Ang Paskuwa mao ang selebrasyon sa mga Hudiyo tungod sa pagpagawas sa Diyos sa mga Israelinhon gikan sa pagkaulipon sa Ehipto niadtong 1513 B.C.E. Gisugo sa Diyos ang mga Israelinhon nga saulogon ang maong importanteng panghitabo kada tuig, sa ika-14 nga adlaw sa Hudiyohanong bulan sa Abib, nga sa ulahi gitawag ug Nisan.​—Exodo 12:42; Levitico 23:5.

Nganong gitawag kinig Paskuwa?

 Ang pulong “Paskuwa” naggikan sa Hebreohanong pulong nga nagkahulogang “sayloan.” Nagtumong kini sa panahon diin wala maapil ang mga Israelinhon sa gipahinabo sa Diyos nga silot nga nagpatay sa tanang panganay sa Ehipto. (Exodo 12:27; 13:15) Sa wala pa ipahamtang sa Diyos ang maong silot, iyang gisugo ang mga Israelinhon nga mag-ihaw ug nating karnero o kanding ug dayon ipahid ang dugo niini diha sa pultahan. (Exodo 12:21, 22) Makita sa Diyos ang maong ilhanan ug “sayloan” ang ilang balay ug dili mamatay ang ilang panganay.​—Exodo 12:7, 13.

Giunsa pagsaulog ang Paskuwa sa panahon sa Bibliya?

 Ang Diyos naghatag ug mga instruksiyon sa mga Israelinhon kon unsaon pagsaulog ang unang Paskuwa. a Ang pipila ka detalye sa Paskuwa nga gihisgotan sa Bibliya naglakip sa mosunod.

•   Halad: Sa ika-10 nga adlaw sa Abib (Nisan), ang mga pamilya magpilig karnero (o kanding) nga usa ka tuig ang kagulangon ug ihawon kini sa ika-14 nga adlaw. Niadtong unang Paskuwa, ang dugo gipahid diha sa mga haligi sa pultahan ug sa ibabaw niini. Ilang asalon ang hayop ug dayon kaonon kini.​—Exodo 12:3-9.

•   Pagkaon: Gawas sa inasal nga karnero (o kanding), ang mga Israelinhon mokaog tinapay nga walay pangpatubo ug pait nga mga utanon panahon sa Paskuwa.​—Exodo 12:8.

•   Kapistahan: Ang mga Israelinhon nagsaulog sa Pista sa mga Tinapay nga Walay Igpapatubo pito ka adlaw human sa Paskuwa, ug nianang panahona dili sila mokaon ug tinapay nga may pangpatubo.​—Exodo 12:17-20; 2 Cronicas 30:21.

•   Edukasyon: Pahimuslan sa mga ginikanan ang panahon sa Paskuwa sa pagtudlo sa ilang mga anak bahin kang Jehova nga Diyos.​—Exodo 12:25-27.

•   Pagbiyahe: Sa ulahing mga pagsaulog, ang mga Israelinhon moadto sa Jerusalem aron saulogon ang Paskuwa.​—Deuteronomio 16:5-7; Lucas 2:41.

•   Ubang mga kostumbre: Sa panahon ni Jesus, naa nay bino ug pag-awit dihang magsaulog ug Paskuwa.​—Mateo 26:19, 30; Lucas 22:15-18.

Sayop nga mga pagsabot bahin sa Paskuwa

 Sayop nga pagsabot: Ang mga Kristohanon kinahanglang magsaulog sa Paskuwa.

 Ang tinuod: Human sauloga ni Jesus ang Paskuwa sa Nisan 14, 33 C.E., gisugdan niya ang usa ka bag-ong pagsaulog: ang Panihapon sa Ginoo. (Lucas 22:19, 20; 1 Corinto 11:20) Kini nga panihapon maoy mipuli sa Paskuwa, kay kini maghandom sa halad sa “Kristo [ang] inihaw sa paskuwa.” (1 Corinto 5:7) Ang halad lukat ni Jesus mas labaw kay sa halad sa Paskuwa kay kini nagpahigawas sa tanang tawo gikan sa pagkaulipon sa sala ug kamatayon.​—Mateo 20:28; Hebreohanon 9:15.