Nufen Nsi yà nke ntôô. Me ndaʼndaʼ a loʼ ba mbade ndùb nseʼ yi num nsitshaʼ. Bag bin yen mbwô mbwô tshu tsʼo nsi ghù ngelañ Nufen Nsi nsi tô num nsitshaʼ là.

1. Nufen Nsi nsi loʼ fide bo nunetsin nseʼ yi num nsitshaʼ à ndùke?

Yésu, Mven Nufen Nsi, nsi biagde njoñ ba tshùagkèt benntùn bo ba netô ngelañ ntsho Armagédon. (Apokalipse 16:14, 16) Yen ngelañ nà, yen nkaʼni Ñwaʼni Nsi li aʼ dunde kuaʼ mebwô: “A tùʼ mén ndaʼndaʼ tshùagkèt mèn be ke bèn mbe.” (Yobkwi 37:10) Yésu aʼ tshùade njam Nufen Nsi njab fide bo nunetsin num njoñ nsitshaʼ fa.​—Siañ Esaya 11:4.

2. Yôg aʼ zi mbʼa ndùke ngelañ ze ze nekô Nsi nsi dunde num nsitshaʼ à?

Ngelañ Nufen Nsi nsi tô num nsitshaʼ là, “ben netsin nsi ghù ngô, tswe bwe njoñ ndù fa.” (Yobkwi 37:29) Naʼ nkwade mbʼo bʼa ntùm taʼ njù dùʼ ze njoñ benntùn fa bʼa ben netsine, nke nkô Yaweh Nsi mbèn nke nkô wut tshob bo bo! Sàm mènntùn ke nsi bèn ntam ngokèt, njoñ benntùn fa aʼ ghù yôg matmat.

3. Ke ze Nufen Nsi nsi ghù ngelañ ze bo biagde tshùagkèt benntùn à?

Ngelañ bo biagde tshùagkèt benntùn nà, Yésu tô mba Mven num nguʼnjù 1000. Yen ngelañ nà, yi bo benntùn 144 000 bo nsi tô bo yi là nsi ywimde benntùn nyiañtu nelàn miagde. Yen ngelañ nà aʼ be mi, nsitsha kañ ntùʼ taʼ me mbwô paradis. Njoñ benntùn fa nsi juʼ tsiañde nummbe bo tshwèt nze ntshùʼ Yaweh Nsi. Mbe nèn mbwe, Yésu baʼ Nufen Tàab Yaweh Nsi. Yen ngelañ nà “lén Yaweh Nsi be nelàn” mbʼa keʼ toʼ be là. (Matio 6:9, 10) Njoñ benntùn fa nsi lèn mbe Yaweh Nsi bʼa taʼ ngatshagde zʼa be nywin num ben tse là. Yaweh Nsi aʼ be nèn mbwe mbiagde Satan, ba bebùn, mba mba tsemoʼ benntùn bo tshoʼ neta tu yi là. (Apokalipse 20:7-10) Yôg nelàn ze Nufen Nsi loʼ seʼ yi là aʼ tswe à matmat.

 TSWEʼ NTUN MI

4. Nufen Nsi nsi biagde netô benntùn nyiañtu

“Mènntùn ghù ngùʼ neghù kebwô num mvèl i.” (Eklésia 8:9) Yaweh Nsi nsi tshùade njam Nufen se, ngù mbe lèn yen nuketsin nà mii.

Siañ Daniel 2:44 bo 2 Tésalônikà 1:6-8, mbèn mbùnde tshen mbètte li:

• Ke ze Yaweh Nsi bo Mén i, Yésu, nsi ghù netô benntùn nyiañtu mba ben tse bo tshwèt ntomde yub lʼà?

• Njéʼde num ju zʼo ziʼde mfà num Yaweh Nsi mba Yésu là, ke zʼa ghù o bam ke magde mbe tshu tse bo nsi ghù là aʼ tsin mbèn mbwô à?

5. Moʼ mbwô Mven mba Yésu là keʼ be

Yésu, Mven Nufen Nsi nsi tshùade njam mat nzenze njwimde benntùn num nsitshaʼa. Lôde LAʼDE NETSHAÑ neyen mba Yésu yà laʼde mbʼa ghù nzi mbèn ngù mbaʼ ze Nsi fà yi num neywimde benntùn nà.

Tshu tse Yésu naʼ ngù ngelañ a be num nsitshaʼ là, naʼ nke ndaʼdʼà tshu tsʼa ghù ngelañ a be Mven Nufen Nsi là. Tsit mbotni netèt tse bo tunde nzenni o tshwèt mbébte neyen mbʼa dundʼà? Siañ ba nka Ñwaʼni Nsi tsʼa tshwèt njwimde ben nebèn ndèn yàm mfà num tshen mbotni là là.

6. Nufen Nsi aʼ fà taʼ mbwô ndùmànyam be

 JU NETSHÙBE

Nufen Nsi nsi dunde ze nekô Nsi. Aʼ ghù nsitshaʼ tùʼ taʼ paradis zʼa dun ben netsin tse bo nsi ghamde Yaweh Nsi matmat là.

Mbètte nekwimde

• Nufen Nsi nsi sôgde lén Yaweh Nsi à ndùke?

• Numke be nkuʼni nebam mbe Nufen Nsi nsi dunde ba nkaʼni Ñwaʼni Nsi à?

• Zit mbotni Nufen Nsi o tshwèt mbébte mbʼa dundʼà?