“Iyang pahiran ang matag luha sa ilang mga mata, ug ang kamatayon mawala na, ug wala na unyay pagbangotan, pagtiyabaw, ug kasakit. Ang unang mga butang nangagi na.”—Pinadayag 21:4, Bag-ong Kalibotang Hubad.

 “Pahiran niya ang ilang luha ug wala nay kamatayon o kasubo, paghilak o kasakit kay nahanaw na man ang daang mga butang.”—Gipadayag (Pinadayag) 21:4, Maayong Balita Biblia.

 Ang Diyos wala lang basta magsaad nga wad-on ang kasakit ug pag-antos sa mga tawo. Wad-on pod niya ang pinakahinungdan niini nga mga problema.

 “Iyang pahiran ang matag luha sa ilang mga mata.” Kining mga pulonga nagpasiugda sa saad ni Jehova a nga gisulat ni propetang Isaias nga Iyang “pahiran . . . ang mga luha gikan sa tanang nawong.” (Isaias 25:8; Pinadayag 7:17) Kini nagpakita sa kaluoy sa Diyos sa tanan nga mihilak tungod kay namatyag minahal o nag-antos.

 “Ang kamatayon mawala na.” Kini nga ekspresyon puwede sab hubaron nga “ang kamatayon dili na maglungtad” o “wala nay mamatay.” Nagsaad ang Diyos nga iyang wad-on ang kamatayon ug ang pag-antos nga gipahinabo niini sa tawo. Nagsaad pod siya nga banhawon ang mga patay. (1 Corinto 15:21, 22) Busa, ang kamatayon “pagawagtangon.”—1 Corinto 15:26.

 “Wala na unyay pagbangotan, pagtiyabaw, ug kasakit.” Wala ni magpasabot nga ang mga tawo dili na mobatig kasakit, apil ang pisikal nga kasakit nga mopasidaan nato kon naay kapeligrohan o makadaot nato. Hinuon, gipakita niini nga saad nga mawala na ang tanang mental, emosyonal, ug pisikal nga kasakit nga resulta sa sala b ug pagkadili-hingpit.—Roma 8:21, 22.

 “Ang unang mga butang nangagi na.” Kining hinapos nga mga pulong nagsumaryo sa dagkong mga kausaban nga maeksperyensiyahan sa mga tawo. Usa ka reperensiya miingon: “Ang naandan nga kinabuhi sa mga tawo, diin ang kamatayon, pagtiyabaw, paghilak, ug kasakit dili malikayan, mapulihan ug bag-ong paagi sa kinabuhi.” Ang mga tawo malipayong mabuhi sa yuta hangtod sa hangtod ubos sa maayong mga kahimtang, nga maoy orihinal nga katuyoan sa Diyos.—Genesis 1:27, 28.

 Sa sinugdan sa kapitulo 21, gisulti ni apostol Juan ang iyang nakita sa panan-awon: “Nakakita kog bag-ong langit ug bag-ong yuta.” (Pinadayag 21:1) Migamit siyag mga pulong nga naghulagway sa usa ka bug-os nga kausaban, nga gitagna sab sa ubang teksto sa Bibliya. (Isaias 65:17; 66:22; 2 Pedro 3:13) Pulihan sa langitnong gobyerno sa Diyos, o “bag-ong langit,” ang tanang gobyerno sa tawo ug mandoan niini ang “bag-ong yuta,” nga mao ang bag-ong katilingban sa katawhan nga magpuyo sa yuta.—Isaias 65:21-23.

 Giunsa nato pagkahibalo nga ang panan-awon nagtumong sa kinabuhi dinhi sa yuta? Una, ang saad sa Diyos gisugdan niining mga pulonga: “Ang tolda sa Diyos anaa uban sa mga tawo.” (Pinadayag 21:3) Busa kini nga saad gihatag para sa mga tawo sa yuta, dili sa mga anghel sa langit. Ikaduha, gipakita sa panan-awon ang usa ka kalibotan diin “ang kamatayon mawala na.” (Pinadayag 21:4) Walay kamatayon didto sa langit; ang mga tawo lang dinhi sa yuta ang nakasinatig kamatayon. (Roma 5:14) Busa, makataronganon lang nga mohinapos nga kini nga teksto nagtumong sa kahimtang sa yuta sa umaabot.

 Tan-awa kining mubo nga video nga nagsumaryo sa basahon sa Pinadayag.