Kapitulo 3

Ang Mag-aandam sa Dalan Natawo

SI Elizabeth duol nang manganak. Sa milabay nga tulo ka bulan, si Maria mipuyo uban kaniya. Apan karon panahon na nga manamilit si Maria ug mohimo sa dugay nga pagpanaw aron mopauli sa Nazaret. Sa mga unom ka bulan siya usab manganak.

Wala madugay sa paglakaw ni Maria, nanganak si Elizabeth. Pagkadako sa kalipay sa milampos ang pagpanganak ug si Elizabeth ug ang bata maayog panglawas! Sa gipakita ni Elizabeth ang bata ngadto sa iyang mga silingan ug mga paryente, silang tanan miduyog sa iyang kalipay.

Sa ikawalong adlaw tapos sa iyang pagkatawo, sumala sa Kasugoan sa Diyos, ang usa ka batang lalaki sa Israel kinahanglang sirkunsidahan. Alang sa maong okasyon ang mga higala ug mga paryente miduaw. Sila miingong ang batang lalaki paganganlan sumala sa iyang amahan, si Zacarias. Apan si Elizabeth mipahayag. “Dili!” siya miingon, “siya paganganlang Juan.” Hinumdomi, kana ang ngalang giingon ni Gabriel nga igahatag sa bata.

Apan, mitutol ang ilang mga higala: “Walay mausa sa inyong mga paryente ang may ingong ngalan.” Unya, pinaagi sa pagsenyas, ilang gipangutana kon unsay gusto sa iyang amahan nga ingalan sa batang lalaki. Nangayog papan nga sulatanan, si Zacarias, sa katingala sa tanan, misulat: “Ang iyang ngalan maoy Juan.”

Uban niana, ang gahom sa pagsulti ni Zacarias milagrosong nahibalik. Imong mahinumdomang siya nawad-an sa iyang katakos sa pagsulti sa wala siya motuo sa pahibalo sa manulonda nga manganak si Elizabeth. Aw, sa nakasulti si Zacarias, ang tanang nagpuyo sa silinganan natingala ug nanag-ingon sa ilang kaugalingon: “Maunsa man kaha diay kining bataa?”

Karon si Zacarias napuno sa balaang espiritu, ug siya mipatugbaw: “Dalayegon si Jehova ang Diyos sa Israel, tungod kay miliso siya sa iyang pagtagad ug giluwas ang iyang katawhan. Ug nagbangon siya ug usa ka sungay sa kaluwasan alang kanato sa kaliwatan ni David nga iyang alagad.” Kini nga “sungay sa kaluwasan,” sa pagkamatuod, mao si Ginoong Jesus, nga matawo pa. Pinaagi kaniya, miingon si Zacarias, ang Diyos “magahatag kanato, human nga kita giluwas gikan sa mga kamot sa mga kaaway, sa pribilehiyo sa maisogong paghatag kaniya ug balaang pag-alagad sa pagkamaunongon ug pagkamatarong atubangan kaniya sa tanan natong mga adlaw.”

Unya si Zacarias mitagna mahitungod sa iyang anak, nga si Juan: “Ug ikaw, anak, ikaw pagatawgon nga usa ka manalagna sa Labing Hataas, ug ikaw magauna kang Jehova ug magaandam sa dalan alang kaniya, sa paghatag ug kahibalo sa iyang katawhan mahitungod sa kaluwasan pinaagi sa pagpasaylo sa ilang mga sala, tungod sa malumong kahangawa sa atong Diyos. Tungod sa maong malumo nga kahangawa ang banagbanag moduaw kanato gikan sa kahitas-an, aron sa paghatag kahayag ngadto sa mga nanaglingkod sa kangitngit ug sa landong sa kamatayon, aron sa pagtultol sa atong mga tiil nga mauswagon ngadto sa dalan sa pakigdait.”

Sa maong panahon si Maria, si kinsa dayag nga dili pa minyo nga babaye, nakaabot na sa pinuy-anan sa Nazaret. Unsay mahitabo kaniya sa dihang mailhang siya nanamkon? Lucas 1:56-80; Levitico 12:2, 3.

▪ Pila ang pagkamagulang ni Juan kang Jesus?

▪ Unsang mga butang ang nahitabo sa dihang si Juan walo ka adlaw sa edad?

▪ Sa unsang paagi giliso sa Diyos ang iyang pagtagad sa iyang katawhan?

▪ Unsang buluhaton ang gitagna nga pagabuhaton ni Juan?