Ntùm yen ziʼde Ñwaʼni Nsi li, o ziʼde tshu yàm mfà num Yaweh Nsi. Tshu tsʼo ziʼde là kwiʼde yu nkôni mfà num i, mbèn mbe, moʼndù a bèn ntèndʼo nefà wul o yi mbèn ngù nyuʼntse. Nya ke là, moʼndù o tshwèt nsiañde neghù yennà. Là, neghù nyuʼntse keʼ bʼa mbʼo yà kuʼ num bag ywèle. O kuʼni nenèn mbwe neghebte Yaweh Nsi matmat. Mbʼa ndùke?

1. Numke a mbètte o nèn mbwe neso neta num yu kushun bo Yaweh Nsi à?

A bètte be faʼ neta neghù mbe zebe kushun bo Yaweh Nsi ta nèn mbwe. Numke? “Ndù kà . . . [bag bin gha] Nsi.” (Héber 3:12) Ke ze bʼa ywimde ben nenèn mbwe neghamde Yaweh Nsi ke bot mbu à? Be kuʼni netôg ngelañ yàm ntùm faʼ nesoñ nkùn mebwô mbèn ndiag ba manze nekwiʼde zebe faʼ ntùm ghamde Yaweh Nsi. (Siañ Filipi 3:16.) Neghamde Yaweh Nsi bʼa taʼ mbwô mat nejù bin yôg ndù lèn i keʼ be!—Yobkwi 84:10.

2. Ke zʼa bèn mbètte o nèn mbwe neghù à?

Mba tà ndù yen ziʼde Ñwaʼni Nsi li aʼ tsin, oaʼ nèn mbwe nedùʼ ba mat tsʼa bètte num mènkristô là. Ñwaʼni Nsi tshwèt ntshob mbe a bètte be “maʼ mèn nswe.” (Efésô 4:23, 24) Oaʼ be nèn mbwe neziʼde Ntshob Nsi mbèn nke nèn ba ntseʼde, nziʼde tshu nswe mfà num Yaweh Nsi mba num mat tse. Diag ba manze nefiʼde mat tse kuaʼ mebwô ntùm yôg so. Nèn mbwe neghù ba mbade tsʼa bètte là num netsiañde ntù Yaweh Nsi.

3. Yaweh Nsi aʼ ywimdʼo nekuʼ num bag ywèl à ndùke?

Ñwaʼni Nsi mbe: “Nsi . . . nsi ghù bin bwô miagde, ngù tànntù, ngù neta, ngù bin tswe ke nyiʼde.” (1 Pétro 5:10) Lañde num nte mbwe njoñ ben fa. Là, Yaweh Nsi num mfà ju zʼa bètte là ben nedù kà be gwù ntùm tshen lañde là. (Yobkwi 139:23, 24) A bù nefà nzi mba neta wù neghamdʼé ke bot mbu.—Siañ Filipi 2:13.

 TSWEʼ NTUN MI

4. Nèn mbwe neswade ntshob bo nshun o

Leʼde bo ziʼde Ñwaʼni Nsi ywimdʼo nebe nshun Yaweh Nsi. Tshen tshu li kuʼni neywimdʼo o bèn ngebtʼé à ndùke?

Siañ Yobkwi 62:8, mbèn mbùnde yen bètte li:

• Neso neta num yu kushun bo Yaweh Nsi, o kuʼni neghù mbe tsho ndeʼde bwô nèn mbwe à ndùke?

Siañ Yobkwi 1:2 bo kide tun fe, mbèn mbùnde yen bètte li:

• Neso neta num yu kushun bo Yaweh Nsi, ke zʼo kuʼni neghù num nebèn njù bin yàm num yu nesiañ Ñwaʼni Nsi à?

Ke zʼo kuʼni neghù num nebèn njù bin yàm num yu ziʼde tu wul à? Neyen tsemoʼ tshu tse bʼa ywimdʼo là, lôde LAʼDE NETSHAÑ, mbèn mbùnde tshen mbètte li.

• Tsit ntag ntùm laʼde netshañ o kuʼni neyab ntùm faʼ à?

• Tsit tu ntshob o kô neziʼdʼà?

 JU NETSHÙBE

Nèn mbwe neso neta num yu kushun bo Yaweh Nsi mbèn maʼ ba mfiʼ num bag ywèle. O ghù yennà, mba oaʼ jù bin yôg matmat!

Mbètte nekwimde

• Numke o lèn ke magde mbe Yaweh Nsi aʼ ywimdʼo neghamdʼé ke bot mbu à?

• Bʼo so neta num yu kushun bo Yaweh Nsi à ndùke?

• Nemaʼ ba mfiʼ num bag ywèt kuʼni neywimdʼo nekuʼ num bag ywèl à ndùke?