NEW YORK—Tungod sa hulga nga idili ang buluhaton sa mga Saksi ni Jehova sa Russia, ang mga Saksi ni Jehova sa tibuok kalibotan maghimog kampanya nga sulatan ang Kremlin ug ang mga opisyales sa Supreme Court aron mangayog tabang. Ang Nagamandong Lawas sa mga Saksi ni Jehova nagdasig sa tanang kapig 8,000,000 ka Saksi sa tibuok kalibotan sa pagpadalag sulat.

Niadtong Marso 15, 2017, ang Ministry of Justice sa Russia nagpasakag kaso sa Supreme Court of the Russian Federation kontra sa Administrative Center of Jehovah’s Witnesses sa Russia. Gusto nila kining ipasira kay extremist (rebolusyonista) kuno. Gusto nilang ipaundang ang tanang kalihokan sa maong Administrative Center. Kon dapigan sila sa Supreme Court, ipasira ang hedkuwarter sa mga Saksi nianang nasora, nga naa duol sa St. Petersburg. Dayon, mga 400 ka rehistradong Local Religious Organization ang mapasira, ug mahimong ilegal ang mga tigom sa kapig 2,300 ka kongregasyon sa mga Saksi ni Jehova sa Russia. Mahimong kompiskahon sa Estado ang propidad sa sangang buhatan, ug ang mga dapit sa pagsimba nga gigamit sa mga Saksi sa tibuok nasod. Dugang pa, mameligrong pangkasohan ang matag Saksi ni Jehova tungod sa ilang kalihokan nga konektado sa ilang pagsimba. Ang Supreme Court gidahom nga mohimog desisyon sa Abril 5.

“Ang Nagamandong Lawas sa mga Saksi ni Jehova naghangyo nga tagdon pag-ayo kining situwasyona,” miingon si David A. Semonian, spokesman sa tibuok kalibotang hedkuwarter sa mga Saksi. “Klarong sayop kaayo nga pagpadapat sa anti-extremist nga mga balaod ang pagdemanda niining dili bayolente ug masinundanon sa balaod nga mga tawo, nga daw giisip silang terorista. Ang maong mga husay gibase sa bakak nga mga ebidensiya.”

Ang tibuok kalibotang kampanya sa mga Saksi nahitabo na kaniadto. Mga 20 ka tuig kanhi, ang mga Saksi misulat aron depensahan ang ilang kaubang Saksi sa Russia. Diha man goy pipila ka opisyales sa gobyerno nga nagpakaylap ug kabakakan bahin sa mga Saksi. Gawas pa niana, ang mga Saksi nakahimo na pod ug mga kampanya sa pagpadalag sulat aron awhagon ang mga opisyales sa gobyerno nga undangon ang paglutos sa mga Saksi sa ubang nasod, sama sa Jordan, Korea, ug Malawi.

“Dili gyod intawon krimen ang pagbasag Bibliya, pagkanta, ug pag-ampo kauban ang mga igsoon sa pagtuo,” midugang si Mr. Semonian. “Hinaot kining tibuok kalibotang kampanya sa pagpadalag sulat magpalihok sa mga opisyales sa Russia nga undangon na ang dili patas nga pagtratar kontra sa atong mga igsoon sa pagtuo.”

Media Contacts:

International: David A. Semonian, Office of Public Information, +1-845-524-3000

Russia: Yaroslav Sivulskiy, +7-812-702-2691