Si Ismael nagpuyo sa Mexico. Gusto kaayo niyang basahon ang tibuok Bibliya. Sulod lang sa usa ka tuig, kaduha na niya nabasa ang Bibliya. Pero wa madugay, nabuta siya. Paglabayg pipila ka tuig, nailaila niya si Ángel nga usa ka Saksi ni Jehova. Gisangyawan siya ni Ángel bahin sa mga saad sa Diyos. Interesado kaayong mokat-og  dugang si Ismael, pero miingon siya, “Unsaon man nako pagtuon ug Bibliya nga buta man ko?”

Gipasaligan siya ni Ángel, “Ayawg kabalaka, tudloan ti kag Braille.”

“Kamao diay kag Braille?” nangutana si Ismael.

“Dili, pero tun-an natong duha,” mitubag si Ángel. Dili makatuo si Ismael nga himoon to ni Ángel para niya. Miuli si Ángel, nag-research kon unsaon pagbasag Braille, ug naghimo siya diha sa cardboard ug pinabugdong mga letra nga pang-Braille. Dayon, iyang gitudloan si Ismael kon unsaon pagbasa ug Braille. Wala madugay, nakakat-on na si Ismael sa Braille nga alpabeto, tigtambongan na sa mga tigom, ug tigbasahan na sa atong Braille nga mga publikasyon. Karon, upat na ka buta ang Bible study ni Ángel. Ganahan kaayo silang maghisgot bahin sa Paraiso, kay didto makakita na sila.

Si Viannei, 14 anyos nga sister sa United States, misulat: “Sa among social studies nga klase, ang among kapuling maestro naghisgot bahin sa relihiyon. Iya ming giingnan nga maghatag ug mga ngalan sa relihiyon, maong ginganlan nako ang mga Saksi ni Jehova. Gikataw-an ko sa akong mga klasmet. Miingon sila nga nagsayangsayang ra kuno ta sa ilang oras, wala kuno tay laing trabaho, ug nga ila rang ginalabay ang atong mga literatura. Nanaway pod ug apil ang among maestro.

 “Miampo ko kang Jehova nga hatagan ko niyag kaisog sa pagsangyaw nila. Giingnan nako sila nga nagaadto ta sa ilang balay, dili aron usikan ang ilang panahon, kondili aron sundon ang sugo ni Jehova nga itudlo sa mga tawo ang praktikal nga mga tambag sa Bibliya. Gihangyo sab nako sila nga dili ilabay ang atong mga literatura kay makabag-o ug makaluwas ni sa ilang kinabuhi. Nangayog pasaylo ang akong maestro ug misaad siya nga kon moduaw pag-usab ang mga Saksi, iya silang atubangon  ug paminawon. Basahon na sab daw niya ang atong mga publikasyon. Wala ko magdahom nga iya tong tinud-on.

“Paglabayg upat ka bulan, nagkita mi ug nasorpresa ko kay nag-Bible study na siya. Ug paglabayg unom pa ka bulan, gipangita ko niya sa eskuylahan ug gipasalamatan ko kay ako siyang gisangyawan. Wala na ko makaila niya kay nagpagupit na siya ug dili na bangason. Karon, usa na siya ka dili bawtismadong magmamantala.”

Sa miaging tuig, ang mga Saksi ni Jehova sa Brazil naghimog kahikayan aron masangyawan ang dakong rehiyon sa Amazon. Kay kadaghanan sa mga tawo didto wala pa gyod sukad makadungog sa maayong balita, giaprobahan sa Nagamandong Lawas ang usa ka tuig nga espesyal nga kampanya aron sangyawan ang libolibong mga tawo nga nagpuyo sa pipila ka lagyong lugar sa Amazon.

Ang sangang buhatan mipilig 53 ka lagyong lungsod nga nahimutang sa mga suba sa Amazon ug nagpadalag mga magsasangyaw didto. Sulod lang sa upat ka bulan, kapin sa 6,500 ang miboluntaryo nga mosangyaw didto.

Sa layong lugar sa Anamã, nga walay mga Saksi, napulo ka brader ug sister ang mipuyo didto sulod sa 11 ka adlaw. Nakapanagtag silag kapin sa 12,500 ka literatura ug nakadumalag mga 200 ka Bible study, nga padayong giestadihan karon pinaagig telepono. Samtang naa didto, ang mga igsoon nagpahigayon sab ug panagkatigom. Sa ilang kataposang tigom ayha mibiya sa maong lugar, nalipay kaayo sila kay 90 ang nanambong. Mahibaloan ra unya ang katibuk-ang epekto sa maong kampanya.

Klasmet si Jehizel ug Mariana sa miaging unom ka tuig didto sa usa ka eskuylahan sa Venezuela. Kay Saksi ni Jehova man si Jehizel, pirme siyang yagayagaan ni Mariana. Para kang Mariana, killjoy si Jehizel. Usa ka adlaw, dihang giyagayagaan na pod siya pag-ayo, si Jehizel miingon: “Mariana, tan-awa palihog ang among website nga jw.org. Dayon i-click ang ‘Pangitaa ang mga Video,’ ug pilia ang box nga ‘Mga Tin-edyer.’”

 Niadtong hapona, nanawag si Mariana kang Jehizel ug miingon: “Mao diay nga ingon ana ka.”

Naglibog si Jehizel ug nangutana, “Imo na pod kong yagayagaan?”

“Dili oy! Di na gyod ti ka yagayagaan,” si Mariana mitubag. “Gusto kong magpasalamat nimo. Nasabtan na nako nga ang ako diayng paagi sa ‘pag-enjoy sa kinabuhi’ maoy hinungdan sa akong mga problema.” Nagpa-Bible study si Mariana ug karon tigtambongan na sa tanang tigom.

Si Gérole, sekretaryo sa usa ka relihiyon sa Haiti, bilib kaayo sa mga Saksi kay ilang natubag ang tanan niyang  pangutana gamit ang Bibliya. Siya ug ang iyang anak nga babaye nagpa-Bible study. Kay ganahan kaayo sila sa ilang nakat-onan, mihangyo sila nga magpa-Bible study kaduha sa usa ka semana.

Human sa tulo ka bulan nga pag-Bible study, gipangutana ni Gérole ang pastor sa iyang simbahan: “Unsang tuiga nahimong Hari si Jesus? Asa paingon ang buotang mga tawo inigkamatay nila? Asa pod paingon ang mga daotan? Asa man namatay si Jesus, sa krus o sa estaka?” Miingon ang pastor nga ang ikaduha ug ikatulo ra nga pangutana ang iyang matubag. “Sumala sa mga Saksi ni Jehova, 144,000 ra ang moadto sa langit,” ang pastor mitubag. “Pero ang tinuod, ang tanang nagbuhat sa kabubut-on sa Diyos moadto sa langit. Ug ang mga daotan sunogon sa impiyerno hangtod sa hangtod.” Dihang gipangutana niya ang pastor kon unsa nga teksto ang iyang basehanan, wa siyay ikatubag. Nadismaya si Gérole sa pastor, ug mas determinado na siya nga ipadayon ang iyang pag-Bible study. Mihawa siya sa simbahan ug miingon nga mas daghan pa siyag nasabtan sa tulo ka bulan nga pag-Bible study uban sa mga Saksi ni Jehova, kay sa kapig 30 ka tuig niyang pagtambong sa simbahan. Dili pa dugay, si Gérole ug ang iyang anak nga babaye nabawtismohan ug duna silay 23 ka Bible study sa ilang baryo.