Ang sport mahimong makaayo o makadaot. Depende kana kon unsay imong dulaon, kon unsaon nimo pagdula, ug kon unsa ka dugay kang magdula.

•  Unsay mga kaayohan niini?

•  Unsay angayng konsiderahon?

•  Ang giingon sa ubang batan-on

 Ang pagdulag sport makaayo sa panglawas. Ang Bibliya nag-ingon nga “may kapuslanan ang pagpaugnat sa lawas.” (1 Timoteo 4:8, Ang Bag-ong Maayong Balita Biblia) “Ang pagdulag sport makatabang nimo nga mahimong aktibo,” miingon ang batan-ong si Ryan. “Mas maayo pa ni kay sa pagdulag video game.”

 Ang pagdulag sport makatudlog kooperasyon ug disiplina sa kaugalingon. Ang Bibliya migamit ug ilustrasyon bahin sa usa ka sport sa pagtudlog importanteng leksiyon. Kini nag-ingon: “Ang tanang magdadagan sa usa ka lumba modagan, apan usa lamang ang makadawat sa ganti.” Kini nagpadayon: “Ang matag tawo nga nagaapil sa usa ka sangka nagapugong sa kaugalingon sa tanang butang.” (1 Corinto 9:24, 25) Unsay punto? Dihang magdula, kinahanglan ang pagpugong sa kaugalingon ug kooperasyon aron masunod ang mga patakaran sa sport. Ang tin-edyer nga si Abigail uyon niini. Siya miingon, “Ang pagdulag sport nagtudlo nako nga makigkooperar ug makigkomunikar sa uban.”

 Ang pagdulag sport makapalig-on sa panaghigalaay. Kon magdula ka, makauban nimo ang mga tawo. Ang batan-ong si Jordan miingon, “Halos tanang sport naa gyoy kompetisyon, pero kon isipon nimo nga dula ra na, malingaw gyod ka ug masuod sa imong mga higala.”

 Kon unsay imong dulaon. Ang Bibliya nag-ingon: “Si Jehova magausisa sa matarong ug sa daotan, ug si bisan kinsa nga nahigugma sa kapintasan [iyang] ginadumtan.”​—Salmo 11:5.

 Ang ubang sport pintas kaayo. Pananglitan, ang batan-ong si Lauren miingon: “Sa boksing, ang kontra imo gyong sumbagon. Ingong Kristohanon, dili kita makig-away, busa nganong motan-aw man tag mga tawo nga nagsinumbagay aron lang malingaw?”

 Hunahunaa kini: Mangatarongan ka ba nga okey rang magdula o magtan-awg pintas nga sport, nga maghunahuna nga dili ni makaimpluwensiya nimo sa paghimog bayolenteng mga buhat? Kon mao, hinumdomi nga ang Salmo 11:5 nag-ingon nga gidumtan ni Jehova ang tawong “nahigugma sa kapintasan,” dili lang kadtong naghimo niana.

 Kon unsaon nimo pagdula. Ang Bibliya nag-ingon: ‘[Ayaw] pagbuhat ug bisan unsa tungod sa pagkamatigion o tungod sa pagpaimportante sa kaugalingon, kondili uban sa pagpaubos sa hunahuna isipa nga ang uban labaw kay kaninyo.’​—Filipos 2:3.

 Siyempre, bisan unsang sport nga may magkalaban nga team duna gyoy kompetisyon. Pero kon buhaton sa mga nagdula ang bisan unsa aron lang makadaog, ang dula dili na makalingaw. “Usahay, dili ka kabantay nga nakigkompetensiya na diay ka,” miingon ang tin-edyer nga si Brian. “Kon mas hawod kang modula, kinahanglang mas maningkamot kang magpaubos.”

 Hunahunaa kini: Ang batan-ong si Chris miingon, “Magdula mig soccer kada semana, ug duna gyoy mapiangan o mabun-og.” Busa pangutan-a ang imong kaugalingon, ‘Ngano kahang dunay mapiangan o mabun-og? Unsay akong buhaton aron wala kaayoy mapiang o mabun-og?’

 Kon unsa ka dugay kang magdula. Ang Bibliya nag-ingon: ‘Tinoa ang mas hinungdanong mga butang.’​—Filipos 1:10.

 Kinahanglang magtakda kag mga prayoridad; ang espirituwal nga mga butang angayng unahon. Ang kadaghanang dula moabot ug daghang oras, nagdula ka man o nagtan-aw lang. Ang batan-ong si Daria miingon: “Kaniadto, pirme ming maglalis ni Mama bahin sa panahon nga akong gigamit sa pagtan-awg mga sport sa TV nga puwede unta nakong magamit sa mas importanteng mga buluhaton.”

 Hunahunaa kini: Mamati ka ba dihang tambagan ka sa imong ginikanan bahin sa kon unsay angay nimong unahon? Ang batan-ong si Trina miingon: “Ako ug ang akong mga igsoon magsigeg tan-awg mga sport kaniadto ug dili na namo mabuhat ang importanteng mga buluhaton, busa pahinumdoman mi ni Mama nga ang mga nagdula suweldado, manan-aw man mi o dili. ‘Pero kinsa may mosuweldo ninyo?’ siya mangutana. Kini ang iyang gipasabot: Ang mga nagdula duna nay trabaho. Pero kon dili namo buhaton ang among mga homwork ug ubang buluhaton, dili namo masuportahan ang among kaugalingon sa umaabot. Ang gipasabot ni Mama mao nga ang pagtan-aw o pagdulag mga sport dili mao ang pinakaimportante sa among kinabuhi.”