BAG I 26
Be nke njen ngeʼ à numke?
“Numke?” Tshù bètte benntùn num mbètte ngelañ taʼ nukebwô tum bo là. A tsiañde be nelèn mbe Ñwaʼni Nsi tshwèt mfà mbùnde yen bètte là!
1. Satan naʼ ndoʼ nukebwô ntsho yi ntùm njù à ndùke?
Satan naʼ ta tu Yaweh Nsi. A naʼ nke nkô netô num tsemoʼo, a ju zʼa naʼ ntèndʼé nefù mbwe tà be, Adam bo Eva là, mba bo yub ta tu Yaweh Nsi. Satan naʼ tshob taʼ tatte Eva. (Netoʼde 3:1-5) A naʼ ghù a kwade mbe Yaweh Nsi tshwèt ndede me mbwô ju yi. A naʼ bèn ndaʼde yi mbe, benntùn nyiañtu be ke juʼ ntshu Nsi, mba yub ntswe mebwô aʼ kwiʼde. Satan tshob mbwe tatte Eva, ntattʼé mbʼa ke kwù. A num yennà ze Ñwaʼni Nsi nke ntsiañ Satan “ngatatte mba tà tatte” là.—Yohané 8:44.
2. Ke ze Adam bo Eva naʼ ntshoʼ neghù à?
Yaweh Nsi naʼ laʼde bwôntù Adam bo Eva. A naʼ tshob bo mbe bo kuʼni nejù njoñ ntàmntù fa ntùm nkaʼ Edèn, ntsi ntshùʼ. (Netoʼde 2:15-17) Ndaʼndù bo loʼ mfiʼ nejù sen ntàmntù là, nta tu Nsi. Eva “loʼ ntàm se njù mbèn mfà mba se ndu i” Adam. (Netoʼde 3:6) Ntu tshob bàa naʼ ta tu Nsi. Mba Adam bo Eva naʼ ndàn miagde là, a naʼ fiag bo neghù ju zʼa tsin nà. Ndaʼndù bo loʼ mfiʼ neta tu Nsi ndùlala bo ghù nukebwô mbèn nga ze netô. Yen mfiʼ là naʼ loʼ nukebwô yàm nseʼ yi num bo.—Netoʼde 3:16-19.
3. Ke ze mfiʼ ze Adam bo Eva naʼ ndoʼ là loʼ nseʼ yi num ben à?
Ngelañ Adam bo Eva naʼ mfàn ntshùʼ Nsi là, bo tùʼ ben kelàn miagde, mbèn mfà yen nebe kelàn miagde là njoñ nzwit yub fa. Tshù ju ze Ñwaʼni Nsi tshwèt ntshob mfà num Adam ni: “Nukebwô lo tshùa njam taʼ mèn ntsho ntùm njù, vù tshùa njam nukebwô, là vù lo seʼ nsa num njoñ benntùn fa.”—Roma 5:12.
Tshu nzenze be ngù mbe bag bin yen ngeʼ. Bag bin num njen ngeʼ num mfiʼ kebwô tse bag bin loʼ là. Tsemoʼ ngelañ, mfiʼ kebwô tse ben ghua loʼ là mbèn nke ngù mbe bag bin yen ngeʼ. Bag bin num mbèn njen ngeʼ à nummbe bag bin bʼa dùʼ kebwô num ngelañ kebwô.—Siañ Eklésia 9:11.
TSWEʼ NTUN MI
Yen ju zʼa ghù bo nke ntshob mbe ngeʼ bo nukebwô zʼa be ntùm njù sènni là keʼ nke mfe à Nsi là, mbèn njen mbʼa num njuʼ wul i ngelañ bag bin num njen ngeʼ là.
4. Mèn zʼa be ngù bag bin nke njen ngeʼ là
Bwoñ benntùn be nkwade mbe a Nsi bèn nke ntô njoñ njù fa. A nenùn ké? Lôde LAʼDE NETSHAÑ.
Siañ Yakobo 1:13 bo 1 Yohané 5:19, mbèn mbùnde yen bètte li:
-
Ngeʼ bo nukebwô nke mfe à Nsi ké?
5. Ntshoʼfaʼ ze netô Satan bʼa tsile?
Siañ Netoʼde 3:1-6, mbèn mbùnde tshen mbètte li:
-
Zit tatte Satan naʼ ntshob à? (Lôde nka 4 bo 5.)
-
Satan mbe Yaweh Nsi num ndede tshu mebwô benntùn nyiañtu. A laʼde yennʼà ndùke?
-
Num ze tu Satan, a bètte Yaweh Nsi tshagde benntùn nyiañtu kà bo juʼ mebwô ké?
Siañ Eklésia 8:9, mbèn mbùnde yen bètte li:
-
Fe mba Satan tshwèt ntô yen njù li là, ke zʼa tshwèt ntôg à?
-
Adam bo Eva naʼ làn miagde mbèn nke ntswe ntùm paradis. Ndaʼndù bo naʼ juʼ ntshu Satan, nta tu Yaweh Nsi
-
Mba bo naʼ nta tu là, ngeʼ, nukebwô mba vù sa ntùm njù
-
Yaweh Nsi nsi ghù mbe ngeʼ, nukebwô mba vùkob mii. Benntùn nyiañtu nsi làn miagde mbèn ntswe ntùm paradis
6. Yaweh Nsi tshwèt njuʼ kebwô num tsebe ngeʼ
Yaweh Nsi num ntshàm num tsebe ngeʼ ké? Yen ju ze mven David bo ngantum Pétro naʼ nkide là. Siañ Yobkwi 31:7 bo 1 Pétro 5:7, mbèn mbùnde yen bètte li:
-
O nke njuʼ wul o à ndùke nelèn mbe Yaweh Nsi tshwèt njen njoñ ngeʼ fa tsʼa tshwèt ntum benntùn nyiañtu là, mbèn nke ntshàm num bwe à?
7. Nsi aʼ ghù mbe njoñ ngeʼ benntùn nyiañtu fa tsine
Siañ Esaya 65:17 bo Apokalipse 21:3, 4, mbèn mbùnde yen bètte li:
-
Nelèn mbe Nsi aʼ biagde njoñ tshu kebwô fa tse ngeʼ loʼ nseʼ yi là tshwèt mfide ntù o à ndùke?
O naʼ lèn ké?
Ngelañ Satan naʼ ntshob mbwe tatte là, a neʼ mbén num lén Yaweh Nsi. A ghù bo ke bèn neyen Yaweh Nsi mba taʼ ngatô zʼa dun nkôni mbèn nke ngù nunetsin nà. Me ndaʼndaʼ ngelañ ze Yaweh Nsi nsi ghù mbe ngeʼ benntùn nyiañtu tsin nà, a sôgde lén se. Yennà diag netshob à mbe a nsi laʼde mbe moʼ netô keʼ tshùa ze. Nesôgde lén Yaweh Nsi bʼa ju ndùb ntùm njù.—Matio 6:9, 10.
TSEMOʼ BENNTÙN NUM NTSHOB MBE: “Nsi num ngù be yen ngeʼ à num nelañde zebe bamntù.”
-
Oaʼ bùndʼà ndùke?
JU NETSHÙBE
Bwoñ nukebwô bo ngeʼ a be ntùm njù li nke mfe à Satan bo mbwe tà ben Adam bo Eva. Yaweh Nsi tshwèt njuʼ kebwô neshu num tsebe ngeʼ. Me ndaʼndaʼ a ghù mbe njoñ ngeʼ benntùn nyiañtu fa mii.
Mbètte nekwimde
-
Zit tatte Satan naʼ tshob Eva à?
-
Tatu Adam bo Eva loʼ à ke nseʼ yi num njoñ benntùn nyiañtu fa à?
-
Be lèn à ndùke mbe Yaweh Nsi num njuʼ kebwô num tsebe ngeʼ à?
DIAGE
Yen ju ze Ñwaʼni Nsi tshwèt ntshob mfà num nukebwô là.
Ziʼde yàm mfà num ntsha ze Satan naʼ mbùʼde ntùm nkaʼ Edèn nà.
“Pourquoi Dieu permet-il les soufrances?” (La Tour de Garde, 1er janvier 2014)
Mbùnde taʼ bètte tsʼa fide ntù o là.
“Pourquoi la Shoah a-t-elle eu lieu? Pourquoi Dieu nʼa-t-il rien fait?” (Ñwaʼni num jw.org)
Yen ju ze taʼ mandum naʼ nziʼde mfà num ngeʼ a nke ntôg mbañ i là.
