Sa milabayng 18 ka bulan, 613 ka balay na sa atong mga igsoon ang gi-raid sa mga polis ug sa Federal Security Service (FSB) nga mga agent sa Russia. Sukad niadtong Enero 2019, miabot nag 332 ka balay ang gi-raid sa mga awtoridad—mas daghan kompara sa 281 ka balay nga gi-raid sa 2018.

Sa milabayng mga bulan, mas daghang balay sa mga igsoon ang gi-raid. Sa Hunyo naay 71 ka balay ang gi-raid, ug sa Hulyo naay 68. Mas daghan kini kompara sa 2018, nga kada bulan mga 23 ka balay ang gina-raid.

Sagad dihang mag-raid, ang mga polis naka-mask, armado, ug mopugos pagsulod sa balay o apartment. Dihang makasulod na sila, usahay ilang tutokan ug pusil ang nawong sa mga igsoon, apil ang mga bata ug tigulang; ilang gitratar ang mga Saksi nga samag peligrosong mga kriminal. Dili ikatingala nga daghang eksperto ang miuyon sa giingon ni Dr. Derek H. Davis, kanhing direktor sa J.M. Dawson Institute of Church-State Studies sa Baylor University: “Ang agresibong pagpanglutos sa Russia sa malinawong grupo sama sa mga Saksi ni Jehova nagpakita nga ang mga awtoridad ang tinuod nga mga extremist.”

Ikasubo, nagkadaghan pod ang mga igsoon nga gikasohan ug mga kasong kriminal. Sa Russia ug Crimea, 244 ka igsoon na ang gikasohan—sobra sa doble ang gidaghanon sukad sa Disyembre 2018, nga 110 ka igsoon ang gikasohan. Sa 244 ka igsoon nga gikasohan, 39 ang naa sa prisohan, 27 ang gipriso sa balay, ug kapin sa 100 ang dunay mga restriksiyon.

Bisag padayong giatake sa mga awtoridad sa Russia ang atong mga igsoon, wala ta maluya niini nga mga paglutos. Hinuon, nadasig ta sa mga report nga ang atong mga igsoon nagmaunongon ug milahutay. Atong dayegon ug pasalamatan si Jehova sa pagtubag sa atong mga pag-ampo para nila, ug masaligon ta nga padayon niya kining himoon.—1 Tesalonica 3:3, 7.