Bisag wala na mailalom sa Moisesnong Balaod ang mga Kristohanon, ang duha ka kinadak-ang sugo niini​—ang paghigugma sa Diyos ug sa isigkatawo—​nagtudlo nato kon unsay gusto sa Diyos nga atong buhaton. (Mat 22:37-39) Ang maong gugma dili awtomatikong mabatonan. Kinahanglan kining ugmaron. Unsaon kini pag-ugmad? Ang usa ka importanteng paagi mao ang pagbasag Bibliya kada adlaw. Dihang atong susihon ang lainlaing bahin sa personalidad sa Diyos nga gipadayag sa Kasulatan, atong makita ang “pagkakahimut-anan ni Jehova.” (Sal 27:4) Ingong resulta, modako ang atong gugma kaniya ug mas mapahiuyon nato ang atong panghunahuna sa iyang panghunahuna. Kini mopalihok nato sa pagtuman sa mga sugo sa Diyos, sama sa pagpakitag masakripisyohong gugma sa uban. (Ju 13:34, 35; 1Ju 5:3) Ang mosunod nga tulo ka sugyot makatabang aron mahimong mas makalingaw ang pagbasag Bibliya:

• Gamita imong imahinasyon ug mga sentido. Handurawa nga tua ka didto. Unsa kahay imong makita, madungog, ug masimhotan? Unsa kahay mga pagbati sa mga tawo nga anaa sa maong asoy?

• Paggamit ug lainlaing pamaagi. Niay pipila ka sugyot: Pagbasag kusog, o paminaw sa usa ka audio recording ug sundi kana diha sa Bibliya. Basaha ang bahin sa usa ka karakter sa Bibliya o topiko imbes basahon ang mga kapitulo base sa pagkasunodsunod niini. Pananglitan, gamita ang Seksiyon 4-A hangtod 4-H o 16-A hangtod 16-B sa pulyetong Giya sa Pagtuon sa Pulong sa Diyos dihang magbasa bahin kang Jesus. Basaha ang tibuok kapitulo diin gikuha ang inadlawng teksto. Basaha ang mga basahon sa Bibliya base sa pagkasunodsunod sa panahon nga gisulat kini.

• Sabta ang imong gibasa. Mas maayo pa ang pagbasag bisag usa lang ka kapitulo kada adlaw uban ang paningkamot nga masabtan ug mapamalandong kini kay sa pagbasag daghang kapitulo aron lang naay mahuman ug basa. Pamalandonga ang mga panghitabo. Analisaha ang mga detalye. Gamita ang mga mapa ug mga marginal reference. Pag-research ug bisag usa ka punto nga wala nimo masabti. Kon posible, paggahin ug samang gidugayon sa panahon sa pagbasa ug sa pagpamalandong.