1. Ke zʼa nsi seʼ tum be, à be ze be “khùʼte nseʼ mbeṅ Nsi à”?

YEHÔVA num nkô ghafàʼ tse. O ke nghemte Yehôva, mbʼa nsi neṅ mbotni num o ndônni mba ngeleṅ ndù màndjem. Bibèl tshob ndù: “bin khùʼte nseʼ mbeṅ Nsi mbʼàʼ khùʼte nseʼ mbeṅ bin.”​—Yakobo 4:8.

2. A be beg à bun khùʼte nseʼ mbeṅ Nsi à ndùke? Nekhùʼte nseʼ mbeṅ Nsi khuʼni ne bate zebe leʼtʼà ndùke?

² Nekhùʼte nseʼ mbeṅ Nsi bʼa neziʼte ntshob mi mbèn nke ndzin à num ju ze bin ziʼte là. A be zʼo num ndeʼtʼé ntùm mat zʼa kô là, mba, Yehôva nsi juʼ ju ndeʼte mu mbèn mbùnte mfà ghwù. Ngantum ménkristô Yohané, lo khite ndù: “Tshù nywinte ze be ghù num i li ndù: mbà ke lo ze be lon yi a bumte bo ze nêko là, àʼ fà. Mbèn mbe, a be ze be lèn ndù a tshwèt njuʼ be num tshu tse be bètte là, be lèn ndù be nsi ghù tshen tshu là, nummbe be bètte tshen tshu là yi.”​—1 Yohané 5:14, 15.

3-7. A be be ghù nghùm zʼa fe Nsi là à ndùke? A bèn ndjwimte be à nduke?

³ Moʼ ju zʼa bèn mbe là bʼa yen ni. O khùʼte nseʼ mbeṅ Nsi, mbʼà nsi fà zenu neloʼ nke ntshagte mba ke lo yi num ndjoṅ léʼndjù fa ntùm yôg so ghwù. Bibèl tshob ndù: “A be ze moʼ mèn netèt bin bwoṅ zenu là, kʼa bot ne ke mbètte Nsi yi.”​—Yakobo 1:5.

⁴ A be nghùm zʼa fe à Nsi là ywimtʼo à ndùke? Num tàʼ ju ntshùʼ. A khuʼni neywimtʼo nghù o lèn ju zʼa keʼ be bwô Yehôva là, mba ju zʼa ghù kà tshen tshu là mbe tse kebwô là. Mbèn nghù o lèn mba mbʼà bʼo ghù kà nke mbénte tshen tshu là là. Lèn yen nelèn nu là khuʼni ne bomtʼo nghù o khù tsemoʼ ndjoṅ bitom tsʼa num ntsho mba we lo là. Tàʼ mfiʼ. Nejuʼ nteg Nsi mi a tshwèt mbètte be netswe nelàn ntùm zebe khuzin nà, num mbomte be num bà bitom yàm mbà: neket ngokèt bà kattù, ne jùm ndà, ne nàndà ntùm mbu mfet mba nefacte nàndà.

⁵ Moʼ ju zʼa be nghùm zʼa fe Nsi bèn nghù ghwù là bʼà ke? A khuʼni nefà neta ghwù o loʼ ndjù bin yi ntùm yôg so, mbà neke ndoʼ à mànndze mebwô ngeleṅ zʼo tshwèt màʼ mfiʼ num ju zʼo nsi ghù bo nkàb o là; mba ne ke ndieg à tshu tsʼa tsin nebèle, nghwàʼ tsʼa keʼ tsin nà.

⁶ Nghùm zʼa fe Nsi là khuʼni neywimtʼo mba ntùm yu mat ne loʼ ntswe yi bin à tsemoʼ benntùn. O khuʼni neghù tunndà tswe ntùm tsieṅte kemi. O khuʼni ne khwùtkhushun se netswe yàm bin à tsemoʼ benntùn; mbèn nkhuʼni neghù mbà ghakebem Nsi nke nghù nkhuʼni ghwù.

⁷ Mbèn mbe seʼ khum num moʼ leṅ se, nghùm ze Nsi fà ghwù là nsi kwiʼte ju num yu mat ne ke ntshit leg ntùm ndjù. A nsi ywimtʼo ne ke nzwite ke ne ke ntswe ntùm tsieṅte num ngeleṅ ngeʼ lo. O nsi bèn be tswe ke be bwôg sàm ju num nu ndùmandjem. Netswe ke ke mbwôg sàm ju num mfà ntswemebwô ntùm nkwatenu mu mba num ghwul o.​—Tankùt 14:30; Esaya 48:17.

8. A be zʼo tshwèt nke mfàʼ à Nsi là, mbʼo ke nsi ke bwôg ke?

⁸ O ke mfàʼ Nsi ze nenùn mbʼo nsi tum nkhwàn bu bwôg zʼa tshùb benntùn tse bo ke be fàʼ Nsi là. Num mbʼo lèn mbe feben keʼ bèn nghù yôg ntùm fi là, o ke nsi  bèn ke bwôg yube. Ntshùate num mbʼo so nde Nsi num nkàʼni mi a yab mbe a nsi bem feben num vù là, o ke nsi bèn ke bwôg vùkob. Mbèn nseʼ num mbʼo lèn ndù Nsi bʼa nganeta ntshùate là, o ke nsi bèn ke bwôg tôge.​—Yohané 8:32.

9-11. Ba we bèn nsi tswe ntùm Paradisi, ba we ke tswe ntùm bwe à?

⁹ A bʼo khùʼte nseʼ mbeṅ Nsi là, mbʼo ke nsi bwôg nu ndù màndjem. Mbà be yen nà, Bibèl lo yà tshob nu mfà num mbeʼyàm ntotni be tshwèt ndjen num nsitshàʼ sènni là. Yehôva tshob be ndù tshen tshu li bʼa num metsit ngeleṅ ndjù. Àʼ be ghubte nufen Nsi seʼ nkeṅ yen nsitshàʼ li a tùʼ paradisi.​—Lukas 21:10, 11, 31; 23:43.

¹⁰ A bʼa ndàʼ ben tse bo khùʼte nseʼ mbeṅ Yehôva mbèn nke mfàʼ yi là nsi bèn tswe ntùm paradisi. Bibèl tshob ndù: “A tùʼ me ndàʼ ndàʼ, tshùegkèt mén be ke bèn nebe; o nsi lôte dùʼ a ke mbe là, a ke bèn nebe bwe. Là, bà fàghwùt nsi bèn ghù nsitshàʼa, khuàʼ nenùn bo nsi bèn tswe ntsieṅte ntùm fite yàm yàme.”​—Yobkwi 37:10, 11.

¹¹ Ben tse bo tshwèt ndoʼ ta tu nga ne ke nze ntshùʼ Nsi netsin nà nsi bi yôg sob matmat. (2 Tésalonikà 1:8, 9) Bo ke nsi bèn be. Bo nsi nèn tèt Satan boa ba bebun tse ntùm matmat vù. (Apokalipse 20:10, 14) Là, ben tse bo tshwèt ndziʼte ne lèn Yehôva, bèn be ghafàʼ tse, là nsi bʼa ntùm tsieṅte ze mayàme ntùm paradisi num nsitshàʼa.

12. Bibèl ke ntshob à ke mfà num ndùmandjem à?

¹² Yehôva nabte mbwômbwô tshu ndéʼ ben tse bo num nkô i là ntùm ntà. Lôte ju ze ntshob Nsi tshwèt ntshob mfà num paradisi zʼa nsi be num nsitshàʼ là ndjene:

• Tshu nejù: “Jujù nsi yàm ntùm ngô, num tu ba mbale, jujù nsi ghàʼ mbu bwe.”​—Yobkwi 72:16.

• Mbwômbwô mbàʼ: “Bo nsi khwut mbàʼ tswete ntùm bwe.”​—Isaya 65:21.

• Mieg mfàʼ mi mebwô: “Ben tshàm tse me tshoʼ là nsi tsieṅte ntùm mfàʼ mbu mube, bo ke nsi fàʼ à bànbàn.”​—Isaya 65:22, 23.

• Sàm ngokèt: “Sàm mèn ntùm ngô ke nsi tshob ndù: ‘me tshwèt ngone.’”​—Isaya 33:24.

• Sàm loʼ: “Yen ngeleṅ nà, mieg ba mfùmieg nsi ghàʼa, ntoṅ ba mbuʼntoṅ bèn ntshoʼo. Yen ngeleṅ nà ba nkeʼkèt nsi ywètte mba ndjuanyàm nà, lém ba ketshob kéʼte, mbet zwi ntsieṅte.”​—Isaya 35:5, 6.

• Yaghwut, zwe, vùkob: “[Nsi] nsi tshwitte ndjoṅ ntsenyà fa mieg bo, vù ke nsi bèn be, ntsenyà, ne khwàʼa, ke ya lo ke nsi bèn be nummbe, ba mbwe tshu tôg.”​—Apokalipse 21:4.

• Ne màʼ ntsho: “[Nsi] ghù ntsho tsin tà nèn nkum num ntôgndjù.”​—Yobkwi 46:9.

• Yôg matmat: “Ben netsin nsi ghù nsitshàʼa, tswe num bwe matmat.”​—Yobkwi 37:29.

13. Ndàʼ we bèn nkhuʼni ne keṅ yen nsitshàʼ li a tùʼ paradisi à? Num ke?

¹³ Benntùnnyieṅtu keʼ khuʼni ne loʼ lèn tshen tshu li nseʼ yi be; là, Yehôva ghù mbàʼ ne fà mba ke lèn jù lo zʼa yàb nkàʼni ndù a nsi fà be là. Sàm ju keʼ khuʼni ne tshèttʼé ndù kʼa fàʼ ju zʼa kô là. Bibèl tshob ndù “Sàm nu mba ntshùʼ keʼ be tshùa Nsi”.​—Lukas 1:37.

14. O khuʼni ne zin num mànndze yôg matmat à ndùke?

¹⁴ Yehôva ntshùàte ndjem ghakwénta nke ntswite benntùn ndù bo ke ntshùa à num ndzendà zʼa fèt là mbèn nke ndzin à num mànndze nekeg zʼa be nèn nkum ntùm yôg matmat là. A be mba ghwù bem ne ke nghemte Nsi ntùm ze nekôô, ndùlàlà ndù Yehôva neṅ mbotni matmat num o!​—Matio 7:13, 14.