Kapitulo 2

Gihimaya sa Wala pa Siya Matawo

HUMAN sultihi sa manulondang Gabriel ang dalagang si Maria nga siya manganak sa usa ka batang lalaki nga mahimong walay kataposang hari, si Maria nangutana: “Unsaon sa pagkahimo niini, sanglit ulay man ako?”

“Pagakunsaran ikaw sa balaang espiritu,” miingon si Gabriel, “ug pagalandongan ikaw sa gahom sa Labing Hataas. Tungod niini ang bata nga matawo pagatawgong balaan, ang Anak sa Diyos.”

Aron makatuo si Maria sa iyang mensahe, si Gabriel mipadayon: “Ug, tan-awa! ang imong paryente nga si Elizabeth bisan sa iyang kagulangon, nanamkon usab ug usa ka batang lalaki, ug karon ang ikaunom ka bulan sa iyang pagsabak, ang giingong babayeng apuli; kay walay pulong nga gipahayag sa Diyos nga dili mahimo.”

Si Maria mituo sa gisulti ni Gabriel. Ug unsay iyang tubag? “Tan-awa! ang ulipon nga babaye ni Jehova!” siya miingon. “Hinaot matuman unta kanako kanang imong gipahayag.”

Sa dihang mibiya na si Gabriel, nangandam si Maria ug miduaw kang Elizabeth, nga nagpuyo uban sa iyang bana, si Zacarias, sa bukirong lugar sa Judea. Gikan sa gipuy-an ni Maria sa Nazaret, halayong biyahe kini nga tingali mokabat ug tulo o upat ka adlaw.

Sa miabot si Maria sa kataposan sa balay ni Zacarias, siya misulod ug nangomosta. Niana, napuno si Elisabeth sa balaang espiritu, ug siya miingon kang Maria: “Dalayegon ikaw taliwala sa kababayen-an, ug dalayegon ang bunga sa imong tiyan! Ngano ba gayod nga naangkon ko ang pribilehiyo nga duawon ako sa inahan sa akong Ginoo? Kay, tan-awa! sa pagkadungog ko sa imong tingog sa pangomosta, ang bata sa sulod sa akong tiyan miulpot sa kalipay.”

Sa pagkadungog niini, mitubag si Maria sa kinasingkasing nga pasalamat: “Ang akong kalag nagadayeg kang Jehova, ug ang akong espiritu nagakalipay diha sa Diyos nga akong Manluluwas; kay siya mitan-aw man sa ubos nga kahimtang sa iyang ulipong babaye. Kay tan-awa! sukad karon ang tanang kaliwatan magatawag kanako nga malipayon; tungod kay ang gamhanang Usa nagbuhat ug dagkong mga butang alang kanako.” Apan, bisan pa sa kahimuot nga gipakita kaniya, gihatag ni Maria ang tanang pasidungog ngadto sa Diyos. “Balaan ang iyang ngalan,” siya miingon, “ug diha sa mga kaliwatan ngadto sa mga kaliwatan iyang gikaluy-an sila nga mga nagakahadlok kaniya.”

Si Maria nagpadayon sa pagdayeg sa Diyos diha sa dinasig matagnaong awit, nga nagaingon: “Siya nagapakitag kusog pinaagi sa iyang bukton, iyang gipatibulaag ang mga mapahitas-on uban sa mga laraw sa ilang mga kasingkasing. Gipukan niya ang mga tawong gamhanan gikan sa ilang mga trono ug iyang gituboy ang mga mapaubsanon; iyang gibusog sa maayong mga butang ang mga gigutom ug iyang gipapahawa nga walay dala ang mga dato. Mitabang siya kang Israel nga iyang alagad, agig paghandom sa iyang pagkaluoy, sumala sa iyang gisaad sa atong mga katigulangan, kang Abraham ug sa iyang kaliwat hangtod sa kahangtoran.”

Si Maria mipuyo uban kang Elizabeth duolan sa tulo ka bulan, ug sa walay duhaduha dako siyag tabang sa hinapos nga mga semana sa pagsabak ni Elizabeth. Pagkamaayo nga kining duha ka babayeng matinumanon, nga pulos nagdala sa bata pinaagi sa tabang sa Diyos, nagkauban ning dalayegong panahon sa ilang mga kinabuhi!

Imo bang namatikdan ang himaya nga gihatag kang Jesus bisag wala pa siya matawo? Gitawag siya ni Elizabeth nga “akong Ginoo,” ug ang iyang gisabak nga bata miulpot sa kalipay sa pag-abot ni Maria. Sa laing bahin, wala magpakitag pagtahod ang uban kang Maria ug sa iyang wala pa matawong bata, sumala sa ato unyang makita. Lucas 1:26-56.

▪ Unsay gisulti ni Gabriel aron makasabot si Maria kon sa unsang paagi siya manamkon?

▪ Sa unsang paagi gihimaya si Jesus bisag wala pa siya matawo?

▪ Unsay gipamulong ni Maria diha sa usa ka matagnaong awit sa pagdayeg sa Diyos?

▪ Unsa ka dugay nga mipuyo si Maria uban kang Elizabeth, ug nganong tukmang mipuyo si Maria uban kang Elizabeth sa maong panahon?