Si Jesus namatay aron mapasaylo ang atong mga sala ug mabuhi ta sa walay kataposan. (Roma 6:23; Efeso 1:7) Ang kamatayon ni Jesus nagpamatuod sab nga ang tawo makapabiling maunongon sa Diyos bisan pag makasinati ug grabeng mga pagsulay.​—Hebreohanon 4:15.

 Konsideraha kon unsay napaposible tungod sa kamatayon ni Jesus.

1.   Si Jesus namatay para sa “kapasayloan sa atong mga sala.”​—Colosas 1:14.

    Dihang gibuhat ang unang tawo nga si Adan, siya perpekto ug walay sala. Pero misupak siya sa Diyos. Ang iyang pagsupak, o sala, nakaapektar sa tanan niyang kaliwat. Ang Bibliya nag-ingon: “Pinaagi sa pagkadili-masinugtanon sa usa ka tawo daghan ang nahimong makasasala.”​—Roma 5:19.

    Si Jesus perpekto usab, pero wala siyay nahimong sala. Busa puwede siyang mahimong “halad pasig-uli alang sa atong mga sala.” (1 Juan 2:2) Tungod sa pagsupak ni Adan, ang tanang tawo nahimong makasasala. Pero pinaagi sa kamatayon ni Jesus, mapasaylo ang sala sa tanang magpakitag pagtuo kaniya.

    Sa ato pa, tungod kang Adan naulipon ta sa sala. Pero gilukat ta ni Jesus pinaagi sa kinabubut-ong paghalad sa iyang kinabuhi alang kanato. Busa ‘kon dunay makasala, kita dunay usa ka magtatabang ngadto sa Amahan,’ ug kana mao “si Jesu-Kristo, [ang] usa nga matarong.”​—1 Juan 2:1.

2.   Si Jesus namatay aron “ang tanan nga magpasundayag ug pagtuo kaniya dili malaglag kondili makabaton ug kinabuhing walay kataposan.”​—Juan 3:16.

    Gibuhat si Adan aron mabuhi sa walay kataposan. Pero tungod sa iyang sala, siya gisilotag kamatayon. Pinaagi kang Adan, “ang sala misulod sa kalibotan . . . ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.”​—Roma 5:12.

    Pero pinaagi sa kamatayon ni Jesus, napasaylo ang atong mga sala ug nahigawas sa silot nga kamatayon ang tanang magpakitag pagtuo kaniya. Ang Bibliya nag-ingon: “Ingon nga ang sala nagmando ingong hari uban sa kamatayon, sa ingon usab ang dili-takos nga kalulot magmando ingong hari pinaagi sa pagkamatarong alang sa kinabuhing walay kataposan pinaagi kang Jesu-Kristo nga atong Ginoo.”​—Roma 5:21.

    Sa pagkakaron, limitado gihapon ang gitas-on sa kinabuhi sa tawo. Pero nagsaad ang Diyos nga iyang hatagan ang matarong nga mga tawo ug kinabuhing walay kataposan. Iya pong buhion pag-usab ang mga patay aron makabenepisyo sab sila sa kinabuhi nga gisakripisyo ni Jesus.​—Salmo 37:29; 1 Corinto 15:22.

3.   Si Jesus “nagmasinugtanon hangtod sa kamatayon,” busa gipamatud-an niya nga ang tawo makapabiling matinumanon sa Diyos ilalom sa bisan unsang pagsulay.​—Filipos 2:8.

    Bisag perpekto ang hunahuna ug lawas ni Adan, misupak siya sa Diyos kay mahakogon niyang gitinguha ang usa ka butang nga dili iyaha. (Genesis 2:16, 17; 3:6) Sa ulahi, ang pangunang kaaway sa Diyos, si Satanas, nag-ingon nga ang mga tawo mosunod lang sa Diyos tungod sa mga kaayohan nga ilang madawat, pero kon makasinatig lisod nga mga kahimtang ilabina kon mabutang sa peligro ang ilang kinabuhi, dili na sila mosunod sa Diyos. (Job 2:4) Pero ang perpektong tawo nga si Jesus nagmasinugtanon ug nagpabiling maunongon sa Diyos, bisan pag nakasinati siyag makauulaw ug masakit nga kamatayon. (Hebreohanon 7:26) Kini nakahatag ug pamatuod nga ang tawo makapabiling matinumanon sa Diyos ilalom sa bisan unsang pagsulay.

Mga pangutana bahin sa kamatayon ni Jesus

•   Nganong kinahanglang mag-antos ug mamatay si Jesus aron matubos ang mga tawo? Nganong wala na lang kanselaha sa Diyos ang silot nga kamatayon?

   Ang balaod sa Diyos nag-ingon nga “ang suhol nga ginabayad sa sala mao ang kamatayon.” (Roma 6:23) Imbes isekreto ni kang Adan, giingnan siya sa Diyos nga kon mosupak siya, silotan siyag kamatayon. (Genesis 3:3) Dihang nakasala si Adan, ang Diyos “nga dili makabakak” mituman sa iyang giingon. (Tito 1:2) Gipasa ni Adan ngadto sa iyang mga kaliwat dili lang ang sala kondili ang silot sab niini​—ang kamatayon.

   Bisag ang makasasalang mga tawo takos sa silot nga kamatayon, gipakitaan sila sa Diyos sa iyang “dili-takos” nga kaayo. (Efeso 1:7) Ang iyang gihimo aron matubos ang mga tawo​—ang paghatag kang Jesus ingong perpektong halad—​nagpakita sa iyang hustisya ug dakong kaluoy.

•   Kanus-a namatay si Jesus?

   Si Jesus namatay sa “ikasiyam nga takna” gikan sa pagsubang sa adlaw, o mga alas tres sa hapon panahon sa Paskuwa sa mga Hudiyo. (Marcos 15:33-37) Kanang petsaha motunong sa Biyernes, Abril 1, 33 C.E., sumala sa modernong mga kalendaryo.

•   Asa namatay si Jesus?

   Si Jesus namatay didto sa “gitawag ug Dapit sa Kalabera, nga gitawag ug Golʹgo·tha sa Hebreohanon.” (Juan 19:17, 18) Ang lokasyon niini naa sa “gawas sa ganghaan” sa siyudad sa Jerusalem sa panahon ni Jesus. (Hebreohanon 13:12) Tingali naa kini sa bungtod, kay ang Bibliya nag-ingon nga may pipila nga naa sa “layolayo” nga nakakita sa pagpatay kang Jesus. (Marcos 15:40) Pero dili na maseguro kon asa gyod ang presenteng lokasyon sa Golgotha.

•   Sa unsang paagi namatay si Jesus?

   Daghan ang nagtuo nga si Jesus gilansang sa krus, pero ang Bibliya nag-ingon: “Siya mismo midala sa atong mga sala diha sa iyang lawas didto sa kahoy.” (1 Pedro 2:24, Ang Biblia, NCV) Ang mga magsusulat sa Bibliya naggamit ug duha ka Gregong pulong aron ipakita kon unsay gigamit sa pagpatay kang Jesus​—stau·rosʹ ug xyʹlon. Daghang eskolar ang miingon nga kini nga mga pulong nagtumong sa usa ka poste o estaka nga kahoy.

•   Sa unsang paagi angayng handomon ang kamatayon ni Jesus?

   Sa gabii sa tinuig nga Paskuwa sa mga Hudiyo, gisugdan ni Jesus ang simpleng seremonyas kauban ang iyang mga sumusunod ug gisugo sila: “Ipadayon ninyo ang pagbuhat niini sa paghandom kanako.” (1 Corinto 11:24) Paglabayg pipila ka oras, gipatay si Jesus.

   Gipakasama sa mga magsusulat sa Bibliya si Jesus ingong karnero nga ginahalad sa adlaw sa Paskuwa. (1 Corinto 5:7) Ingon nga ang Paskuwa nagpahinumdom sa mga Israelitas nga sila napahigawas sa pagkaulipon, ang Memoryal sa kamatayon ni Jesu-Kristo nagpahinumdom sa mga Kristohanon nga sila napahigawas na sa sala ug kamatayon. Ang Paskuwa nga ginahimo kada Nisan 14 sumala sa lunar nga kalendaryo gisaulog kausa matag tuig; ang unang mga Kristohanon sab nagsaulog sa Memoryal kausa matag tuig.

   Kada tuig, sa petsa nga motumbas sa Nisan 14, milyonmilyong tawo sa tibuok kalibotan ang maghandom sa kamatayon ni Jesus.