Maayong Panig-ingnan—Ruth

Ang balo nga si Ruth maoy maayong panig-ingnan sa pagkamaunongon. Imbes mopauli sa iyang lungsod ug magkinabuhing haruhay, siya midesisyon sa pag-unong sa iyang edarang ugangan nga si Noemi. Bisan tuod mahimong dili na makaminyo pag-usab si Ruth tungod sa iyang desisyon, wala siya mabalaka niana. Gipalabi niya ang iyang gugma kang Noemi ug ang iyang tinguha nga makauban ang katawhan ni Jehova kay sa iyang tinguha nga magminyo.—Ruth 1:8-17.

Nagplano ka bang magminyo? Nan sundoga si Ruth. Imbes maghunahuna lang kanunay sa imong pagbati, pangutan-a ang imong kaugalingon kon unsay imong maayong mga kinaiya nga makatabang sa imo unyang kaminyoon. Pananglitan, ikaw ba maunongon ug andam mosakripisyo? Ikaw ba nagsunod sa mga prinsipyo sa Diyos, bisan pag lahi ang gidiktar sa imong makasasalang unod? Si Ruth wala magpangitag bana. Apan naminyo ra siya sa usa ka hamtong nga lalaki nga sama niyag kinaiya, ug labaw sa tanan, may gugma sa Diyos. Posibleng ingon usab niana ang imong matagamtam.