“Pasidunggi ang imong amahan ug ang imong inahan, aron mabuhi kag dugay sa yuta nga ihatag kanimo ni Jehova nga imong Diyos.”​—Exodo 20:12, Bag-ong Kalibotang Hubad.

 “Tahora ang inyong amahan ug inahan aron motaas ang inyong kinabuhi diha sa yuta nga gihatag kaninyo sa Ginoo nga inyong Dios.”​—Exodo 20:12, Maayong Balita Biblia.

 Gisugo sa Diyos ang mga Israelinhon sa karaang panahon nga tahoron, o pasidunggan, ang ilang mga ginikanan. Dayon gisundan kini ug usa ka saad, nga naghatag nilag dugang rason nga sundon ang sugo. Bisag dili ta ilalom sa Moisesnong Balaod, ang Balaod sa Diyos para sa mga Israelinhon, ang iyang mga sukdanan wala mausab. Ang mga prinsipyo sa Balaod sa Diyos mapadapat gihapon karon, maong importante kini sa mga Kristohanon.​—Colosas 3:20.

 Ang mga anak—bata man o edaran—makapasidungog sa ilang ginikanan dihang ilang tahoron ug sundon sila. (Levitico 19:3; Proverbio 1:8) Bisag managko na ang mga anak ug naa nay kaugalingong pamilya, mahalon ug tabangan gihapon nila ang ilang mga ginikanan. Pananglitan, paneguroon nila nga maatiman pag-ayo ang ilang tigulang na nga mga ginikanan, ug tagan-an silag pinansiyal nga tabang kon gikinahanglan.—Mateo 15:4-6; 1 Timoteo 5:4, 8.

 Matikdi nga ang Israelinhong mga anak angayng magpasidungog sa ilang amahan ug inahan, nga nagpakita nga importante ang papel sa inahan diha sa pamilya. (Proverbio 6:20; 19:26) Kini pod ang angayng himoon sa mga anak karon.

 Ang sugo nga pasidunggan ang mga ginikanan dunay limitasyon. Kon dunay ipabuhat ang Israelinhong mga ginikanan, o bisan kinsang tawo, nga supak sa sugo sa Diyos, dili kana angayng sundon sa mga anak. (Deuteronomio 13:6-8) Sa samang paagi, ang mga Kristohanon karon kinahanglang ‘magmasinugtanon sa Diyos ingong magmamando imbes sa mga tawo.’​—Buhat 5:29.

 Sa Balaod nga gihatag sa Diyos para sa Israel, siya nagsaad nga ang mga anak nga nagpasidungog sa ilang ginikanan ‘mabuhig dugay ug mouswag’ sa yuta nga gihatag sa Diyos kanila. (Deuteronomio 5:16) Ang mga anak nga nagpasidungog sa ilang ginikanan dili makaagom sa silot para sa dagko na nga mga anak nga nagbalewala sa sugo sa Diyos ug mirebelde sa ilang ginikanan. (Deuteronomio 21:18-21) Hangtod karon, wala mausab ang mga prinsipyo sa maong mga balaod. (Efeso 6:1-3) Bata man o tigulang, kitang tanan manubag sa Diyos nga nagbuhat kanato. Ug sumala sa iyang saad, ang mga anak nga masinugtanon kaniya ug sa ilang ginikanan makabaton ug taas nga kinabuhi. Gani, duna silay paglaom nga mabuhi sa walay kataposan.​—1 Timoteo 4:8; 6:18, 19.

 Makapainteres nga ang sugo sa Exodo 20:12 gilista ingong ikalima sa Napulo ka Sugo. (Exodo 20:1-17) Ang nag-una niini nga mga sugo nagpakita sa obligasyon sa mga Israelinhon ngadto sa Diyos, sama sa ilang pagsimba lamang kaniya. Ang mga sugo human niini nagpakita sa ilang obligasyon sa isigkatawo, apil ang sugo nga magmaunongon sa kapikas ug dili mangawat. Busa ang sugo nga “tahora [o, pasidunggi] ang inyong amahan ug inahan” nagsilbing tulay tali sa duha ka grupo sa mga kinahanglanon nga angay natong sundon.