A be zʼo tshwèt nkô nebe nshun Nsi là, mbʼa bwô ndù o ke nghamtʼé à ntùm mat zʼa bwô i là. Yésu lo tshob mbe: “ghaghamte tse nenùn,” ghù neke nghamte Nsi à mba “Nenùn” tshwèt mbètte là. (Yohané 4:23, 24) Manze zʼa tsin neloʼ nke nghamte Nsi yi là bʼa ndàʼ ntshùʼ. (Efesô 4:4-6) Matghamte nenùn num ntshagte mèn à num manze nenèn nkwé yôg matmat; là matghamte nsi ze kebwô num ntshagte mèn à num manze nebi.​—Matio 7:13, 14.

O kuʼni nebe lèn ndàghamte ze nenùne, nke ndôtʼà mat ze tse ghaghamte ghù là. Yaweh bʼa tàʼ Nsi mebwô; ghaghamtʼé tse nenùn bʼa benntùn tsʼa tshwèt mbètte ndù, mba bo yub ke ngù à be tshu mebwô là. Tù buma ntùn num njam mbwô mbwô ntàm mi; be ndaṅdaṅ, ndàghamte ze nenùn num mfà ben netsine.​—Matio 7:15-20.

Shun Yaweh Nsi num mfà nkuʼni ndùb Nwaʼni Nsi. Bo lèn ndù Nwaʼni Nsi fe à Nsi. Bo ke nsiaṅ Nwaʼni Nsi à num ndù à be tàʼ ngatshagte yub ntùm yôg: num neywimte yub neke ntsiagte tshunu, mbèn ngù bo lèn Nsi kuaʼ mebwô. (2 Timôtio 3:16) Bo num nkagtùn neke ngù à ju ze bo num ntswite benntùn yi là.

 Shun Yaweh Nsi ghù nkôni netèt bo. Yésu lo làʼte ndù à num nkô benntùn, nummbe a lo ke ntswite yub nelèn Nsi, mbèn nke njate ghangokèt. Ben tse bo num nzin ntùm matghamte nenùn nà, num mbèn ndàʼte ndù mba bo yub num nkô tsemoʼ benntùn. Be ndaṅndaṅ mbà Yésu là, bo keʼ be tutte bà bwoṅ mba ghùnngô tse bo be netèt bo là. Yésu lo tshob mbe benntùn nsi be lèn ghaziʼte nu i, njen à nkôni zʼa be netèt bo là.​—Yohané 13:35.

Shun Nsi num nke mfà nkuʼni lèn se : Yaweh. A be ndùse tàʼ mèn gha neke ntsiaṅ o lèn so là, mbʼo kwate mbe yen mèn nà bʼa nshun kô ntù o ké? Nga! Be num ngù tàʼ nshun be, mba be àʼ ke ntsiaṅ i à koʼ lèn se, mbèn nke ntshob numebwô mfà num i, mbwe tsemoʼ benntùn. Ben tse bo tshwèt ndiag nebe shun Nsi là, ghù neke ntsiaṅ i à koʼ lèn se, mbèn nke ntswite tsemoʼ benntùn ndù bo lèn i. Yaweh kô ndù bag à bin ke ngù à ndùla.​—Matio 6:9; Roma 10:13, 14.

Mba Yésu là, shun Nsi num nke nsoṅ benntùn ju ze Nufen Nsi be yi là. Nufen Nsi bʼa tàʼ netô zʼa be mfe kamànyam, ndù a yi zi bèn kaṅ nsitshàʼ loʼ ghù paradisi yi là. Shun Nsi num nke ngabte mbwô tshô sen Nufen Nsi là boa tsemoʼ benntùn.​—Matio 24:14.

Ghakwinta Yaweh num nke nkagtùn ke bot, nebe shun Nsi. Bo num mbwôg Nwaʼni Nsi mbèn nke nkôni netèt bo bo. Bon num ntsiaṅ mbèn nke mfà nkuʼni lèn Nsi. Bo num mbèn nke nsoṅ tsemoʼ benntùn ju ze Nufen Nsi be yi là. Ghakwinta Yaweh bèn nke nghamte Nsi num manze nenùn num nsitshàʼ sènni.