Importante ang kataposang Paskuwa ni Jesus. Kay hapit na ang iyang kamatayon, iyang giplano nga makauban sa pagpangaon sa Paskuwa ang iyang mga apostoles ug sugdan ang bag-ong tinuig nga selebrasyon, ang Panihapon sa Ginoo. Busa iyang gisugo si Pedro ug Juan nga andamon ang usa ka lawak. (Luc 22:7-13; tan-awa ang hulagway sa atubangan.) Kini nagpahinumdom nato nga kinahanglan tang mangandam para sa Memoryal sa Marso 27. Posible nga ang mga kongregasyon naa nay gihimong mga kahikayan para sa mamumulong, mga emblema, ug uban pa. Pero unsay himoon sa matag usa nato aron makapangandam sa Memoryal?

Andama ang imong kasingkasing. Basaha ug palandonga ang gieskedyul nga pagbasa sa Bibliya sa Memoryal. Ang eskedyul makita sa Pagsusi sa Kasulatan sa Adlaw-Adlaw. Ang Apendise B12 sa rebisadong Bag-ong Kalibotang Hubad sa Balaang Kasulatan dunay mas detalyadong eskedyul. (Tan-awa sab ang Abril 2020 nga Workbook sa Tigom nga Kinabuhi ug Ministeryo.) Puwedeng hisgotan sa mga pamilya ang kaimportante sa halad lukat diha sa ilang pamilyahanong pagsimba. Makakita silag impormasyon bahin niini nga topiko diha sa Watch Tower Publications Index o Giya sa Pagpanukiduki Para sa mga Saksi ni Jehova.

Imbitaha ang uban sa pagtambong. Paningkamoti nga daghan kag maimbitar sa Memoryal. Hunahunaa kon kinsay imong imbitahon, sama sa imong mga balikduaw, kanhing mga Bible study, mga kaila, ug paryente. Paneguroon sa mga ansiyano nga maimbitar ang mga dili aktibo. Kon ang imong imbitahon nagpuyo sa laing lugar, makita nimo ang oras ug lokasyon sa Memoryal sa iyang lugar pinaagi sa pag-click sa BAHIN KANAMO nga tab ibabaw sa home page sa jw.org, dayon i-click ang “Memoryal.”

Unsa pay atong himoon aron makapangandam?