Masuod ka sa Diyos pinaagi sa pagtuon bahin kaniya ug paghimo sa mga butang nga makapalipay niya. Kon buhaton nimo kana, ang Diyos moduol, o makigsuod, kanimo. (Santiago 4:8) Ang Bibliya nagpasalig nga “siya dili layo sa matag usa kanato.”​—Buhat 17:27.

•  Kon unsay buhaton aron masuod sa Diyos

•  Sayop nga mga ideya bahin sa pagpakigsuod sa Diyos

 Basaha ang Bibliya

•  Ang giingon sa Bibliya: “Ang tibuok Balaang Kasulatan gisulat pinaagi sa paggiya sa Diyos.”​—2 Timoteo 3:16.

•  Kahulogan: Ang Diyos mao ang Awtor sa Bibliya. Gibutang niya ang iyang hunahuna diha sa hunahuna sa mga magsusulat sa Bibliya. Pinaagi niining talagsaong basahon, gipadayag sa Diyos ang iyang kabubut-on para kanato. Gipadayag sab niya ang iyang mga hiyas, sama sa gugma, hustisya, ug kaluoy.​—Exodo 34:6; Deuteronomio 32:4.

•  Ang imong mahimo: Basaha ang Bibliya kada adlaw. (Josue 1:8) Pamalandonga ang imong nabasa, ug pangutan-a ang kaugalingon: ‘Unsay gitudlo niini kanako bahin sa Diyos ingong Persona?’​—Salmo 77:12.

   Ingong pananglitan, basaha ang Jeremias 29:11, ug dayon pangutan-a ang kaugalingon: ‘Unsay gusto sa Diyos para nako​—kalinaw o katalagman? Siya ba mapanimaslon nga Diyos, o gusto niya nga makabaton kog maayong kaugmaon?’

 Panid-i pag-ayo ang kalalangan

•  Ang giingon sa Bibliya: “Ang ... dili makitang mga hiyas [sa Diyos] ... tin-awng makita sukad sa paghimo sa kalibotan, tungod kay mailhan kini pinaagi sa mga butang nga gihimo.”​—Roma 1:20.

•  Kahulogan: Ang mga gilalang sa Diyos nagpadayag sa iyang mga hiyas, sama ra nga ang usa ka obra maestra daghag gipadayag bahin sa naghimo niini o ang usa ka komplikadong makina daghag gipadayag bahin sa nag-imbento niini. Sa pag-ilustrar, ang kapasidad ug pagkakomplikado sa utok sa tawo nagpadayag sa kaalam sa Diyos, ug ang kontroladong enerhiya sa adlaw ug sa ubang bituon nagpadayag sa iyang gahom.​—Salmo 104:24; Isaias 40:26.

•  Ang imong mahimo: Paggahin ug panahon sa pagpaniid ug pagkat-on bahin sa kalalangan. Samtang buhaton nimo kana, pangutan-a ang kaugalingon, ‘Unsay gipadayag sa katingalahang mga disenyo sa kalalangan bahin sa Diyos?’ a Siyempre, dunay daghang butang bahin sa atong Maglalalang nga dili ikapadayag sa kalalangan. Kanay hinungdan nga gihatag niya kanato ang Bibliya.

 Gamita ang ngalan sa Diyos

•  Ang giingon sa Bibliya: “Panalipdan nako siya kay nakaila siya sa akong ngalan. Motawag siya kanako, ug tubagon nako siya.”​—Salmo 91:14, 15.

•  Kahulogan: Ang Diyos, kansang ngalan mao si Jehova, naghatag ug espesyal nga pagtagad niadtong nahibalo sa iyang ngalan ug naggamit niini sa matinahorong paagi. b (Salmo 83:18; Malaquias 3:16) Pinaagi sa pagsulti sa iyang personal nga ngalan, gipaila sa Diyos ang iyang kaugalingon kanato. “Ako si Jehova. Kana ang akong ngalan,” siya miingon.​—Isaias 42:8.

•  Ang imong mahimo: Gamita ang ngalan ni Jehova dihang mag-estorya bahin kaniya.

 Pakig-estorya kang Jehova diha sa pag-ampo

•  Ang giingon sa Bibliya: “Si Jehova duol sa tanang nagatawag kaniya.”​—Salmo 145:18.

•  Kahulogan: Si Jehova makigsuod niadtong moampo kaniya nga may pagtuo. Ang pag-ampo maoy usa ka bahin sa pagsimba nga magpakita sa atong dakong pagtahod sa Diyos.

•  Ang imong mahimo: Pag-ampo kanunay sa Diyos. (1 Tesalonica 5:17) Isulti kaniya ang imong mga kabalaka ug gibati.​—Salmo 62:8. c

 Pagbaton ug pagtuo sa Diyos

•  Ang giingon sa Bibliya: “Kon walay pagtuo imposible nga mapalipay ang Diyos.”​—Hebreohanon 11:6.

•  Kahulogan: Aron masuod sa Diyos, kinahanglan tang magbaton ug pagtuo kaniya. Sa Bibliya, ang pagbaton ug pagtuo wala lang magpasabot nga nagtuo ta nga dunay Diyos. Nagpasabot sab nig bug-os nga pagsalig kaniya, apil na sa iyang mga saad ug mga sukdanan. Ang pagsalig importante kaayo sa usa ka maayong relasyon.

•  Ang imong mahimo: Ang tinuod nga pagtuo gibase sa kahibalo. (Roma 10:17) Busa tun-i ang Bibliya ug pamatud-i sa imong kaugalingon nga makasalig ka sa Diyos ug sa iyang mga tambag. Ang mga Saksi ni Jehova malipay nga magtuon sa Bibliya uban kanimo. d

 Himoa kon unsay makapalipay sa Diyos

•  Ang giingon sa Bibliya: “Kini ang kahulogan sa paghigugma sa Diyos, nga atong tumanon ang iyang mga sugo.”​—1 Juan 5:3.

•  Kahulogan: Si Jehova suod niadtong magpakitag gugma kaniya pinaagi sa pagpaningkamot nga tumanon ang iyang mga sugo.

•  Ang imong mahimo: Samtang magtuon ka sa Bibliya, matikdi kon unsay gusto ug dili gusto sa Diyos. Pangutan-a ang kaugalingon, ‘Unsang mga kausaban ang akong himoon aron mapalipay ang akong Maglalalang?’​—1 Tesalonica 4:1.

 Ipadapat ang tambag sa Diyos ug makita nimo nga siya nag-atiman kanimo

•  Ang giingon sa Bibliya: “Sulayi ug makita ninyo ang kaayo sa [Diyos]!”​—Salmo 34:8, Ang Bag-ong Maayong Balita Biblia.

•  Kahulogan: Ang Diyos nagdapit nga sulayan nimo mismo kon unsa siya ka maayo. Sa dihang maeksperyensiyahan nimo ang iyang gugma ug tabang, gusto nimong makigsuod kaniya.

•  Ang imong mahimo: Samtang magbasa ka sa Bibliya, ipadapat ang tambag sa Diyos aron imong maeksperyensiyahan ang mga kaayohan niini. (Isaias 48:17, 18) Matikdi sab ang ehemplo sa mga tawo kinsa, sa tabang sa Diyos, nakahimog mga kausaban, nakapauswag sa ilang kinabuhi ug nianang sa ilang pamilya, ug nakakaplag ug tinuod nga kalipay. e

 Sayop nga ideya: Dili ta puwedeng makigsuod sa Diyos kay siya usa ka misteryo.

 Ang tinuod: Dunay pipila ka butang bahin sa Diyos nga lisod sabton, sama sa iyang pagkadili-makita nga Espiritu. Bisan pa niana, puwede natong mailhan ang Diyos. Gani, ang Bibliya nag-ingon nga kinahanglan tang makaila niya aron makabaton ug kinabuhing walay kataposan. (Juan 17:3) Sa mga termino nga atong masabtan, ang Bibliya nagsulti kanato bahin sa atong Maglalalang​—sa iyang mga hiyas, katuyoan para sa katawhan ug sa yuta, ug mga sukdanan. (Isaias 45:18, 19; 1 Timoteo 2:4) Ug sa nahisgotan na, ang Bibliya nagpadayag sab sa ngalan sa Diyos. (Salmo 83:18) Busa, gawas nga puwede natong mailhan ang Diyos, puwede sab tang moduol o makigsuod kaniya.​—Santiago 4:8.