Wala. Walay gitakdang panahon kon kanus-a kita mamatay. Ang Bibliya wala magtudlog kapalaran. Hinuon kini nag-ingon nga ang kamatayon sagad maoy tungod sa “wala damhang panghitabo.”—Ecclesiastes 9:11.

Dili ba nag-ingon man ang Bibliya nga may “panahon sa pagkamatay”?

 Oo, ang Ecclesiastes 3:2 nag-ingon nga may “panahon sa pagkatawo ug panahon sa pagkamatay; may panahon sa pagtanom ug panahon sa pag-ibot.” (Ang Bag-ong Maayong Balita Biblia) Apan gipakita sa palibot nga mga teksto nga naghisgot lang kini sa normal nga mga siklo sa kinabuhi. (Ecclesiastes 3:1-8) Ang Diyos dili magtakdag panahon sa atong kamatayon sama nga dili niya but-an ang usa ka mag-uuma kon kanus-a magtanom. Hinunoa, ang punto dinhi nga likayan nato nga mapuliki pag-ayo sa inadlawng mga buluhaton ug makalimtan na ang atong Maglalalang.—Ecclesiastes 3:11; 12:1, 13.

Ang kinabuhi puwedeng motaas

 Bisag way kasegurohan ang kinabuhi, sagad mabuhi pa tag dugay kon husto ang atong mga desisyon. Ang Bibliya nag-ingon: “Ang mga pagtulon-an nga gikan sa mga maalamon tinubdan sa kinabuhi, ug makatabang kanimo pag-ikyas sa panahon nga mamiligro ang imong kinabuhi.” (Panultihon [Proverbio] 13:14, Maayong Balita Biblia) Sa susama, gisultihan ni Moises ang mga Israelitas nga ‘motaas ang ilang kinabuhi’ kon sundon nila ang mga sugo sa Diyos. (Deuteronomio 6:2, MBB) Sa kasukwahi, momubo ang atong kinabuhi kon kita mohimog daotan o binuang nga mga buhat.—Ecclesiastes 7:17.

 Bisan pag magmaalamon o mag-amping ta pag-ayo, dili gyod malikayan ang kamatayon. (Roma 5:12) Apan mausab ra kini nga kahimtang kay ang Bibliya nagsaad nga moabot ang panahon nga “ang kamatayon mawala na.”—Pinadayag 21:4.