Kapitulo 38

Unsay Akong Himoon Aron Magmalipayon Ko sa Pagsimba sa Diyos?

Ang 16-anyos nga si Josh naghigda pa sa iyang kama. Giingnan siya sa iyang Mama nga nagtindog sa pultahan: “Joshua, bangon na! Nahibalo baya ka nga tigom ron!” Saksi ni Jehova ang pamilya ni Josh, ug regular nga bahin sa ilang pagsimba ang pagtambong ug Kristohanong mga tigom. Apan si Josh daw wala nay ganang motambong.

“Kinahanglan ba gyod kong motambong, Ma?” siya mireklamo.

“Ayaw nag reklamo diha, pag-ilis na. Maulahi na pod ta sa tigom!” miingon ang iyang Mama ug dayon milakaw.

“Kamo lang goy tambong,” miingon si Josh samtang diha pa sa duol ang iyang Mama. “Kamo ra may Saksi.” Nahibalo siya nga nakadungog ang iyang Mama kay nabatian niya nga mihunong siya paglakaw. Apan wala ray gisulti ang iyang Mama ug mipadayon paglakaw.

Nakonsensiya si Josh. Dili niya gustong masakitan ang iyang Mama. Apan dili pod niya gustong mangayog pasaylo. Wala siyay mahimo.

Bisag bug-at sa iyang buot, siya nag-ilis apan nagbagutbot: “Moabot ra ang panahon nga wala nay magbuot nako. Maayo mag parehas ko anang uban sa Kingdom Hall. Dili ko gustong mag-Saksi!”

 SAMA ka bag gibati ni Josh? Mobati ka ba usahay nga napugos lang, samtang ang uban malipayong nag-alagad sa Diyos? Pananglitan:

● Kapoyan ka bang magtuon sa Bibliya?

● Dili ka ba ganahang mosangyaw?

● Laayan ka ba sa Kristohanong mga tigom?

Kon oo ang imong tubag, ayawg kaluya. May mahimo ka aron magmalipayon sa pag-alagad sa Diyos. Atong tan-awon kon unsa kana.

PROBLEMA 1 Pagtuon sa Bibliya

Kon nganong lisod kini. Lagmit dili ka hilig magtuon. Basin tak-an ka dayon ug dili makalahutay! Gawas pa, dili ba daghan ka nag tun-anan sa eskuylahan?

Kon nganong kinahanglan kang magtuon. Gigiyahan sa Diyos ang pagsulat sa Bibliya, ug kini mapuslanon usab “sa pagtudlo ug pagtabang sa mga tawo ug sa pagbadlong ug sa pagpakita kanila kon unsaon pagkinabuhi.” (2 Timoteo 3:16, Contemporary English Version) Kon imong tun-an ang Bibliya ug palandongon ang imong gibasa, daghan kag makat-onan. Ang tinuod, wala kay maani kon dili ka magkugi. Kon gusto kang mohawod sa usa ka esport, kinahanglang mahibalo ka kon unsaon kini pagdula ug kinahanglan pod kang magpraktis. Kon gusto kang mohimsog, kinahanglan kang mag-ehersisyo. Busa, kon gusto kang makakat-on bahin sa Maglalalang, kinahanglan sab kang magtuon sa Pulong sa Diyos.

Kon unsay giingon sa ubang batan-on. “Pagtungtong nakog hayskul, kinahanglan kong mohimog dagkong desisyon. Pulos binuang ang gipanghimo sa ubang batan-on, busa nakapangutana ko, ‘Sundogon ba nako sila? Kamatuoran ba gyod ang gitudlo kanako sa akong ginikanan?’ Gisusi ko gayod kana.”—Tshedza.

 “Nagtuo gyod ko nga kamatuoran ang akong nakat-onan, apan kinahanglang pamatud-an ko mismo kana. Mosimba ko sa Diyos kay desisyon ko kana—dili sa akong ginikanan.”—Nelisa.

Kon unsay pwede nimong buhaton. Paghimog kaugalingon nimong programa sa pagtuon. Ikay pili sa gusto nimong tun-an. Unsay imong unahon? Pwede nimong susihon ang Bibliya ug tun-an pag-ayo ang mga doktrina nga imong gituohan, tingali pinaagi sa librong Unsay Tinuod nga Gitudlo sa Bibliya? *

Sugdi dayon! Butangig ✔ ang duha o tulo ka ulohan sa Bibliya nga gusto pa gyod nimong tun-an—o kaha isulat ang laing ulohan nga gusto nimo.

□ Duna bay Diyos?

□ Unsaon nako pagtino nga gigiyahan sa Diyos ang mga magsusulat sa Bibliya?

 □ Nganong mas makataronganong tuohan ang paglalang kay sa ebolusyon?

□ Unsa ang Gingharian sa Diyos, ug unsaon nako pagpamatuod nga tinuod kini?

□ Unsaon nako pagpatin-aw kon unsay mahitabo sa tawo inigkamatay?

□ Unsay nakapakombinsir nako nga dunay pagkabanhaw?

□ Unsaon nako pagtino sa matuod nga relihiyon?

․․․․․

PROBLEMA 2 Pagsangyaw

Kon nganong lisod kini. Tingali maulaw o mahadlok kang makig-estorya bahin sa Bibliya, ilabina kon makita ka sa imong klasmet.

Kon nganong kinahanglan kang mosangyaw. Gisugo ni Jesus ang iyang mga sumusunod: “Paghimog mga tinun-an . . . , nga magatudlo kanila sa pagtuman sa tanang butang nga akong gisugo kaninyo.” (Mateo 28:19, 20) Dugang pa, gipakita sa mga panukiduki nga sa ubang dapit, kadaghanan sa mga batan-on nagtuo sa Diyos ug sa Bibliya. Pero wala silay tinuod nga paglaom sa umaabot. Busa pinaagi sa imong pagtuon sa Bibliya, imong ikapaambit kanila ang mga impormasyon nga mao gyoy ilang gikinahanglan! Ingong resulta, magmalipayon ka, ug labaw sa tanan, imong mapalipay si Jehova.—Proverbio 27:11.

Kon unsay giingon sa ubang batan-on. “Nangandam mi sa akong amiga ug epektibong  mga introduksiyon, ug nagtuon mi kon unsaon pagtubag sa pagsupak ug kon unsaon pagbalik-duaw. Tungod niana, mas ganahan na kong mosangyaw.”—Nelisa.

“Dako kaayog tabang nako ang usa ka sister. Magulang siya nakog unom ka tuig. Iya kong iuban sa pagsangyaw ug usahay sa gawas mi mamahaw. Basahan ko niyag makapadasig nga mga teksto nga nakatabang nako sa pagbag-o sa akong panglantaw. Tungod sa iyang maayong panig-ingnan, mas interesado na ko karon sa pagtabang sa uban. Mapasalamaton kaayo ko niya!”—Shontay.

Kon unsay pwede nimong buhaton. Pananghid una sa imong ginikanan, dayon pangitag igsoon sa kongregasyon nga mas magulang nimo nga mahimo nimong ikauban sa pagsangyaw. (Buhat 16:1-3) Ang Bibliya nag-ingon: “Pinaagi sa puthaw, ang puthaw mapahait. Mao man usab ang usa ka tawo makapahait sa nawong sa laing tawo.” (Proverbio 27:17) Daghan kag makat-onan kon makig-uban ka sa mga hamtong nga daghag kasinatian. “Sila makatabang gyod nimo,” miingon ang 19-anyos nga si Alexis.

Sugdi dayon! Gawas pa sa imong ginikanan, isulat sa ubos ang ngalan sa igsoon sa inyong kongregasyon nga makatabang nimo sa ministeryo.

․․․․․

PROBLEMA 3 Pagtambong sa Kristohanong mga Tigom

Kon nganong lisod kini. Human sa tibuok adlawng klase, tingali kapoyan ka na sa pagtambong ug usa o duha ka oras nga tigom.

Kon nganong kinahanglan kang motambong. Ang Bibliya nagtambag sa mga Kristohanon: “Magmahunahunaon kita sa usag usa aron sa pagdasig ngadto sa paghigugma ug sa maayong mga buhat, nga dili talikdan ang atong mga panagkatigom, sama sa nabatasan sa pipila, apan magdinasigay sa usag usa, ug ilabina gayod samtang  makita ninyo nga ang adlaw nagkaduol na.”—Hebreohanon 10:24, 25.

Kon unsay giingon sa ubang batan-on. “Importante gyod nga mangandam sa mga tigom. Usahay kinahanglan lang nimong pugson ang imong kaugalingon nga magtuon. Kon magtuon ka, ganahan kang maminaw sa tigom kay nahibalo ka kon unsay gihisgotan, ug makakomento ka pa.”—Elda.

“Dihang nakakomento ko sa tigom, mas ganahan na kong motambong.”—Jessica.

Kon unsay pwede nimong buhaton. Pangandam sa tigom, ug kon mahimo, pagkomento sab. Pinaagi niini, bation nimong bahin ka gyod sa panagkatigom.

 Sa pag-ilustrar: Hain ang mas makalingaw—ang pagtan-awg dula sa TV o ang pag-apil mismo sa dula? Siyempre, mas makalingaw gyod kon apil ka sa nagdula. Ingon usab niana kon makigbahin ka sa tigom.

Sugdi dayon! Isulat sa ubos kon kanus-a ka makagahin ug bisag 30 minutos lang kada semana para mangandam sa tigom.

․․․․․

Napamatud-an sa daghang batan-on ang giingon sa Salmo 34:8, “Tilawi ug tan-awa ninyo nga si Jehova maayo.” Mabusog ka ba kon estoryahan ka lag lami nga pagkaon? Dili ba mas maayo kon makatilaw gyod ka niana? Ingon usab niana kon bahin sa pagsimba sa Diyos. Tilawi ug tan-awa kon unsa ka makapalipay ang pagpakigbahin niini. Ang Bibliya nag-ingon nga kon ang usa mamati ug molihok pa gyod, siya ‘magmalipayon sa pagbuhat niana.’—Santiago 1:25.

SA SUNOD NGA KAPITULO

Sayra kon unsaon pagtakda ug pagkab-ot sa imong mga tumong.

[Footnote]

TEKSTO

“Mag-usab kamo pinaagi sa pagbag-o sa inyong hunahuna, aron inyong ikapamatuod sa inyong kaugalingon ang maayo ug dalawaton ug hingpit nga kabubut-on sa Diyos.”—Roma 12:2.

SUGYOT

Isulat sa notbok ang importante nga mga punto sa tigom. Dili ka mapul-an kay dali rang molabay ang oras ug daghan kag makat-onan!

NAHIBALO KA BA . . . ?

Dili daotan kon mangutana ug manukiduki ka bahin sa imong gituohan. Makatabang kini kanimo sa pagtino kon tinuod ba ang imong nakat-onan bahin sa Diyos.—Buhat 17:11.

ANG AKONG PLANONG HIMOON!

Maggahin kog ․․․․․ minutos sa pagbasag Bibliya kada adlaw ug ․․․․․ matag semana para mangandam sa Kristohanong mga tigom.

Kini ang akong himoon aron makapamati kog maayo sa tigom: ․․․․․

Kon unsay akong gustong ipangutana sa akong ginikanan bahin niini: ․․․․․

UNSAY IMONG HUNAHUNA?

● Ngano kahang makalaay sa mga batan-on ang espirituwal nga mga kalihokan?

● Hain sa tulo ka bahin sa pagsimba nga gihisgotan niini nga kapitulo ang gusto nimong pauswagon?

[Blurb sa panid 278]

“Ang akong relihiyon dili kay relihiyon lang sa akong ginikanan, ako mismo ang nagpili niini. Si Jehova ang akong Diyos ug dili ko gustong madaot ang akong relasyon kaniya.” —Samantha

 [Kahon/Mga hulagway sa panid 280, 281]

Sila Dunay mga Tumong

Ang Bibliya nag-ingon: “Kamo wala masayod kon unsay dangatan sa inyong kinabuhi ugma.” (Santiago 4:14) Usahay, ang tawo kalit lang mamatay bisag bata pa. Samtang magbasa ka sa eksperyensiya ni Catrina ug Kyle, matikdi nga bisag mubo lang ang ilang kinabuhi, sila nakabatog maayong ngalan kang Jehova nga Diyos pinaagi sa pagtakda ug pagkab-ot ug espirituwal nga mga tumong.—Ecclesiastes 7:1.

Si Catrina namatay sa edad nga 18. Apan sa 13 anyos pa siya, iya nang nasulat ang iyang mga tumong sa kinabuhi. Apil niana ang pagsulod sa bug-os-panahong pag-alagad, pagtabang sa dapit diin dako ang panginahanglan sa mga magtutudlo sa Bibliya, ug pagboluntaryo sa pagpanukod ug Kingdom Hall uban sa iyang Papa. Siya misulat: “Ako nang gipahinungod ang akong kinabuhi kang Jehova nga Diyos!” Gusto ni Catrina nga “magkinabuhi uyon sa mga sukdanan sa Diyos aron malipay Siya.” Sa pakigpulong panahon sa iyang lubong, siya gihubit nga “usa ka dalayegong batan-on kansang kinabuhi nasentro sa pag-alagad kang Jehova.”

  Bata pa si Kyle, gidasig na siya sa pagtakdag mga tumong. Pero namatay siya sa edad nga 20 tungod sa aksidente sa sakyanan. Human niana, nakita sa iyang mga paryente ang iyang listahan sa mga tumong nga iyang gisulat sa tabang sa iyang Mama sa kuwatro anyos pa siya. Apil niini mao ang pagpabawtismo, pagpakigpulong diha sa Kingdom Hall, ug pag-alagad sa hedkuwarter sa mga Saksi ni Jehova, diin makatabang siya sa pag-imprentag literatura nga magamit sa mga tawo sa pagkakat-on bahin sa Diyos. Human mabasa ang listahan sa mga tumong ni Kyle, ang iyang Mama miingon: “Iyang nakab-ot ang tanan niyang tumong.”

Ikaw, unsa may imong mga tumong? Wala ka mahibalo kon unsay imong dangatan ugma. Busa ayawg usiki ang matag adlaw sa imong kinabuhi. Sama kang Catrina ug Kyle, gamita ang imong panahon sa mapuslanong paagi. Sundoga si apostol Pablo, kinsa nakaingon sa hapit nang matapos ang iyang kinabuhi: “Gibugno ko na ang maayong bugno, natapos ko na ang pagdagan sa lumba, nasunod ko na ang pagtuo.” (2 Timoteo 4:7) Ang mga sugyot sa sunod nga kapitulo makatabang nimo sa pagkab-ot sa imong mga tumong!

[Hulagway sa panid 274, 275]

Kon gusto kang mohimsog sa pisikal, pag-ehersisyo. Kon gusto sab kang mohimsog sa espirituwal, pagtuon sa Pulong sa Diyos