Basahon sa Bibliya Numero 63​—2 Juan

Magsusulat: Apostol Juan

Dapit Gisulatan: Efeso, o duol

Sinulat Nahuman: k. 98 K.P.

1. Kang kinsa mahimong gisulat ang Ikaduhang Juan?

 MUBO ang ikaduhang sulat ni Juan—mahimo kining gisulat sa usa ka panid sa papiro—apan kini puno sa kahulogan. Gipadala kini sa “piniling ginang ug sa iyang mga anak.” Sanglit ang “Kyria” (Grego alang sa “ginang”) milungtad ingon ngalang propio niadtong panahon, ang ubang mga eskolar sa Bibliya mibati nga ang indibiduwal uban nianang ngalan mao ang gisulatan. Sa laing bahin, gihunahuna sa uban nga si Juan misulat sa usa ka Kristohanong kongregasyon, mipunting niini ingon “piniling ginang.” Kini mahimong gihimo aron sa paglibog sa mga maglulutos. Nianang kaso, ang mga timbaya sa “mga anak sa imong igsoon babaye” nga gihinambitan sa kataposang bersikulo mao kadtong mga membro sa laing kongregasyon. Busa ang ikaduhang sulat wala tuyoa aron mahimong heneral sa gilapdon ingon sa una, kay kini dayag gisulat sa usa ka indibiduwal o sa usa ka partikular nga kongregasyon.—2Ju Ber. 1.

2. (a) Unsang ebidensiya mipunting kang apostol Juan ingon magsusulat sa Ikaduhang Juan? (b) Unsa ang misugyot nga ang sulat gisulat sa o duol sa Efeso, mga 98 K.P., ug unsa ang misuporta sa pagkakasaligan niini?

² Walay katarongan sa pagduda si Juan misulat sa sulat. Ang magsusulat mitawag sa iyang kaugalingon “tigulang lalaki.” Kini tinong haom kang Juan dili lamang tungod sa iyang abante nga panuigon apan usab tungod kay, ingon usa sa “mga haligi” (Gal. 2:9) ug kataposan buhi nga apostol, siya sa matuod “tigulang lalaki” o ansiyano sa Kristohanong kongregasyon. Ilado siya kaayo, ug walay dugang pagpaila ang kinahanglanon alang sa iyang mga magbabasa. Ang iyang pagkamagsusulat gipakita usab sa kasusama sa estilo nianang sa unang sulat ug sa Ebanghelyo ni Juan. Ingon sa unang sulat, ang ikaduhang sulat dayag gisulat sa o libot sa Efeso, mga 98 K.P. Mahitungod sa Ikaduha ug Ikatulong Juan, ang Cyclopedia nila McClintock ug Strong mikomento: “Gikan sa ilang heneral nga kasusama, mahimo kitang modahom nga ang duha ka sulat gisulat wamadugay human sa Unang Sulat gikan sa Efeso. Silang duruha mipadapat sa indibiduwal nga mga kaso sa paggawi sa mga prinsipyo nga gipahaluna sa Unang Sulat.” a Sa pagsuporta sa pagkakasaligan niini, ang sulat gikutlo ni Irenaeus, sa ikaduhang siglo, ug gidawat ni Clement sa Alejandria, sa samang panahon. b Usab, ang mga sulat ni Juan gitala sa Tipik Muratorian.

3. Nganong gisulat ni Juan ang sulat?

³ Ingon matuod sa Unang Juan, ang katarongan alang niining sulat mao ang pagdasmag sa mini nga mga magtutudlo batok sa Kristohanong pagtuo. Buot ni Juan pasidan-an ang iyang mga magbabasa mahitungod kanila aron sila makaila kanila ug makapahilayo kanila, samtang padayon naglakaw sa kamatuoran, sa baslanay nga gugma.

KAUNDAN SA IKADUHANG JUAN

4. Nganong sa partikular gitambag ni Juan ang paghigugma sa usa ug usa, ug sa unsang paagi kadtong mouna saylo sa pagtulon-an ni Kristo tratahon?

⁴ Maghigugmaay sa usa ug usa; isalikway ang mga apostata (Ber. 1-13). Human gipahayag ang iyang gugma sa kamatuoran alang sa ‘piniling ginang ug sa iyang mga anak,’ nalipay si Juan nga siya nakakaplag sa pipila kanila nga naglakaw sa kamatuoran, ingon sa gisugo sa Amahan. Iyang gihangyo ilang ipakita ang ilang gugma sa usa ug usa pinaagi sa pagpadayon sa paglakaw sumala sa mga sugo sa Diyos. Kay ang mga limbongan ug mga antikristo miabot sa kalibotan, kinsa wala mokumpisal kang Jesu-Kristo ingon mianhi sa unod. Siya nga mopadayon saylo sa pagtulon-an ni Kristo wala makabaton sa Diyos, apan siya nga mopabilin niining pagtulon-an “duna sa Amahan ug Anak.” Si bisan kinsa nga wala modala niining pagtulon-an dili dawaton sa ilang mga balay, ni siya ngani timbayaon. Si Juan dunay daghang butang isulat kanila, apan hinonoa siya milaom sa pag-anha ug pagsulti uban kanila nawong-sa-nawong, aron ang ilang kasadya mahimong “sa bug-os sukod.”—Ber. 9, 12.

NGANONG MAPUSLANON

5. (a) Unsang situasyon ang mibangon sa adlaw ni Juan nga mibangon usab sa modernong panahon? (b) Ingon ni Juan, sa unsang paagi kita karon makapakita sa pagpabili alang sa paghiusa sa kongregasyon?

⁵ Mipadayag kini nga sa adlaw ni Juan, ingon sa modernong panahon, dunay uban kinsa dikontento sa pagpabilin sa klaro, yanong pagtulon-an ni Kristo. Buot nila ang butang labaw pa, butang mogilok sa ilang persona, butang motuboy kanila ug mopahaluna kanila sa samang klase uban sa kalibotanong mga pilosopo, ug sugot sila sa pagtakod ug pagbahin sa  Kristohanong kongregasyon aron sa pagbaton ug ganansiya alang sa hakog nga katuyoan. Gipabilhan ni Juan ang harmonya sa kongregasyon nga nahaluna sa gugma ug hustong pagtulon-an sa paghiusa uban sa Amahan ug Anak. Kinahanglan atong batonan ang susama sa paghiusa sa kongregasyon karon, bisan sa pagdumili sa panag-uban o timbaya niadtong kinsa nahimong apostata sa laing pagtulon-an saylo sa nadawat pinaagi sa dinasig nga Kasulatan. Pinaagi sa pagpadayon sa paglakaw sumala sa mga sugo sa Diyos, ug sa bug-os sukod sa kasadya nga makaplagan sa matuod Kristohanong kapunongan, makasalig kita nga “duna uban kanato ang dili takos nga kalolot, kaluoy ug kalinaw gikan sa Diyos nga Amahan ug gikan ni Jesu-Kristo ang Anak sa Amahan, uban sa kamatuoran ug gugma.” (Ber. 3) Tinong gipasiugda sa ikaduhang sulat ni Juan ang kabulahanan sa maong Kristohanong pagkausa.

[Mga footnote]

[Mga Pangutana sa Pagtuon]