Benkristô tse nenùn loʼ mfiʼ nenya ke fañ sàm ju ke sàm mèn no tshètte yub neghamde Yaweh Nsi. Bag lèn ke magde mbʼa ju zʼo kwade yu là. Yu nelat num Yaweh Nsi bʼa ju tanjoñ yi. (Siañ 1 Kronika 28:9.) Tsit tshu bèn nkuʼni nelañde yu nelat num Yaweh Nsi à? Ke zʼa kuʼni neywimdʼo à?

1. Tsemoʼ benntùn kuʼni nelañde zebe nelat num Yaweh Nsi à ndùke?

Tsemoʼ benntùn aʼ diag netshètte ben neghamde Yaweh Nsi. We zʼa diag neghù yennʼà? Tsemoʼ benntùn bo gha nenùn nà num ntshob ba tatte num ntseʼde Yaweh Nsi num neghù mbe zebe bamntù kwù. Bo nke ntsiañ yub à ghagha Nsi. Mbèn mbe, tsemoʼ tàndà tshôssi num nsoñ ba tatte num bag neghù mbe ben tse bo keʼ be zede là gha nenùne. A bʼa taʼ neta ywiʼ neswade ntshob bo lèn tshen benntùn nà, nesiañ tshob buʼ ñwaʼni, nenèn num tshob dùʼ num koñnkùn, ke nelôde tshob laʼde netshañ no. Yésu tshob mfà num ben tse bo tshwèt nkagtùn netshètte ghafaʼ tse nelat num i là mbe: “Bin fañ yub là; bo bʼa ba mfùmiag, ghatshagde ba mfùmiag. Là, a be ze mfùmiag tshagde moʼ mfùmiag là, mba ntu tshob bàa fa nsi vù ntùm tàme.”—Matio 15:14.

Be juʼ ndonni mbe taʼ nshun ben ke taʼ mèn ntùm zebe tunndà lo keʼ bèn nkô nebe ngakwénta Yaweh Nsi ô? Be be juʼ kebwô num bwe neshu. Yen mènntùn nà kuʼni nebètte mba ndù be tshoʼ netèt yi bo Yaweh Nsi. A be mba ndùke lo, mbʼa bètte be loʼ mfiʼ nelat num Nsi ntshùa mèn ghua. (Matio 10:37) Ndùlà, bag num njuʼ ntshu Yaweh Nsi nenya ke tamde bo lèn tshen benntùn nà.—Siañ 1 Korintô 5:11.

2. Be ba mfiʼ tse be be ndoʼ ntùm yôg ben nà laʼdʼà ndùke mbe be lat num Yaweh Nsi à?

Nkôni mfà num Yaweh Nsi aʼ tshètte ben neghù mba zit ntamde lo bo tshôssi kebwô. Kʼa be faʼ ze be num mfaʼ là ke mba zit kum no be be ntùm bwe là, a keʼ bètte a ghù moʼ ntamde bo tshôssi kebwô. Yaweh Nsi te bu num ben mbe: “nzwil àm, bin ntum ntùm [Babilon ze ndùb].”—Apokalipse 18:2, 4.

 TSWEʼ NTUN MI

3. Bàm nà num ghatswide tatte

Ke zʼa bètte be ghù ngelañ be juʼ tshu kebwô num ntseʼde Yaweh Nsi à? Siañ Tànkùt 14:15, mbèn mbùnde yen bètte li:

• Numke a mbʼa zenu nenya ke bam njoñ tshu fa be juʼ lʼà?

Siañ 2 Yohané 10, mbèn mbùnde tshen mbètte li:

• A bètte be loʼ ghagha Nsi à ndùke?

• Mba tà ndù be keʼ be tshobte bo ghagha Nsi, be bag bin yen mbèn njuʼ tshob ntswidʼà yà?

• O kwade mbe Yaweh Nsi aʼ juʼ wul i à ndùke be ze be kùʼ ntoñ num tshu kebwô tse bo num ntshob mfà num i mba num ze ntseʼdʼà?

4. Tswe nelat num Nsi ngelañ ze taʼ mvèt ghù taʼ nukebwô là

Be juʼ mbe taʼ mvèt ntùm ntseʼde ghù taʼ nukebwô ndùb, mba ke zʼa bètte be ghù à? Yen taʼ tun ntshùʼ ze Yaweh Nsi naʼ mfà Israél ngelañ mbwe là. Siañ Lévitiko 5:1.

Mba yen nka Ñwaʼni Nsi li laʼde là, be lèn mbe taʼ mvèt ghù taʼ nukebwô ndùb, mbʼa bètte be soñ ghakwémbwe. Là, kà ngù yennà, a bètte be loʼ bwôntù nso kù yi num ngaghù nukebwô mbʼa nèn soñ ze nukebwô ghakwémbwe. A be zʼa gha nenèn nsoñ ju zʼa ghù là ghakwémbwe là, mbʼa bètte be laʼde zebe nelat num Yaweh Nsi, nèn nsoñ ghakwémbwe ju ze be lèn nà ke bi ngelañ. Yen mat neghù là tshwèt ndaʼde mbe be kô . . .

• Yaweh Nsi mbèn ndat num i à ndùke?

• mèn zʼa ghù nukebwô lʼà ndùke?

• tsemoʼ benntùn ntùm ndà ntseʼdʼà ndùke?

 5. Tum ntùm Babilon ze ndùb

 JU NETSHÙBE

Netswe nelat num Yaweh Nsi, a bètte be bàm nà netamde bo benntùn bo gha i là. A bèn mbètte be keb njoñ ntamde fa bo tshôssi kebwô.

Mbètte nekwimde

• A keʼ bètte be lôde, nsiañ ke nejuʼ ntswide ghagha Nsi lo: numke?

• A bètte be loʼ benntùn bo keʼ bèn nkô nebe ghakwénta Yaweh Nsi lʼà ndùke?

• Be mènntùn laʼde mbʼa tum ntùm tshôssi kebwô à ndùke?