Ikatulong Juan 1:1-14
1 Gikan sa tigulang nga lalaki* ngadto kang minahal nga Gayo, nga gihigugma nako pag-ayo.
2 Minahal nga igsoon, nag-ampo ko nga sa tanang butang ikaw padayong mouswag ug makabatog maayong panglawas, parehas karon.
3 Kay nalipay ko pag-ayo dihang ang mga igsoon miabot ug nagpamatuod nga matinumanon ka sa kamatuoran, samtang padayon kang naglakaw sa kamatuoran.+
4 Wala nay mas makapalipay nako* kay niini: nga akong madungog nga ang akong mga anak padayong naglakaw sa kamatuoran.+
5 Minahal nga igsoon, ang imong ginahimo para sa mga igsoon, bisag wala nimo sila mailhi,+ nagpakita nga matinumanon ka.
6 Ilang gisulti sa kongregasyon ang imong gugma. Inigbiya nila, palihog tabangi sila sa paagi nga makapalipay sa Diyos.+
7 Kay tungod sa iyang ngalan nga sila nanglakaw, nga wala magdahom ug bisan unsa+ gikan sa mga tawo sa kanasoran.
8 Busa obligasyon nato nga abiabihon sila,+ aron kita mahimong mga isigkamagbubuhat diha sa kamatuoran.+
9 Naa koy gisulat sa kongregasyon, apan si Diotrefes, nga gustong molabaw kaninyo,+ walay respeto sa bisan unsa nga among isulti.+
10 Busa kon makaanha ko, ipadayag nako ang iyang mga gibuhat sa pagpakaylap ug daotang mga estorya* bahin kanamo.+ Kay dili pa kontento niini, wala sab niya dawata nga may pagtahod ang mga igsoon;+ ug kadtong gustong modawat nila iyang pugngan ug pahawaon sa kongregasyon.
11 Minahal nga igsoon, ayawg sundoga ang daotan, apan sundoga ang maayo.+ Kadtong nagbuhat ug maayo naggikan sa Diyos.+ Kadtong nagbuhat ug daotan wala makakita sa Diyos.+
12 Ang tanang igsoon ug ang kamatuoran mismo nagpamatuod sa maayong mga hiyas ni Demetrio. Gani, kami sab nagpamatuod bahin kaniya, ug nahibalo ka nga tinuod ang among pamatuod.
13 Daghan pa kog isulti nimo, pero dili nako gustong isulat kini.
14 Naglaom ko nga magkita ta sa dili madugay ug mag-estorya sa personal.
Hinaot nga naa kay kalinaw.
Ang atong mga higala nangomosta nimo. Ikomosta pod ko sa matag usa sa atong mga higala diha.
Mga Footnote
^ O “sa ansiyano.”
^ O posible, “labaw nga rason sa akong pagkamapasalamaton.”
^ Literal, “pagsigeg yawit ug daotang mga pulong.”
