Oo, sa diwa nga bag-ohon niya ang iyang desisyon kon ang mga tawo usab magbag-o. Pananglitan, dihang ang Diyos nagpadalag mensahe sa paghukom sa karaang Israel, siya miingon: “Basin pag mopatalinghog sila ug biyaan nila ang daotan nilang pagkinabuhi. Kon buhaton nila kini, dili ko ipadayon pagpahamtang ang katalagman nga nahunahunaan kong buhaton kanila tungod sa ilang pagkadaotan.”—Jeremias 26:3, Ang Bag-ong Maayong Balita Biblia.

 Daghang Bibliya ang naghubad niini nga daw “basolan” sa Diyos ang katalagman nga iyang gihunahuna, nga puwedeng sabton nga nasayop siya sa iyang desisyon. Apan ang orihinal nga Hebreohanong pulong nagpasabot nga “pagbag-o sa hunahuna o intensiyon.” Usa ka eskolar ang misulat: “Kon ang tawo magbag-o sa iyang panggawi, bag-ohon sab sa Diyos ang iyang paghukom.”

 Siyempre, wala magpasabot nga tungod lang kay ang Diyos makabag-o sa iyang hunahuna, kinahanglan na gyod niyang bag-ohon kana. Tagda ang pipila ka kahimtang diin gisulti sa Bibliya nga ang Diyos wala magbag-o sa iyang hunahuna:

•   Wala tugoti sa Diyos si Balak nga maoy mobag-o sa Iyang hunahuna ug tunglohon ang nasod sa Israel.—Numeros 23:18-20.

•   Dihang si Haring Saul sa Israel nahimong daotan, wala bag-oha sa Diyos ang iyang hunahuna sa pagsalikway kaniya ingong hari.—1 Samuel 15:28, 29.

•   Tumanon sa Diyos ang iyang saad nga ang iyang Anak himoong saserdote sa walay kataposan. Dili bag-ohon sa Diyos ang Iyang hunahuna.—Salmo 110:4.

 Oo, girekord sa Bibliya ang gipamulong sa Diyos: “Ako si Jehova; ako dili mausab.” (Malaquias 3:6) Sa susama, giingon sa Bibliya nga ang Diyos “dili mausab sama sa landong nga magbalhinbalhin.” (Santiago 1:17, Ang Biblia New Cebuano Version) Apan, kini wala mosumpaki sa giingon sa Bibliya bahin sa pagbag-o sa Diyos sa iyang hunahuna. Ang Diyos dili gayod mausab sa diwa nga ang iyang personalidad ug sukdanan sa gugma ug hustisya dili mag-usab-usab. (Deuteronomio 32:4; 1 Juan 4:8) Pero puwede nga lainlaing instruksiyon ang iyang ihatag sa mga tawo sa lainlaing higayon. Pananglitan, magkalahi ang mga instruksiyon sa Diyos kang Haring David bahin sa pagpakig-away sa duha ka sunodsunod nga gubat, apan pareho kining nagmalamposon.—2 Samuel 5:18-25.

 Wala, pero siya naguol nga gibalewala o gisalikway siya sa kadaghanang tawo. Sa paghubit sa mga kahimtang sa wala pa ang tibuok kalibotang Lunop sa adlaw ni Noe, nag-ingon ang Bibliya: “Si Jehova nagbasol nga iyang gibuhat ang mga tawo sa yuta, ug siya nasakitan diha sa iyang kasingkasing.” (Genesis 6:6) Niini nga bersikulo, ang pulong “nagbasol” naggikan sa Hebreohanong pulong nga nagkahulogang “pagbag-o sa hunahuna.” Gibag-o sa Diyos ang iyang hunahuna bahin sa kadaghanang tawo nga nabuhi sa wala pa ang Lunop kay nahimo silang daotan. (Genesis 6:5, 11) Bisag naguol siya sa ilang pagpakadaotan, wala niya bag-oha ang iyang tinamdan sa tibuok tawhanong rasa. Gani, iyang gipreserbar ang katawhan gikan sa Lunop pinaagi kang Noe ug sa iyang pamilya.—Genesis 8:21; 2 Pedro 2:5, 9.