Ang ubang tin-edyer dili motunong sa oras nga giingon sa ilang ginikanan nga angay silang mouli. Ilaron sa uban ang ilang ginikanan, lagmit pinaagi sa pagpamakak kanila o sa pag-ikyas sa balay aron makauban ang mga higala. Unsay imong himoon kon gidaot sa imong anak nga tin-edyer ang imong pagsalig kaniya?

•  Ang ako bang anak rebelyoso?

•  Unsay akong himoon kon ginailad ko sa akong anak?

•  Kinsay angayng basolon?

•  Unsaon nako pagtabang ang akong anak aron mabalik ang akong pagsalig kaniya?

•  Ang giingon sa mga ginikanan

 Basin dili ra. Ang Bibliya nag-ingon: “Ang binuang nabugkos sa kasingkasing sa batan-on,” ug sagad mapamatud-an sa mga tin-edyer nga tinuod kana. (Proverbio 22:15, footnote) “Ang mga batan-on mohimog mga desisyon nga dinalidali ug dili maalamon,” misulat si Dr. Laurence Steinberg. “Dahoma nga masayop sila.” a

 Ayaw paghunahuna nga tuyo sa imong anak nga supakon ka. Gipakita sa research nga ang mga batan-on nagkonsiderar sa kon unsay hunahuna sa ilang ginikanan kanila, bisag dili kini makita sa ilang mga aksiyon. Tingali dili kini ipakita sa imong anak, pero lagmit dismayado siya sa iyang kaugalingon—ug naguol kay napakyas ka niya.

•    Ang iya bang kahimtang ug gipakig-ubanan? Ang Bibliya nag-ingon: “Ang daotang pakig-uban makadaot sa mapuslanong pamatasan.” (1 Corinto 15:33) Dako gyod ug impluwensiya sa mga tin-edyer ang ilang mga higala. Makaimpluwensiya pod nila ang social media ug advertisement. Gawas pa niana, ang mga tin-edyer kulang ug eksperyensiya sa kinabuhi, mao nga makahimo sila ug sayop nga mga desisyon. Siyempre, kinahanglang makat-onan nila nga responsibilidad nila ang resulta sa ilang mga desisyon aron mahimo silang responsable nga adulto.

•    Unsay akong nahimo? Basig naghunahuna ka nga estrikto ra kaayo ka mao nga nagpabadlong ang imong anak. O basig naghunahuna ka nga buotan ra kaayo ka mao nga sobra rag kagawasan ang imong anak. Imbes magpokus sa kon unsay imong nahimo nga nakadugang sa problema, hunahunaa kon unsay imong mahimo sa pagsulbad sa problema.

•   Kontrolaha ang imong reaksiyon. Lagmit gidahom sa imong anak nga masuko ka. Pero unsa kaha kon lahi ang imong himoon? Pakig-estorya niya sa kalmadong paagi kon nganong gihimo niya ang iyang gihimo. Tungod ba kay nainteres siya? Gilaay? Nagmingaw? Gusto kaayong makabaton ug higala? Walay usa niini ang magpakamatarong sa iyang nahimo, pero makatabang ni nimo—ug sa imong anak—nga mas masabtan kon nganong nahimo to niya.

   Prinsipyo sa Bibliya: “Ang matag usa kinahanglang abtik sa pagpaminaw, hinay sa pagsulti, dili daling masuko.”—Santiago 1:19.

•   Tabangi ang imong anak nga makakat-on sa nahitabo. Isukna ang mga pangutana nga sama sa, Unsay imong nakat-onan ani nga hitabo? Unsa na may imong himoon sa sunod nga makaatubang na pod kag ingon niini nga situwasyon? Ang maong mga pangutana makatabang sa imong anak nga makakat-on kon unsaon paghimog maayong mga desisyon.

   Prinsipyo sa Bibliya: “Pamadlong, panul-id, panambag, uban ang dakong pailob ug maayong paagi sa pagpanudlo.”—2 Timoteo 4:2.

•   Tabangi ang imong anak nga masabtang ang iyang mga aksiyon dunay sangpotanan. Mahimo ni pinaagi sa paghatag kaniyag mga restriksiyon nga konektado sa iyang nahimo nga sayop. Pananglitan, kon gidaot sa imong anak ang imong pagsalig kay gigamit niya ang imong sakyanan nga walay pananghid, puwede nimong limitahan sa rasonableng gidugayon kon kapila o kanus-a niya puwedeng gamiton ang sakyanan.

   Prinsipyo sa Bibliya: “Kon unsay gipugas sa usa ka tawo, mao pod ang iyang anihon.”—Galacia 6:7.

•   Pagpokus sa kon unsaon nga mabalik ang pagsalig. Tinuod, nagkinahanglan nig panahon. Pero kinahanglang mahibaloan sa imong anak nga paglabay sa panahon, ang nadaot nga pagsalig puwedeng mabalik. Seguroa nga dili siya mawad-ag paglaom. Kon mobati ang imong anak nga dili na gyod niya mabalik ang imong pagsalig, basig dili na siya maningkamot.

   Prinsipyo sa Bibliya: “Ayaw palagota ang inyong mga anak, aron dili sila maluya.”—Colosas 3:21.