Niadtong Enero 7, 2020, ang Puerto Rico gitay-og ug magnitude 6.4 nga linog, ug gisundan kinig daghang aftershock. Sa buntag sa Enero 11, dihay magnitude 5.9 nga linog nga miigo sa isla.

Daghang residente sa apektadong mga lugar ang wala gihapoy koryente ug nagpabilin sa gawas sa balay. Gikompirmar sa sangang buhatan sa United States nga walay naangol o namatay nga igsoon. Pero 248 ang mibiya sa ilang mga balay. Gawas pa, 8 ka balay sa mga igsoon ang nagun-ob ug 70 ka balay ang naguba. Diha poy 10 ka Kingdom Hall nga naguba. Busa dunay Disaster Relief Committee, kauban sa mga tigdumala sa sirkito, nga nag-organisar ug pagpadalag hinabang ug shepherding sa mga igsoon nga naapektohan.

Bisan pa niining lisod nga kahimtang, ang mga igsoon nagpadayon sa ilang pag-alagad. Si Brader Robert Hendriks, nga naa sa Public Information Desk sa sangang buhatan sa United States, miingon: “Kini nga matang sa kalamidad dili sagad mahitabo sa Puerto Rico, mao nga nabalaka pag-ayo ang mga igsoon tungod ani nga mga linog. Pero, nalig-on mi kay wala sila maluya. Kutob sa mahimo, motambong sila sa mga tigom ug makigbahin sa pagsangyaw bisan pag walay koryente o tubig. Dalayegon kaayo ang paningkamot sa mga ansiyano sa pag-shepherding, pagdasig, ug pagtabang sa tanang nanginahanglan.”

Makapalig-on gayod ang apresasyon nga gipakita sa mga igsoon sa espirituwal nga mga butang bisan pa niining lisod nga situwasyon. Hinaot nga padayon silang hatagan ni Jehova ug kalinaw sa hunahuna.—Salmo 119:165.