Tungod sa managlahing interes, batasan, ug kinaiya, mahimong malisdan na daan ang mga magtiayon. Pero may mga isyu nga mas lisod atubangon, sama sa mosunod:

•   Kon unsa ka daghang panahon ang igugol uban sa mga pamilya

•   Kon unsaon pagbadyet ang kuwarta

•   Kon manganak ba

 Unsay imong mahimo kon lahi kag opinyon sa imong kapikas?

•  Ang angay nimong mahibaloan

•  Ang imong mahimo

 Ang pagkahimong bagay sa usag usa wala magpasabot nga parehas mog opinyon. Bisan ang magtiayon nga bagay kaayo dili pirmeng parehas ug opinyon, bisan sa importanteng mga isyu.

 “Nagdako ko sa suod kaayo nga pamilya. Matag Sabado o Dominggo, makauban namo ang among mga apohan, tiyo, tiya, ug mga ig-agaw. Pero dili ingon ana ang pamilya sa akong bana. Busa lainlain mig opinyon kon unsa ka daghang panahon ang among igugol sa among pamilya o sa pagpakig-estorya sa mga paryente nga tua sa layo.”​—Tamara.

 “Tungod sa lainlaing pagpadako kanamo, kami sa akong asawa dili parehas ug opinyon kon unsaon paggasto ang kuwarta. Sa unang mga bulan sa among kaminyoon, may mga higayon nga maglalis mi bahin ana. Kadaghan namo nâ estoryahi una masulbad ang problema.”​—Tyler.

 May mga problemang dili masulbad pinaagig pag-uyon lang. Pananglitan, komosta kon ang ugangan masakit ug kinahanglang atimanon? O komosta kon ang usa ka kapikas gustog anak pero ang lain dili gusto? a

 “May mga higayon nga dugay namong estoryahan sa akong asawa ang bahin sa pagbaton ug mga anak. Sige siyag hunahuna bahin ana, ug nag-anam ka lahi ang among opinyon. Morag dili na gyod mi magkauyon.”​—Alex.

 Molampos gihapon ang inyong kaminyoon bisag managlahi ang inyong opinyon. Ang pipila ka eksperto nag-ingon nga kon dili mo magkauyon sa imong kapikas bahin sa usa ka importanteng isyu, kinahanglang buhaton nimo ang tanan para makuha ang imong gusto—bisag nagpasabot pa kana nga bulagan nimo ang imong kapikas. Pero kon sundon nâ nimo nga “solusyon,” mas gihatagan nimog importansiya ang imong pagbati imbes ang imong panumpa sa Diyos nga mounong sa imong kapikas, bisag unsay mahitabo.

 Magmadeterminado nga tumanon ang imong panumpa sa kaminyoon. Makatabang nâ nga masulbad ninyo ang isyu ingong team.

 Prinsipyo sa Bibliya: “Kon unsay gihiusa sa Diyos dili angayng bulagon sa tawo.”​—Mateo 19:6.

 Kuwentaha ang gasto. Ibutang ta nga gusto sa usa ka kapikas nga makabatog anak, pero ang lain dili. Dunay pipila ka butang nga angayng konsiderahon, apil ang mosunod:

•   Ang kalig-on sa inyong kaminyoon.

   Kaya ba ninyo ang dugang stress sa pagpadako ug anak?

•   Ang responsibilidad ingong ginikanan.

   Dili lang ang pagtaganag pagkaon, sinina, ug puy-anan ang inyong responsibilidad.

•   Inyong pinansiyal nga kahimtang.

   Mabalanse ba ninyo ang trabaho, pamilya, ug ubang obligasyon?

 Prinsipyo sa Bibliya: “Kinsa kaninyo nga buot magtukod ug torre ang dili una molingkod ug kuwentahon ang gasto?”—Lucas 14:28.

 Konsideraha ang tanang anggulo. Posible nga masulbad ninyo ang pipila ka isyu. Pananglitan, kon ang isyu maoy bahin sa pagbaton ug anak, ang kapikas nga nagduhaduha mahimong mangutana sa kaugalingon:

•   ‘Dihang moingon ko nga dili ko gustog anak, ang ako bang gipasabot nga dili gyod o dili lang usa karon?’

•   ‘Nagduhaduha ba ko kay basig dili ko mahimong maayong ginikanan?’

•   ‘Nahadlok ba ko nga basig balewalaon na lang ko sa akong kapikas?’

 Sa laing bahin, mahimong konsiderahon sa kapikas nga gustog anak ang mga pangutana sama sa:

•   ‘Andam na ba mi sa mga responsibilidad sa pagkahimong ginikanan?’

•   ‘Kaya ba sa among kita nga magpadakog anak?’

 Prinsipyo sa Bibliya: “Ang kaalam nga gikan sa langit . . . makataronganon.”​—Santiago 3:17.

 Konsideraha ang mga bentaha sa opinyon sa imong kapikas. Ang duha ka tawo mahimong magtan-aw sa mao rang talan-awon pero lainlain silag panglantaw niana. Sa susama, ang magtiayon mahimong magtan-aw sa usa ra ka isyu pero lainlain silag opinyon niana—pananglitan, kon unsaon paggasto ang kuwarta. Sa dili pa mo maghisgot sa mga situwasyon nga dili mo parehas ug panglantaw, hisgoti una ninyo ang mga butang nga inyong gikauyonan.

•   Sa unsang mga tumong nga magkauyon mo?

•   Unsay bentaha sa opinyon sa matag usa?

•   Aron magpabiling lig-on ang inyong kaminyoon, puwede ba nga ang usa o kamong duha mag-adyas aron makonsiderar ang opinyon sa usa?

 Prinsipyo sa Bibliya: “Ang matag usa padayong magtinguha, dili sa iyang kaugalingong kaayohan, kondili nianang sa laing tawo.”—1 Corinto 10:24.