Ang 27 ka magmamantala sa Iqaluit Congregation, sa Arctic Archipelago sa Canada nagsaulog sa Memoryal pinaagig videoconference. Sa 55 ka Bible study sa kongregasyon, 12 ang nanan-aw sa programa ug nalipay sila pag-ayo nga nakatambong sila.

Alang sa kadaghanang Bible study, lisod kaayo ang pagtambong sa Memoryal. Nagpuyo sila sa hilit nga mga dapit sa teritoryo sa kongregasyon, nga ang gilapdon mga duha ka milyon ka kilometro kuwadrado (772,204 sq mi) gikan sa Kimmirut hangtod sa Grise Fiord—ang kinatumyang komunidad sa Canada sa amihanan.

“Karong tuiga, sa unang higayon, ang among mga Bible study nakatan-aw sa Memoryal uban namo. Usa ka Bible study sa Grise Fiord ang nangimbitar ug upat ka indibiduwal nga motan-aw sa programa, maong lima ka tawo nga gikan sa kinaibabwang bahin sa kalibotan ang nakaduyog namo sa Memoryal,” miingon si Brader Isaac Demeester, ansiyano sa Iqaluit Congregation.

Ang talagsaong mga kahimtang nga resulta sa mga restriksiyon tungod sa COVID-19 nga pandemic nakatabang sa daghang igsoon sa Iqaluit Congregation nga makita ang mga kaayohan sa pagkaandam nga mopailin-ilin.

Si Sister Kathy Burechailo miingon: “Ginatawagan namo ang mga tawo didto sa sidlakang bahin sa Arctic. Diha koy naestorya nga mga interesado sa kinahilitang mga bahin sa among teritoryo. Naa sa balay ang mga tawo ug nanginahanglan silag paghupay.”

“Kami diri sa Iqaluit na-isolate ug nakapa-stress ni namo kay tungod niini nga pandemic, naapekhan mi sa pinansiyal ug wala mi masayod kon unsay sunod nga mahitabo,” miingon si Sister Laura McGregor. “Unang higayon sa among pamilya nga naggamag tinapay alang sa Memoryal. Nalipay mi nga nag-uban mi. Naapresyar gyod namo ang kasimple sa maong okasyon, ug panalangin gyod nga sayon ra mabatonan ang mga emblema.”

Si Brader Demeester miingon: “Bisag wala mi mag-ubanay tungod sa COVID-19, nindot kaayong makita nga niining panahon sa Memoryal mas nasuod ang kongregasyon. Ang Memoryal karong tuiga nakabag-o sa among panglantaw sa kinabuhi!”

Ang Iqaluit Congregation naghinamhinam nga magtukod ug kaugalingong Kingdom Hall sa umaabot kon itugot sa kahimtang. Sa kasamtangan, nahibalo ta nga panalanginan ni Jehova ang ilang kakugi sa pagsangyaw sa maayong balita ngadto sa kinatumyang mga rehiyon sa Canada sa amihanan—usa sa kinahilitang mga bahin sa yuta!—Buhat 1:8.