Unsay Hitsura ni Jesus?

I-PLAY

Tubag sa Bibliya

Way nahibalo kon unsa gyoy hitsura ni Jesus, kay wala hisgoti sa Bibliya ang iyang pisikal nga panagway. Nagpakita ni nga dili importante kon unsay iyang panagway. Pero, ang Bibliya naghatag nato ug gamayng ideya bahin sa panagway ni Jesus.

Hitsura: Si Jesus usa ka Hudiyo ug lagmit napanunod niya ang komon nga Semihanong panagway gikan sa iyang inahan. (Hebreohanon 7:14) Lagmit dili kaayo lahi sa uban ang iyang hitsura. Sa usa ka higayon niana, sekreto siyang nakabiyahe gikan sa Galilea paingon sa Jerusalem nga wala mamatikdi. (Juan 7:10, 11) Ug dayag nga kaamgid ra siyag hitsura bisan sa iyang kinasuorang mga tinun-an. Hinumdomi nga kinahanglang ipaila ni Judas Iskariote si Jesus ngadto sa armadong panon nga nagdakop kaniya.—Mateo 26:47-49.
Gitas-on sa buhok: Lagmit dili taas ug buhok si Jesus kay ang Bibliya nag-ingon nga “kon ang lalaki taas ug buhok, kaulawan kini kaniya.”—1 Corinto 11:14.
Bungot: Si Jesus bungoton. Iyang gisunod ang Hudiyohanong balaod, nga nagdili sa hamtong nga mga lalaki sa ‘pagdaot sa tumoy sa ilang mga bungot.’ (Levitico 19:27; Galacia 4:4) Dugang pa, ang Bibliya naghisgot sa bungot ni Jesus diha sa tagna bahin sa iyang pag-antos.—Isaias 50:6.
Lawas: Dayag nga si Jesus himsog ug lawas. Panahon sa iyang ministeryo, gatosan ka kilometros ang iyang gibiyahe. (Mateo 9:35) Kaduha niya hinloi ang templo sa mga Hudiyo, nga gipanglintuwad ang mga lamesa sa mga tig-ilis ug kuwarta. Ug kas-a giabog niya ang mga hayop pagawas gamit ang latigo. (Lucas 19:45, 46; Juan 2:14, 15) Ang McClintock and Strong’s Cyclopedia nag-ingon: “Ang tibuok asoy sa ebanghelyo nagpaila [nga si Jesus] himsog ug panglawas.”—Tomo IV, panid 884.
Ekspresyon sa nawong: Si Jesus mahigalaon ug mabination, ug walay duhaduha nga makita ni sa ekspresyon sa iyang nawong. (Mateo 11:28, 29) Ang tanang matang sa tawo nangita kaniya aron sila mahupayan ug matabangan. (Lucas 5:12, 13; 7:37, 38) Bisan ang mga bata komportableng makig-uban niya.—Mateo 19:13-15; Marcos 9:35-37.

Sayop nga mga ideya bahin sa panagway ni Jesus

Sayop nga ideya: Ang pipila nag-ingon nga si Jesus lagmit African ug kagikan kay ang basahon sa Pinadayag nag-ingon nga ang iyang buhok samag balhibo sa karnero ug ang iyang tiil samag “naggilakgilak nga tumbaga.”—Rebelasyon 1:14, 15, Biblia sa Kristohanong Katilingban.

Ang tinuod: Ang basahon sa Pinadayag gipresentar “pinaagig mga ilhanan.” (Pinadayag 1:1) Ang deskripsiyon bahin sa buhok ug tiil ni Jesus naggamit ug simbolikong pinulongan sa pag-ilustrar sa mga hiyas ni Jesus human sa iyang pagkabanhaw, dili sa paghubit sa iyang pisikal nga panagway dihang dinhi siya sa yuta. Sa pag-ingon nga ang “ulo ug buhok [ni Jesus] sama ka puti sa puting balhibo sa karnero, samag niyebe,” ang Pinadayag 1:14 nagtandi sa kolor, dili sa grano sa buhok. Nagrepresentar ni sa iyang kaalam tungod sa iyang pangedaron. (Pinadayag 3:14) Kining tekstoha wala magtandi sa grano sa buhok ni Jesus ngadto sa balhibo sa karnero, sama ra nga wala kini magtandi sa grano sa iyang buhok ngadto sa niyebe.

Ang tiil ni Jesus “nagsidlak samag purong tumbaga nga gitunaw diha sa hudno.” (Pinadayag 1:15) Dugang pa, ang iyang nawong “sama sa adlaw nga nagsidlak sa udtong tutok.” (Pinadayag 1:16) Kay wala may rasa nga dunay kolor sa panit nga sama niana, dayag nga simboliko ang maong panan-awon, nga nagpakita sa binanhawng si Jesus ingong usa nga “nagpuyo sa dili maduol nga kahayag.”—1 Timoteo 6:16.

Sayop nga ideya: Si Jesus huyang ug luya.

Ang tinuod: Makita sa panggawi ni Jesus nga siya tinuod nga lalaki. Pananglitan, way kahadlok niyang gipaila ang kaugalingon ngadto sa armadong panon nga nagdakop niya. (Juan 18:4-8) Segurado pong kusgan si Jesus kay dugaydugay siyang nagtrabaho ingong panday gamit ang demano nga mga himan.—Marcos 6:3.

Nan, nganong nagkinahanglan man siyag tabang sa pagpas-an sa iyang estaka sa pagsakit? Ug nganong una siyang namatay kay sa uban nga gilansang tupad niya? (Lucas 23:26; Juan 19:31-33) Sa wala pa mamatay si Jesus, naluya na siya pag-ayo. Tibuok gabii siyang walay tulog, sa bahin, tungod sa grabeng kasakit. (Lucas 22:42-44) Nianang gabhiona, gimaltratar siya sa mga Hudiyo, ug pagkabuntag gisakit siya sa mga Romano. (Mateo 26:67, 68; Juan 19:1-3) Lagmit nga tungod niana, mas napadali ang iyang kamatayon.

Sayop nga ideya: Si Jesus kanunayng masulub-og dagway.

Ang tinuod: Si Jesus hingpit nga nagsundog sa mga hiyas sa iyang langitnong Amahan, si Jehova, kinsa gihubit sa Bibliya ingong “malipayong Diyos.” (1 Timoteo 1:11; Juan 14:9) Gani, gitudloan ni Jesus ang uban kon sa unsang paagi magmalipayon. (Mateo 5:3-9; Lucas 11:28) Nagpakita ni nga si Jesus sagad malipayon ug panagway.