Imbes idili ang seksuwal nga kalipay, gipakita sa Bibliya nga kini maoy gasa sa Diyos alang sa magtiayon. Iyang gilalang ang mga tawo nga “lalaki ug babaye” ug giisip ang iyang gihimo ingong “maayo kaayo.” (Genesis 1:27, 31) Dihang gihiusa niya sa kaminyoon ang unang lalaki ug babaye, siya miingon nga “sila mahimong usa ka unod.” (Genesis 2:24) Kini nga paghiusa naglakip sa kalipay sa seksuwal nga relasyon uban sa suod nga emosyonal nga kalangkitan.

 Gihubit sa Bibliya ang kalipay nga bation sa mga bana diha sa kaminyoon: “Pagmaya uban sa asawa sa imong pagkabatan-on ... Tugoting ang iyang mga dughan magtagbaw kanimo sa kalipay sa tanang panahon. Sa iyang gugma maanaa ka unta kanunay sa hilabihang kalipay.” (Proverbio 5:18, 19) Buot usab sa Diyos nga ang mga asawa makabatog seksuwal nga kalipay. Ang Bibliya nag-ingon: “Ang mga bana ug asawa kinahanglang magtagbaw sa seksuwal nga panginahanglan sa usag usa.”—1 Corinto 7:3, God’s Word Bible.

Limitasyon sa seksuwal nga kalipay

 Ang seksuwal nga relasyon gigahin sa Diyos alang lamang sa mga magtiayon, ingon sa gipakita sa Hebreohanon 13:4: “Himoa nga dungganon ang kaminyoon taliwala sa tanan, ug ang higdaanan sa kaminyoon nga dili mahugawan, kay hukman sa Diyos ang mga makihilawason ug ang mga mananapaw.” Ang mga magtiayon kinahanglang magmaunongon sa usag usa. Ilang makaplagan ang tumang kalipay, dili sa pagtagbaw sa ilang kaugalingon, kondili sa pagpadapat sa prinsipyo sa Bibliya: “Adunay labaw nga kalipay sa paghatag kay sa pagdawat.”—Buhat 20:35.