Nahum 1:1-15
1 Usa ka pahayag batok sa Nineve:+ Ang basahon sa panan-awon ni Nahum* nga taga-Elkos:
2 Si Jehova maoy Diyos nga nangayog eksklusibong debosyon+ ug siya manimalos;Si Jehova manimalos ug mopakita gayod sa iyang kasuko.+
Si Jehova manimalos sa iyang mga kaaway,Ug ginatigom niya ang iyang kasuko para sa iyang mga kaaway.
3 Si Jehova dili daling masuko+ ug gamhanan kaayo,+Apan silotan ni Jehova ang angayng silotan.+
Moagi siya uban ang malaglagong hangin ug bagyo,Ug ang mga panganod mao ang abog sa iyang mga tiil.+
4 Iyang gibadlong ang dagat+ ug gipauga kini;Ug iyang gipahubas ang tanang suba.+
Ang mga tanom sa Basan ug Carmelo nalaya,+Ug ang mga bulak sa Lebanon nalaya.
5 Tungod niya ang kabukiran nauyog,Ug ang kabungtoran natunaw.+
Tungod sa iyang nawong ang kalibotan mokurog,Apil ang yuta ug ang tanang nagpuyo niini.+
6 Kinsay makabarog sa iyang kapungot?+
Ug kinsay makasugakod sa kainit sa iyang kasuko?+
Ang iyang kasuko ibuga samag kalayo,Ug ang mga bato mangadugmok tungod niya.
7 Si Jehova maayo,+ usa ka salipdanan sa adlaw sa kasakit.+
Atimanon* niya kadtong modangop niya.+
8 Bug-os niyang laglagon ang iyang* dapit pinaagig kusog nga baha,Ug ang Iyang mga kaaway gukdon sa kangitngit.
9 Makaplano ba kag daotan batok kang Jehova?
Puohon mo niya.
Dili na niya kinahanglang usbon ang paglaglag.+
10 Kay sama silag tunokong tanom nga nangalambod,Ug sama sila niadtong nangahubog sa serbesa;*Apan sunogon sila samag uga nga dagami.
11 Gikan kanimo dunay magplanog daotan batok kang Jehova,Nga maghatag ug way pulos nga tambag.
12 Kini ang giingon ni Jehova:
“Bisag kusgan kaayo sila ug daghan,Sila patyon ug hanawon.*
Ikaw* akong gisakit, apan dili na ti ka sakiton pa.
13 Karon akong balion ang yugo nga iyang gibutang kanimo,+Ug akong bugtoon ang imong mga gapos.
14 Si Jehova nagsugo bahin kanimo,*‘Wala nay motunghang kaliwat nimo nga magdala sa imong ngalan.
Laglagon nako ang kinulit nga mga larawan ug metal* nga mga estatuwa sa balay* sa imong mga diyos.
Maghimo kog lubnganan nimo kay wala kay pulos.’
15 Tan-awa! Naa sa kabukiran ang nagdalag maayong balita,Ang usa nga nagmantalag pakigdait.+
Oh Juda, sauloga ang imong mga pista+ ug tumana ang imong mga panaad,Kay dili na ka atakehon sa way pulos nga mga tawo.
Sila bug-os nga laglagon.”
Mga Footnote
^ Kahulogan, “Tighupay.”
^ O “Hinumdoman.” Literal, “Nailhan.”
^ Ang Nineve.
^ O “serbesa nga trigo.”
^ O posible, “ug siya moagi.”
^ Ang Juda.
^ Ang Asirya.
^ O “hinulma.”
^ O “templo.”
