaya 41:10, mbèn mbùnde yen bètte li:
-
O nke mbwôg nesoñ nkùn mebwô, mba leʼde aʼ ywimdʼo à ndùke?
O naʼ lèn ké?
Mbeʼyàm ghakwénta Yaweh Nsi naʼ nke nkwade mbe bo ke nsi ghù tànntù nesoñ nkùn mebwô. Mba mfiʼ là, Sergey naʼ nke njen wul i mba ju bànbàn nà, a nke nta yi neswade ntshobe. Ndaʼndù a toʼde neziʼde Ñwaʼni Nsi. A mbe: “Mba tà ndù me naʼ nke mbwôge, me toʼde nesoñ tshu tse me naʼ nke nziʼde là tsemoʼo. Ju netshàm naʼ bʼa mbe, nesoñ nkùn mebwô ywimdʼàm nemaʼ yàm bwôg ntshùa. A naʼ bèn nso neta num yàm bamntù.”
4. Nke mfà nkuʼni tsemoʼo
Ngelañ zʼo nabte wul o nesoñ nkùn mebwô là, kwade mfà num ju zʼo tshob là, mba num mat o tshob yi là. Siañ 2 Timôtio 2:24 bo 1 Pétro 3:15, mbèn mbùnde tshen mbètte li:
-
O kuʼni neyab tshen nka Ñwaʼni Nsi li ntùm faʼ ngelañ o tshwèt ntshob mfà num Ñwaʼni Nsi tsemoʼ à ndùke?
-
Moʼndù tsemoʼ benntùn ntùm yu tunndà ke shun tsho lo ke bam ju zʼo tshob bo là. Ke ze bʼo ghù à? Ke zʼa bètte o ghù à? Ke zʼa keʼ bètte o ghù à?
-
Ntshùa ne nke nsoñ i tshu tsʼa bam à ndaʼ nebam nà, numke a mbwô neloʼ zenu mfà à ba mbètte tsʼa ghù a siañde nu à?
5. Nesoñ nkùn mebwô num mfà tsiañde
Yaweh Nsi fà faʼ Yésu nesoñ nkùn mebwô. Yésu naʼ nke njen sen faʼ lʼà ndùke? Siañ Yohané 4:34, mbèn mbùnde tshen mbètte li.
-
Nejù me lamde tshañ num ntomde ben, mbèn mfà tsiañde ben. Numke Yésu naʼ tàmde neghù ze nekô Nsi—mba nesoñ nkùn mebwô—bo nejù ju à?
-
O kwade mbe o kuʼni nejù à tsit bin njam nesoñ nkùn mebwô à?
Ntag
-
Ngelañ ntseʼde ngabnjù, lôde ba mat tse bʼa ywimdʼo netoʼde ba nswade ntshob là.
-
Bètte yu ngatswide mbʼo kuʼni neghù ba nswade ntshob ke ba tu ntshob lo ndà ntseʼde là. Tshen tu ntshob bo nswade ntshob là kuʼni neywimdʼo nesoñ tsemoʼ tshu tsʼo tshwèt nziʼde là ke bwôg.
-
Loʼ bag i “Tsemoʼ benntùn num ntshob mbe” ke “Be mènntùn bètte mbe” a be ntùm yen buʼ ñwaʼni li là, num neyen mbʼo kuʼni nebùnde ba mbètte bo fà wù là.
BE MÈNNTÙN BÈTTE MBE: “Tshô bʼa ndùke?”
-
Bʼo tshùade njam bwe, ntshob ju zʼo ziʼde ntùm yu ziʼde Ñwaʼni Nsi lʼà ndùke?
JU NETSHÙBE
Nesoñ nkùn mebwô num mfà tsiañde. A keʼ taa mbʼo kwade là.
Mbètte nekwimde
-
Numke a mbètte be nke nsoñ nkùn mebwô tsemoʼ à?
-
O kuʼni nesoñ nkùn mebwô bo nkuʼni à ndùke?
-
O kuʼni nemaʼ mba zit ngùtni lo o ghù là ntshùa num nesoñ nkùn mebwô à ndùke?
DIAGE
Yen manze kuà tse bʼo loʼ fe neyôg jw.org, nsoñ nkùn mebwô yi là.
Yen mat kuà tsʼa kuʼni neywimdʼo nesoñ nkùn mebwô là.
“Es-tu prêt à devenir un pêcheur dʼhommes?” (La Tour de Garde, septembre 2020)
Yen mba mfiʼ Ñwani Nsi kuʼni nefà tànntù wù nesoñ nkùn mebwô a be be ndù o bʼa nguanmèn nà.
Lôde njen mbʼo kuʼni netshob mfà num Ñwaʼni Nsi benntùn ntùm yu tunndà tse bo keʼ be ghamde Yaweh Nsi là.
“Touchons le cœur de nos parents non Témoins” (La Tour de Garde, 15 mars 2014)
