Dugay nang nakita sa mga doktor nga gikinahanglan ang medikal nga mga adhesive, o papilit, nga makatabang sa pag-opera ug pagpaayo sa samad. Ang daghang glue nga ginagamit karon dili puwedeng gamiton sulod sa lawas. Kini makahilo, mogahi dihang mauga, ug dili mopilit sa basa nga mga tissue. Pinaagi sa pagtuon sa danlog nga papilit sa hilahila, a ang mga siyentista nakakitag paagi sa pagsulbad niini nga mga problema.

 Hunahunaa: Dihang bation sa hilahila nga nameligro kini, magpagawas kinig danlog nga substansiya nga magpatapot niini sa basa nga dahon. Ang maong paagi sa pagdepensa maghatag ug proteksiyon sa hilahila, ug sa samang higayon makalihoklihok gihapon ni.

 Gitun-an sa mga researcher ang maong danlog nga substansiya ug nakita nila ang pipila ka rason kon nganong epektibo kini ingong natural nga papilit. Pananglitan, ang danlog nga substansiya motapot pinaagig chemical bonding ug electrostatic attraction. Kini motuhop sa gitaptan sa hilahila ug mabirabira kon dunay presyur. Pinaagi sa pagsundog sa danlog nga substansiya sa hilahila, ang mga researcher nakaimbento ug papilit nga mas kusog motapot kay sa medikal nga mga adhesive nga ginagamit karon ug makahimo sa pagtapot sa buhi nga organ. Kini motapot “pag-ayo sa mga organ sama sa pagkatapot sa cartilage sa bukog.”

 Ang mga eksperto nagtuo nga kini nga papilit puwedeng mahimong bahin sa mga galamiton sa mga doktor sa pag-opera, mao nga dili na kinahanglang tahion ang samad ug gamitag medical staple. Puwede ning gamiton sa pag-ayo sa cartilage o sa pagtaod ug medical device sa eksaktong lokasyon diha sa lawas. Napamatud-an sa mga test nga ang papilit epektibo sa pagtapal sa buho diha sa kasingkasing sa baboy ug sa mga buho diha sa mga atay sa ilaga.

 Sagad makita sa mga siyentista ang pinakamaayong mga solusyon sa komon nga mga problema pinaagi sa pagtuon sa kinaiyahan. “Kinahanglan lang tang mahibalo kon asa mangitag ideya ug mailhan nga maayo ang usa ka ideya,” miingon si Donald Ingber, direktor sa institusyon nga nag-imbentog artipisyal nga mga papilit.

 Unsay imong hunahuna? Ang danlog ba nga papilit sa hilahila mitungha pinaagig ebolusyon? O kini ba gidisenyo?