Kapitulo 17

Pagtudlo Kang Nicodemo

SAMTANG mitambong siya sa Paskuwa sa 30 K.P., gihimo ni Jesus ang talagsaong mga ilhanan, o mga milagro. Ingong sangpotanan, daghang tawo ang nagbutang sa ilang pagtuo diha kaniya. Si Nicodemo, usa ka membro sa Sanhedrin, ang Hudiyonhong hataas nga hukmanan, nahingangha ug buot masayod sa dugang. Busa miduaw siya kang Jesus sa kangitngit sa kagabhion, lagmit kay nahadlok nga madaot ang iyang dungog uban sa ubang Hudiyong mga pangulo kon makita siya.

“Rabbi,” matud niya, “kami nahibalo nga ikaw ingong magtutudlo naggikan sa Diyos; kay walay makabuhat niining mga ilhanana nga imong gibuhat gawas nga ang Diyos nagauban kaniya.” Sa pagtubag, si Jesus miingon kang Nicodemo nga aron makasulod sa Gingharian sa Diyos, ang usa ka tawo kinahanglang “igaanak pag-usab.”

Ugaling, sa unsang paagi ang usa ka tawo igaanak pag-usab? “Siya dili makasulod sa ikaduhang panahon sa tiyan sa iyang inahan ug ipanganak, dili ba?” nangutana si Nicodemo.

Dili, kana dili mao ang ipasabot sa pagkagianak pag-usab. “Gawas nga ang usa igaanak gikan sa tubig ug sa espiritu,” misaysay si Jesus, “siya dili makasulod sa gingharian sa Diyos.” Sa dihang si Jesus nabawtismohan ug mitugdong ibabaw kaniya ang balaang espiritu, siya sa ingon gianak “gikan sa tubig ug sa espiritu.” Pinaagi sa nag-ubang pahayag gikan sa langit, ‘Kini mao ang akong Anak nga akong gikahimut-an,’ gipahibalo sa Diyos nga iyang gipatungha ang usa ka espirituwal nga anak nga may kalaoman sa pagsulod sa langitnong Gingharian. Sa ulahi, sa Pentekostes 33 K.P., ang ubang mga bawtismado magdawat sa balaang espiritu ug sa ingon igaanak pag-usab ingong espirituwal nga mga anak sa Diyos.

Apan ang papel sa espesyal nga tawhanong Anak sa Diyos maoy hinungdanon. “Maingon nga giisa ni Moises ang bitin sa kamingawan,” giingnan ni Jesus si Nicodemo, “ang Anak sa tawo kinahanglang pagaisahon, aron ang tanan nga motuo kaniya makabaton ug kinabuhing walay kataposan.” Oo, maingon nga kadtong mga Israelinhon nga gipaak sa malala nga mga halas kinahanglang motan-aw sa tumbaga nga bitin aron mamaluwas, ang tanang tawo kinahanglan usab nga motuo sa Anak sa Diyos aron maluwas gikan sa ilang himalatyong kahimtang.

Sa pagpasiugda sa mahigugmaong papel ni Jehova niini, giingnan sunod ni Jesus si Nicodemo: “Gihigugma pag-ayo sa Diyos ang kalibotan nga iyang gihatag ang iyang bugtong nga Anak, aron ang tanan nga motuo kaniya dili malaglag kondili makabaton ug kinabuhing walay kataposan.” Busa, sa Jerusalem mga unom lang ka bulan tapos sa pagsugod sa iyang ministeryo, gitin-aw ni Jesus nga siya mao ang paagi ni Jehova nga Diyos aron sa pagluwas sa katawhan.

Si Jesus mipatin-aw sa dugang kang Nicodemo: “Kay gipadala sa Diyos ang iyang Anak sa kalibotan, dili aron iyang hukman ang kalibotan,” nga mao, dili aron hukman kini sa kadaotan, o tunglohon kini, nga magasilot sa tawhanong banay sa kalaglagan. Hinunoa, sumala sa giingon ni Jesus, siya gipadala “aron ang kalibotan maluwas pinaagi kaniya.”

Si Nicodemo mahadlokon nga miadto kang Jesus sa takoban sa kangitngitan. Busa makaiikag nga gitapos ni Jesus ang iyang pakigkabildo kaniya pinaagi sa pag-ingon: “Karon kini ang pasikaranan sa paghukom, nga ang kahayag [nga gipersonipikar ni Jesus diha sa iyang kinabuhi ug mga pagpanudlo] mianhi sa kalibotan apan gihigugma sa mga tawo ang kangitngitan inay ang kahayag, kay daotan ang ilang mga binuhatan. Kay siya nga nagabuhat sa daotang mga butang nagadumot sa kahayag ug dili moduol sa kahayag, aron ang iyang mga binuhatan dili mabadlong. Apan siya nga nagabuhat kon unsay matuod moduol sa kahayag, aron ang iyang mga binuhatan mapaila ingong gibuhat nga nahiuyon sa Diyos.” Juan 2:23–3:21; Mateo 3:16, 17; Buhat 2:1-4; Numeros 21:9.

▪ Unsay nagtukmod sa pagduaw ni Nicodemo, ug nganong siya mianha sa gabii?

▪ Unsay kahulogan nga “igaanak pag-usab”?

▪ Giunsa pag-ilustrar ni Jesus ang iyang papel diha sa atong kaluwasan?

▪ Unsay kahulogan nga si Jesus wala moanhi sa paghukom sa kalibotan?