Si Freda, usa ka amang, nalipay kaayo pagkahibalo nga siya ug ang sister nga nag-Bible study niya mobalhin sa unang sign-language nga kongregasyon sa Papua New Guinea. Ang kongregasyon naporma sa Marso 1, 2013. Nakita ni Freda nga mas makasabot siya sa mga tigom dihang nagpokus siya sa nagsenyas ug sa mga visual aid sa plataporma ug dili sa publikasyon.  Tungod niini, wala na siya maulaw nga makigbahin sa mga tigom ug kanunay na siyang mokomento. Pagka-Abril 2013, nahimo siyang di-bawtismadong magmamantala ug may mga amang nga nadala niya sa mga tigom. Sa gipangutana kon nganong makahilak siya panahon sa tigom, siya mitubag: “Kay makasabot na ko.”

Sa Australia, samtang nagdrayb si Barbara sa iyang kotse paingon sa iyang grupo sa pagsangyaw, mihunong una siya aron susihon kon nadala ba ang iyang listahan sa balikduaw. Kalit mibukas ang pultahan ug may babaye nga mosakay unta.

“Yuna pa,” matod ni Barbara, “morag nasayop ka.”

“Ay, sori,” mitubag ang babaye. “Abi kog ikaw ang mohapit nako.” Pagkakita niya sa Bantayanang Torre ug Pagmata!, ang babaye miingon, “Pirme kong dad-an nianang mga magasina sa duha ka babaye nga nagtudlo nako kaniadto sa Bibliya.” Nalipay si Barbara ug gihatag niya sa babaye ang mga magasin ug sa ulahi gisugdan niya siyag Bible study.

Si Violet maoy 82-anyos nga masakitong sister sa Christchurch, New Zealand. Tigpadala siyag sulat ug literatura sa Bibliya sa mga nursing home ug hospice sa ilang lugar. Ang mga nars nga tighatod niana nag-ingon nga ang tigulang nga mga residente  mahinamong nagpaabot sa giisip nilang mga sulat gikan sa Diyos. Ang pipila nagbayloay pa ganig sulat ug literatura o nagbasag kusog para sa halaphalap. Ang mga nars nag-ingon sab nga kon itandi sa uban, ang mga tigbasa sa sulat ug literatura mas kalmado, malaomon, ug dili masuk-anon. Bahin sa iyang paningkamot nga makasangyaw, si Violet miingon: “Gibati ko nga si Jehova naggamit gihapon nako sa pagtabang sa uban. Ang pagpaambit sa kamatuoran niining paagiha makapalipay gyod.”

“Nakabasa na ko ana.” Kanay tubag sa usa ka kolehiyala sa isla sa Saipan dihang gitanyagan siya ni Bernie sa kinabag-ohang Bantayanang Torre Sabado kadto sa buntag. Siya nahibulong kon nganong si Bernadette nakabasa na niana. Mikuha si Bernie ug laing magasin sa iyang bag. “Nakabasa na pod ko ana,” matod ni Bernadette. Kay naglibog, si Bernie nangutana: “Diin man ka makabasa niini? Saksi ni Jehova ka nga nagbakasyon dinhi?” Mitubag si Bernadette nga dili, pero nabasa niya kana online. Usa ka adlaw, nangita siyag impormasyon sa Internet bahin sa mga bulak. Pagtayp niya sa pulong “rosas” nainteres siya sa usa sa mga artikulo nga migawas: “Nindot Kaayong mga Rosas sa Aprika,” sa Pagmata! nga anaa sa Web site sa mga Saksi ni Jehova. Nalingaw pag-ayo si Bernadette sa artikulo bahin sa mga rosas mao nga gisusi pa niyag dugang ang Web site. Sa sinugdan, bahin lamang sa tanom ug mananap ang iyang gibasa pero ngadtongadto nainteres siya sa mga topiko bahin sa Bibliya. Pagkamatikod sa interes ni Bernadette, gitanyagan siya ni Bernie ug libreng Bible study ug sa ulahi siya mibalik nga nagdalag librong Unsay Tinuod nga Gitudlo sa Bibliya? Sa ikatulong pagduaw ni Bernie, gihisgotan nila ang kapitulo uno sa libro. Mga usa ka tuig sa ulahi, si Bernadette nabawtismohan sa Nobyembre 2012. Kay kusog ang pag-uswag ni Bernadette, sulogsulogon siya sa iyang mga higala nga siya mora kunog “misirit” sa kamatuoran. Ang hinungdan mao ang Web site.