Kapitulo 21

Sa Unsang Paagi Kining Tanan Gisuportahan sa Panalapi?

DAYAG nga ang buluhaton sa mga Saksi ni Jehova nagkinahanglan ug salapi. Ang pagpanukod ug mga Kingdom Hall, mga Assembly Hall, mga sangang buhatan, mga pabrika, ug mga balayng Bethel nagkinahanglan ug salapi, ug dugang pa ang gikinahanglan sa pag-atiman niana. Dihay mga galastohan usab sa pagpatik ug pag-apod-apod sa literatura alang sa pagtuon sa Bibliya. Sa unsang paagi kining tanan gisuportahan sa panalapi?

Ang walay pasikaranan nga mga panaghap mahitungod niini gipanabi sa mga tawo nga supak sa buluhaton sa mga Saksi ni Jehova. Apan ang pagsusi sa ebidensiya nagpaluyo sa tubag nga gihatag mismo sa mga Saksi. Unsa man kana? Kadaghanan sa buluhaton gihimo sa mga boluntaryo, kinsa wala magdahom ni mangandoy ug bayad alang sa ilang mga serbisyo, ug ang organisasyonal nga mga gastos gitagan-an sa boluntaryong mga donasyon.

“Mga Lingkoranan Libre. Walay Koleksiyon”

Ingon ka sayo sa ikaduhang isyu sa Watch Tower, niadtong Agosto 1879, si Brader Russell nag-ingon: “Ang ‘Zion’s Watch Tower,’ sa among pagtuo, adunay tigpaluyo nga mao si JEHOVA, ug samtang mao kini ang kaso kana dili gayod magpakilimos ni mohangyo sa mga tawo alang sa suportar. Sa dihang Siya nga nagaingon: ‘Ang tanang bulawan ug salapi sa kabukiran akoa,’ dili makahatag sa kinahanglanong salapi, among sabton nga panahon na nga ihunong ang publikasyon.” Uyon niini, walay pagpakilimos ug salapi nga ipahibalo sa literatura sa mga Saksi ni Jehova.

Kon unsay tinuod mahitungod sa ilang literatura mao usab ang kamatuoran mahitungod sa ilang mga tigom. Walay emosyonal nga mga pagpangayog salapi diha sa mga kongregasyon o sa ilang mga kombensiyon. Walay ipasa nga mga plato aron mangolekta; walay iapod-apod nga mga sobre aron sudlan ug salapi; walay ipadala nga sulat aron mangayog salapi sa mga membro sa kongregasyon. Ang mga kongregasyon dili gayod mogamit ug binggo o mga ripa aron makapatunghag salapi. Ingon ka sayo sa 1894, sa dihang ang Watch Tower Society nagpadala ug nagapanawng mga mamumulong, kana nagluwat niining pahibalo alang sa kaayohan sa tanan: “Kinahanglang masabtan sa pagsugod pa nga ang mga koleksiyon o pagpangayog salapi wala itugot ni uyoni niining Sosyedara.”

Mao nga, sukad sa sinugdan sa ilang modernong-adlaw nga kasaysayan, ang mga pulyeto ug ubang napatik nga mga imbitasyon sa publiko aron motambong sa mga tigom sa mga Saksi ni Jehova nagdala sa eslogang “Mga Lingkoranan Libre. Walay Koleksiyon.”

 Sugod sa sayo niadtong 1914, ang mga Estudyante sa Bibliya nag-abang ug mga sinehan ingon man sa ubang mga awditoryum ug midapit sa publiko sa pagtan-aw sa “Photo-Drama of Creation.” Kini maoy upat-ka-bahin nga pagpasalida, walo ka oras tanantanan, nga gilangkoban ug mga slayd ug pelikulang dinuyogan ug tingog. Sa unang tuig lamang, minilyong tawo ang nakakita niana sa Amerika del Norte, Uropa, Australia, ug New Zealand. Bisan tuod ang pila ka tag-iya sa sinehan nagpabayad sa reserbang mga lingkoranan, ang mga Estudyante sa Bibliya wala gayod mangayog pulta. Ug walay mga koleksiyon ang gihimo.

Sa ulahi, sulod sa kapin sa 30 ka tuig, ang Watch Tower Society nagdumala sa estasyong WBBR sa radyo sa Siyudad sa New York. Ang mga Saksi ni Jehova usab migamit sa mga serbisyo sa ginatos ka ubang estasyon aron isibya ang mga programa sa edukasyon sa Bibliya. Apan wala gayod nila gamita ang maong mga pagsibya sa pagpangayog salapi.

Nan, sa unsang paagi ang mga donasyon nga nagasuportar sa ilang kalihokan nabatonan?

Gisuportahan sa Boluntaryong mga Donasyon

Ang Bibliya naghatag ug hularan. Ubos sa Moisesnong Kasugoan, may kontribusyon nga boluntaryo. Ang uban gibaod sa mga tawo. Ang paghatag ug ikapulo, o ikanapulong bahin, maoy usa ka kinahanglanon. (Ex. 25:2; 30:​11-16; Num. 15:​17-21; 18:​25-32) Apan ang Bibliya usab nagpakita nga si Kristo nakatuman na sa Kasugoan, ug kana gitapos na sa Diyos; busa ang mga Kristohanon dili na obligado sa mga lagda niini. Sila walay ikapulo, ni sila obligado sa paghatag ug bisan unsang ubang kontribusyon nga may tinong kantidad o sa partikular nga panahon.​—Mat. 5:17; Roma 7:6; Col. 2:​13, 14.

Inay, sila gidasig sa pag-ugmad sa espiritu sa kamanggihatagon ug sa pagkaliberal sa pagsundog sa kahibulongang panig-ingnan nga gihimo ni Jehova mismo ug sa iyang Anak, si Jesu-Kristo. (2 Cor. 8:​7, 9; 9:​8-15; 1 Juan 3:​16-18) Mao nga, kon bahin sa pagpanghatag, ang apostol nga si Pablo nagsulat ngadto sa Kristohanong kongregasyon sa Corinto: “Pasagdi nga ang matag usa mohatag sumala sa gimbut-an sa iyang kasingkasing, dili nga magapanuko ni ingon nga pinugos, kay ang Diyos nagahigugma sa malipayong maghahatag.” Sa dihang gipahibalo sa panginahanglan, kana nagsilbi alang kanila ‘nga pagsulay sa katinuod sa ilang gugma,’ sama sa giingon ni Pablo. Siya usab nag-ingon: “Kon anaa ang kaandam, kana ilabinang dalawaton sumala sa nabatonan sa usa, dili sumala sa wala niya mabatoni.”​—2 Cor. 8:​8, 12; 9:7.

Tungod niana, ang komento ni Tertullian mahitungod sa mga tigom nga gihimo sa mga tawong nagtinguha sa pagtuman sa Kristiyanidad sa iyang adlaw (mga 155–human sa 220 K.P.) makaiikag. Siya nagsulat: “Bisan pag dunay usa ka matang sa panudlanan, kana walay sulod nga salapi nga bayad sa pagpamembro, nga mora bag ang relihiyon usa ka kontrata. Ang matag usa kada bulan  modala ug igoigong salapi​—o bisag kanus-a nga iyang gusto, ug kon buot lamang niya, ug kon siya makaarang; kay walay mausa ang gipugos; kana usa ka boluntaryong halad.” (Apology, XXXIX, 5) Hinuon, sulod sa mga siglo sukad niadto ang mga simbahan sa Kakristiyanohan naghimo sa tanang mahunahunaang pamaagi sa pagpanapi aron masuportahan ang ilang mga kalihokan.

Si Charles Taze Russell midumili sa pagsundog sa mga simbahan. Siya misulat: “Kini maoy among opinyon nga ang salapi nga mapatungha sa nagkalainlaing pamaagi sa pagpangayo sa ngalan sa Ginoo maoy dulumtanan, dili dalawaton kaniya, ug dili magdala sa iyang panalangin nganha sa mga maghahatag o sa buluhaton nga napalampos.”

Inay mosulay sa paglana sa mga sapian aron mapaboran, si Brader Russell tin-awng mipahayag, nga uyon sa Kasulatan, nga kadaghanan sa katawhan sa Ginoo maoy kabos sa mga butang sa kalibotan apan dato sa pagtuo. (Mat. 19:​23, 24; 1 Cor. 1:​26-29; Sant. 2:5) Inay ipasiugda ang panginahanglan sa salapi aron mapakaylap ang kamatuoran sa Bibliya, iyang gipunting ang pagtagad sa kahinungdanon nga ugmaron ang espiritu sa gugma, ang tinguha sa paghatag, ug ang tinguha sa pagtabang sa uban, ilabina pinaagi sa pagpaambit sa kamatuoran kanila. Alang niadtong maayong mangitag kuwarta ug kinsa misugyot nga pinaagi sa paghatag nilag bug-os nga pagtagad sa negosyo sila makaamot ug dakong salapi, siya miingon nga labi pang maayo nga limitihan ang maong kalihokan ug ihatag ang ilang bug-os nga pagtagad ug ang ilang panahon sa pagpakaylap sa kamatuoran. Kana gihapon ang baroganan sa Nagamandong Lawas sa mga Saksi ni Jehova. a

Sa pagkatinuod, unsa ka dako ang ihatag sa mga tawo? Kon unsay ilang ginahatag maoy personal nga desisyon. Ugaling, mahitungod sa pagpanghatag, angayng hinumdoman nga ang mga Saksi ni Jehova wala lamang maghunahuna sa materyal nga mga butang. Sa ilang distritong mga kombensiyon niadtong 1985-86, ilang gihisgotan ang ulohang “Pagpasidungog Kang Jehova Pinaagi sa Atong Bililhong mga Butang.” (Prov. 3:9) Gipasiugda nga kining bililhong mga butang naglakip dili lamang sa materyal nga mga kabtangan apan usab sa pisikal, mental, ug espirituwal nga mga butang.

Balik niadtong 1904, si Brader Russell mipunting nga ang usa ka tawo nga bug-os nakonsagrar (o, napahinungod, sumala sa atong pagtawag karon) sa Diyos “nakahatag na sa tanan niyang nabatonan ngadto sa Ginoo.” Mao nga, karon iya nang “isipon ang iyang kaugalingon ingong tinudlo sa Ginoo nga piniyalan sa iyang kaugalingong panahon, impluwensiya, salapi, ubp., ug ang matag usa magtinguha sa paggamit niini nga mga kabatid kutob sa iyang maarangan, alang sa himaya sa Agalon.” Siya midugang nga, kay giniyahan sa kaalam gikan sa itaas, “sa proporsiyon samtang ang iyang gugma ug kasibot alang sa Ginoo nagatubo sa proporsiyon kada adlaw pinaagi sa kahibalo sa Kamatuoran ug sa pagkabaton sa iyang espiritu, iyang makaplagan ang iyang kaugalingon nga dugang ug dugang pang nagahatag sa iyang panahon, dugang ug dugang pa sa iyang impluwensiya, ug dugang ug dugang pa sa iyang katigayonan, sa pag-alagad sa Kamatuoran.”​—Studies in the Scriptures, “The New Creation,” mga panid 344-5.

 Niadtong sayong katuigan, ang Watch Tower Society may Tower Tract Fund. Unsa man kana? Ang mosunod nga makaiikag nga mga pulong maoy nasulat sa likod sa papel nga usahay gamiton ni Brader Russell: “Kining salapia mao ang kinabubut-ong mga halad niadtong napakaon ug napalig-on sa ‘pagkaon sa tukmang panahon’ nga ginatanyag sa mga publikasyon sa ibabaw [nga gitagana sa Watch Tower Society], ingong mga instrumento sa Diyos, sa atubangan sa konsagradong mga balaan, sa tibuok kalibotan.

“Kining pondong salapi gigamit kanunay sa pagpadala, nga libre, sa linibong kopya sa ZION’S WATCH TOWER ug OLD THEOLOGY TRACTS nga maoy labing angayan sa bag-ong mga magbabasa. Kana usab nagtabang sa pagpang-apod-apod sa papel-ug-hapin nga mga edisyon sa seryeng DAWN, pinaagi sa pagtabang niadtong andam sa pag-apod-apod niana​—ang mga colporteur ug uban pa. Kana usab nagtaganag ‘pondo sa kabos’ nga pinaagi niana ang bisan kinsang anak sa Ginoo nga, tungod sa pangedaron, o sakit, o gumikan sa ubang hinungdan, dili makaarang sa pagsuskriber sa WATCH TOWER nga magasin mapadalhan ug libre, sa kondisyon nga sila mopadalag sulat o kard sa pagsugod sa kada tuig, nga mopahibalo nga sila gusto apan dili makaarang.

“Walay usa ang sukad gihangyo sa pag-amot alang niining pondoha: ang tanang donasyon kinahanglang boluntaryo. Gipahinumdoman namo ang among mga magbabasa sa mga pulong sa Apostol (1 Cor. 16:​1, 2) ug gipamatud-an kana pinaagi sa pagsulti nga kadtong makahatag ug sa tinuod naghatag alang sa pagpakaylap sa kamatuoran seguradong pagabayran sa espirituwal nga mga panalangin.”

Ang tibuok-yutang kalihokan sa mga Saksi ni Jehova sa pagmantala sa maayong balita sa Gingharian sa Diyos padayon nga gisuportahan sa boluntaryong mga donasyon. Gawas pa sa mga Saksi, daghang mapabilhong interesadong mga tawo ang nag-isip nga usa ka pribilehiyo ang pagsuportar niining Kristohanong buluhaton pinaagi sa ilang boluntaryong mga kontribusyon.

Pinansiyal nga Pagsuportar sa Lokal nga mga Tigomanan

Ang matag kongregasyon sa mga Saksi ni Jehova may angayng mga kahon sa kontribusyon diin ang mga tawo makahulog sa bisan pilang donasyon nga ilang gusto​—sa dihang buot nila ug kon sila makaarang. Kana himoon sa pribadong paagi aron ang uban sa kasagaran dili mahibalo kon pila ang mahimong ihulog sa usa. Kana maoy tali kaniya ug sa Diyos.

Walay gisuholan, apan kinahanglan ang salapi sa pag-atiman sa tigomanan. Aron matagan-an kanang panginahanglana, ang mga membro sa kongregasyon angayng pahibaloon. Hinuon, kapin sa 70 ka tuig sa miagi, ang The Watch Tower mipatin-aw nga kon bahin sa mga kontribusyon, kinahanglang walay pagpakiluoy o pangagda​—usa ka yano, matinud-anon lamang nga pahibalo sa panginahanglan. Uyon niining panglantawa, ang mga tigom sa kongregasyon dili kanunay maglakip sa panaghisgot sa pinansiyal nga mga butang.

Hinuon, usahay may espesyal nga mga panginahanglan. Mahimong may mga plano nga ayohon o padak-an ang Kingdom Hall o tingali magtukod ug bag-o. Aron tinoon ang mahimong matigom nga salapi, ang mga ansiano tingali mohangyo sa mga membro sa kongregasyon nga isulat sa papel kon pila ang madahom  sa matag indibiduwal nga idonar ngadto sa proyekto o, tingali, ipagamit sulod sa ubay-ubayng katuigan. Dugang pa, ang mga ansiano mahimong mohangyo nianang mga indibiduwala o mga pamilyaha nga isulat sa papel kon pila ang ilang gibati nga maarangang ikaamot kada semana o kada bulan, uban sa panalangin ni Jehova. Dili isulat ang ngalan. Kini dili gipanaad nga balayran, apan kana makahatag ug pasikaranan alang sa intelihenteng pagplano.​—Luc. 14:​28-30.

Sa Tarma, Liberia, ang kongregasyon nakabaton sa gikinahanglang salapi sa morag lahi nga paagi. Ang pipila diha sa kongregasyon nagbasak alang sa usa ka Saksi sa iyang umahan samtang siya migugol ug usa ka tuig sa pagpamutol ug mga kahoy ug gilaras kana, nga unya gibaligya aron makakuwarta alang sa proyekto sa tinukod. Sa Paramaribo, Suriname, bisan tuod ang materyales kinahanglang paliton, ang kongregasyon wala na magkinahanglan ug salapi alang sa yuta, kay usa ka Saksi midonar sa iyang yuta alang sa Kingdom Hall ug mihangyo lamang nga ang iyang balay ibalhin sa likod sa propiedad. Ang taas kaayong mga prisyo sa yuta sa Tokyo, Hapon, nakapalisod sa mga kongregasyon didto sa pagpalit ug yuta nga matukoran ug mga Kingdom Hall. Aron makatabang sa pagsulbad niining sulirana, pipila ka pamilya ang nagpagamit sa yuta nga gibarogan sa ilang kaugalingong mga balay. Mihangyo lamang sila nga human pulihi ug bag-ong Kingdom Hall ang ilang balay, sila tagan-an lang ug apartment sa ibabaw.

Samtang ang mga kongregasyon mitubo ug gitunga, kadtong anaa ra sa usa ka dapit sa subsob magtinabangay aron makatagana ug maayong mga Kingdom Hall. Bisan pa nianang espiritu sa kamanggihatagon, usa pa ka butang ang gikinahanglan. Ang mga bili sa propiedad ug ang mga gasto sa pagtukod misulbong, ug ang indibiduwal nga mga kongregasyon sa subsob nakadiskobre nga dili kana maarangan. Unsay mahimo?

Sa “Panaghiusa sa Gingharian” nga Distritong Kombensiyon niadtong 1983, ang Nagamandong Lawas naglarawg kahikayan nga nagkinahanglan sa pagpadapat sa prinsipyo sa 2 Corinto 8:​14, 15, nga nagdasig nga ang sobra niadtong adunahan motabon sa kakulang sa uban aron nga ang “panag-angay molungtad.” Sa ingon kadtong may diyutay dili makulangan nga mababagan na hinuon ang ilang mga paningkamot sa pag-alagad kang Jehova.

Ang matag kongregasyon gidapit sa paghikay ug usa ka kahon nga may markang “Mga Amot Alang sa Pondo sa Kingdom Hall sa Sosyedad.” Ang tanang ihulog sa kahon gamiton lamang alang nianang katuyoana. Ang salapi nga giamot sa tibuok nasod mahimong andam aron matabonan ang kakulang sa mga kongregasyon nga nagkinahanglan gayod ug Kingdom Hall apan dili makahikay niana sa lokal tungod sa lisod nga mga kondisyon nga gikinahanglan sa lokal nga mga bangko. Human sa maampingong pagsurbi aron tinoon kon diin ang panginahanglan mas dinalian, ang Sosyedad nagsugod sa pagpagamit nianang kuwartaha sa mga kongregasyon nga nanginahanglan sa pagtukod o sa laing paagi makabaton ug bag-ong mga Kingdom Hall. Samtang ang dugang nga mga kontribusyon nadawat (sa kayutaan diin kana mahimo) ug nabayran ang mga gipahulam, dugang pang mga kongregasyon ang natabangan.

Kining kahikayana naglihok una sa Tinipong Bansa ug Canada, ug sukad niadto kana mikaylap sa kapin sa 30 ka kayutaan sa Uropa, Aprika, Latin Amerika, ug Halayong Sidlakan. Sa pagka 1992, sa walo lamang nianang mga yutaa, natagana  na ang salapi sa pagtabang sa pagtukod ug 2,737 ka Kingdom Hall, nga gigamit sa 3,840 ka kongregasyon.

Bisan sa kayutaan diin wala kining kahikayana, apan diin may dinaliang panginahanglan alang sa mga Kingdom Hall nga dili magastohan sa lokal, ang Nagamandong Lawas naningkamot sa paghimo ug ubang mga kahikayan aron maseguro nga ang tabang gikatagana. Sa ingon ang pag-angay-angay mahitabo, aron nga kadtong may diyutay dili makulangan.

Pag-atiman sa Pagpalapad sa Hedkuwarter sa Tibuok Kalibotan

Ang pagpalihok sa hedkuwarter sa kalibotan nagkinahanglan usab ug salapi. Human sa Gubat sa Kalibotan I, sa dihang ang Watch Tower Bible and Tract Society nakadiskobre nga mas makaayo ang pag-imprinta ug pagtagik sa iyang kaugalingong mga libro, gihimo ang kahikayan nga makapalit sa gikinahanglang makinarya sa ngalan sa pribadong mga tawo​—isigkaalagad ni Jehova. Inay paganansiyahon ang komersiyal nga kompaniya sa paggama sa mga libro, ang Sosyedad mipadapat nianang kantidara kada bulan aron madatahan ang makinarya. Samtang ang mga kaayohan niini nabatonan, ang bili sa kadaghanan sa literatura alang sa publiko nakibrahan ug katunga. Ang gibuhat maoy alang sa pagpauswag sa pagwali sa maayong balita, dili aron sa pagpadato sa Watch Tower Society.

Sa pipila ka tuig, dayag nga ang hedkuwarter sa kalibotan nagkinahanglan ug dagkong mga pasilidad aron maatiman ang tibuok-kalibotang buluhaton sa pagwali sa Gingharian. Sa makadaghan, samtang ang organisasyon nagtubo ug ang pagwaling kalihokan gipakusgan, nahimong kinahanglanon nga dugangan kining mga pasilidara. Inay kay modagan sa mga bangko alang sa gikinahanglang salapi sa pagpadako ug sa pagsangkap sa mga buhatan ug mga pabrika sa hedkuwarter ingon man sa suportar nga mga pasilidad diha sa sulod ug kasikbit sa New York, ang Sosyedad nagpahibalo sa panginahanglan ngadto sa mga igsoon. Kini gihimo, dili sa kanunay, apan 12 ka beses lamang latas sa kapin sa 65 ka tuig.

Wala gayoy pagpangayo. Ang bisan kinsa nga gustong modonar gidapit sa paghimo niana. Kadtong mipili sa pagpahulam gipasaligan nga panahon sa wala damha ug dinaliang panginahanglan, ang ilang gipahulam ibalik inigkadawat sa ilang hangyo niana. Mao nga sa iyang pagdumala sa mga butang, ang Sosyedad naningkamot nga malikayan nga makahatag ug bisan unsang kalisod sa mga indibiduwal ug mga kongregasyon nga sa kamaluluton nagpagamit o nagpahulam ug salapi. Ang suportar nga gihatag sa mga Saksi ni Jehova pinaagi sa ilang mga kontribusyon kanunayng nakapaarang sa Sosyedad sa pagbayad sa tanang gihulam. Ang maong mga kontribusyon nga gipadala sa Sosyedad wala dawata nga walay pasalamat. Kutob sa mahimo, kini gipahibalo nga nadawat pinaagig mga sulat ug ubang mga pahayag sa apresasyon.

Ang buluhaton sa organisasyon wala magpadayon tungod sa mga donasyon sa usa ka grupo sa adunahang mga tigdonar. Ang kadaghanan sa mga kontribusyon naggikan sa mga indibiduwal nga may kasarangan lamang nga pangabuhian​—kadaghanan kanila, may diyutay lamang nga mga butang niining kalibotana. Nalakip maoy mga bata nga buot makig-ambit niining paagiha sa pagsuportar sa buluhaton sa Gingharian. Ang mga kasingkasing sa tanang nagdonar napalihok sa halalom nga apresasyon sa kaayo ni Jehova ug sa tinguha nga makatabang sa  uban nga makakat-on sa iyang maluloy-ong mga tagana.​—Itandi ang Marcos 12:​42-44.

Pagsuportar sa Panalapi sa Pagpalapad sa mga Pasilidad sa Sanga

Samtang ang pagwaling-buluhaton sa Gingharian nagkadako sa lainlaing dapit sa kalibotan, kinahanglan nang padak-an ang mga pasilidad sa sanga sa organisasyon. Kini gihimo ubos sa pagtultol sa Nagamandong Lawas.

Mao nga, human susihag-balik ang mga rekomendasyon gikan sa sanga sa Alemanya, ang mga direksiyon gihatag niadtong 1978 aron mangita ug angay nga propiedad ug unya magtukod ug bug-os bag-ong mga tinukod. Ang Alemang mga Saksi ba makaarang sa galastohan nga nalangkit? Ang kahigayonan gihatag kanila. Sa pagkahuman sa proyekto niadtong 1984, sa Selters, sa kasadpang ngilit sa Kabukiran sa Taunus, ang sangang buhatan nagtaho: “Tinagpulo ka libong Saksi ni Jehova​—dato ug kabos, bata ug tigulang​—nag-amot ug minilyong dolyares aron makatabang sa pagbayad alang sa bag-ong mga pasilidad. Tungod sa ilang kamanggihatagon, ang tibuok proyekto mahimong taposon nga dili na kinahanglang manghulam ug salapi gikan sa kalibotanong mga ahensiya o mangutang pa.” Dugang pa, mga 1 sa matag 7 ka Saksi sa Pederal nga Republika sa Alemanya nakig-ambit sa aktuwal nga buluhaton sa konstruksiyon sa Selters/Taunus.

Sa pila ka ubang kayutaan, ang lokal nga ekonomiya o ang pinansiyal nga kahimtang sa mga Saksi ni Jehova nakapalisod niana pag-ayo, gani imposible, nga sila makatukod sa gikinahanglang mga sangang buhatan sa pagdumala sa buluhaton o sa mga pabrika diin ginapatik ang literatura sa Bibliya sa lokal nga mga pinulongan. Ang mga Saksi sulod sa nasod gihatagan ug kahigayonan sa paghimo kutob sa ilang maarangan. (2 Cor. 8:​11, 12) Apan ang kakulang sa salapi sa usa ka nasod wala itugot nga makababag sa pagpakaylap sa mensahe sa Gingharian didto kon ang gikinahanglang panalapi mabatonan sa ubang dapit.

Mao nga, samtang ang lokal nga mga Saksi naghimo kutob sa ilang maarangan, sa dakong bahin sa kalibotan ang dakong kantidad sa salapi nga gikinahanglan alang sa mga tinukod sa sanga gitagana pinaagi sa mga donasyon sa mga Saksi ni Jehova sa ubang kayutaan. Kana maoy nahitabo labot sa pagtukod ug dagkong mga tinukod nga nahuman sa Habagatang Aprika niadtong 1987, Nigeria niadtong 1990, ug sa Pilipinas niadtong 1991. Kana usab maoy nahitabo sa Zambia, diin ang umaabot nga mga pasilidad sa pag-imprinta gitukod pa niadtong 1992. Sa susama kana usab tinuod sa daghang mga proyekto nga mas gagmay, sama niadtong natapos sa India niadtong 1985; Chile niadtong 1986; Costa Rica, Ecuador, Guyana, Haiti, ug Papua New Guinea niadtong 1987; Ghana niadtong 1988; ug Honduras niadtong 1989.

Hinuon, sa pila ka kayutaan ang mga igsoon nahingangha sa ilang malampos sa lokal uban sa panalangin ni Jehova sa ilang nahiusang mga paningkamot. Sa sayong katuigang 1980, pananglitan, ang sanga sa Espanya nagplano ug dakong pagpalapad sa iyang mga pasilidad. Ang sanga mihangyo sa Nagamandong Lawas sa pagtagana sa gikinahanglang salapi. Apan tungod sa dakong galastohan sa ubang mga proyekto niadtong tungora, ang maong tabang niadto dili pa mabatonan. Kon hatagan ug kahigayonan, ang Espanyol ba nga mga Saksi, tungod sa  ilang gamayng mga suweldo, makatagana ug igong salapi alang sa maong proyekto?

Ang kahimtang gipatin-aw kanila. Malipayon silang nagdonar sa ilang mga alahas, mga singsing, ug mga pulseras aron kana ikabaligya. Sa dihang ang usa ka edarang Saksi gisukna kon segurado ba nga gusto gayod niyang idonar ang iyang bug-at nga bulawang pulseras nga iyang giamot, siya mitubag: “Brader, mas dako kanag mahimo sa pagsuportar sa usa ka bag-ong Bethel kay sa pagpabilin sa akong kamot!” Usa ka tigulang nga igsoong babaye mikalot sa iyang daan na kaayong salapi nga iyang gilubong sa ilalom sa salog sa katuigan. Ang mga magtiayon nag-amot sa salapi nga ilang gitigom alang sa mga bakasyon. Ang mga bata nagpadala sa ilang mga tinigom. Usa ka batan-on nga nagplanong mopalit ug sista midonar hinuon sa salapi alang sa proyekto sa sanga. Sama sa mga Israelinhon sa panahon nga gitukod ang tabernakulo sa kamingawan, ang Espanyol nga mga Saksi napamatud-ang manggihatagon ug kinabubut-ong mga maghahatag sa tanang gikinahanglan sa materyal nga paagi. (Ex. 35:​4-9, 21, 22) Unya ilang gitanyag ang ilang kaugalingon​—sa bug-os panahon, sa panahon sa bakasyon, sa hinapos-semana​—sa pagpangamot sa buluhaton. Gikan sa tanang dapit sa Espanya sila nangabot​—linibo kanila. Ang ubang mga Saksi gikan sa Alemanya, Sweden, Gran Britanya, Gresya, ug sa Tinipong Bansa, sa paghisgot ug pipila, mikuyog kanila sa pagtapos sa trabaho nga sa sinugdan morag imposible.

May Ganansiya ba Gikan sa Literatura?

Sa pagka 1992, ang literatura sa Bibliya gipatik sa hedkuwarter sa kalibotan ug sa 32 ka sanga sa tibuok kalibotan. Daghan kaayo niana ang gitagana aron ipang-apod-apod sa mga Saksi ni Jehova. Apan walay mausa niana ang gihimo alang sa komersiyal nga ganansiya. Ang mga desisyon kon sa unsang mga pinulongan pagapatikon ang literatura ug kon unsang mga nasod  ang padalhan gihimo dili alang sa bisan unsang komersiyal nga bentaha kondili tungod lamang sa paghunahuna nga matuman ang buluhaton nga giasayn ni Jesu-Kristo sa iyang mga sumusunod.

Ingon ka sayo sa Hulyo 1879, sa dihang ang kinaunahang isyu sa Watch Tower gipublikar, kana nagdala ug pahibalo nga nagaingon nga kadtong kabos kaayo nga dili makabayad alang sa suskrisyon (kaniadto 50¢, U.S., matag tuig) makadawat niana nga libre kon sila mosulat lamang sa paghangyo. Ang pangunang tumong mao ang pagtabang sa mga tawo nga makakat-on mahitungod sa dakong katuyoan ni Jehova.

Sa maong katuyoan, sukad sa 1879 daghan kaayong literatura sa Bibliya ang naapod-apod sa publiko nga walay bayad. Niadtong 1881 ug human niadto, duolan sa 1,200,000 ka kopya sa Food for Thinking Christians ang giapod-apod nga libre. Kadaghanan niana maoy sa porma sa 162-panid nga libro; ang uban, sa pormang sama sa mantalaan. Ubay-ubayng mga pulyeto sa nagkalainlaing sukod ang gipatik sa misunod nga katuigan. Ang kadaghanan niana (sa literal ginatos ka milyong kopya) ang giapod-apod nga walay bayad. Ang gidaghanon sa mga tract ug ubang mga publikasyon nga gipanghatag padayon nga nagauswag. Niadtong 1915 lamang, ang taho nagpakita nga 50,000,000 ka kopya sa tract diha sa mga 30 ka pinulongan ang gitagana aron iapod-apod nga libre sa tibuok kalibotan. Diin gikan ang salapi alang nianang tanan? Sa kinadak-an gikan sa boluntaryong mga donasyon ngadto sa Society’s Tract Fund.

Dihay literatura usab nga gitanyag nga may kontribusyon sa sayong mga dekada sa kasaysayan sa Sosyedad, apan ang gisugyot nga kontribusyon gipaubsan kutob sa mahimo. Kining literaturaha naglakip sa mga libro nga dihay 350 ngadto sa 744 ka panid. Sa dihang ang mga colporteur sa Sosyedad (ingon sa pagtawag kaniadto sa bug-os-panahong mga magwawali) mitanyag niana sa publiko, ilang gipahibalo ang gisugyot nga kontribusyon. Hinuon, ang ilang tumong maoy dili sa pagpanapi kondili sa pagpaabot sa mga kamatuoran sa Bibliya sa mga kamot sa katawhan. Gusto nilang mabasa sa mga tawo ang literatura ug makakuhag kaayohan gikan niana.

Sila andam kaayo nga mohatag sa literatura sa usa ka tawo (nga taplan na lang nila ang kontribusyon) kon ang tagbalay kabos. Apan namatikdan nga daghang tawo ang mas nakiling sa pagbasa sa usa ka publikasyon kon may gihatag sila nga kantidad alang niana, ug ang ilang maamot, siyempre, magamit sa pag-imprinta ug dugang literatura. Bisan pa, sa pagpasiugda sa kamatuoran nga ang mga Estudyante sa Bibliya wala magtinguha sa pinansiyal nga ganansiya, ang sulat sa instruksiyon sa pag-alagad sa Sosyedad, ang Bulletin, sa Oktubre 1, 1920, miingon: “Napulo ka adlaw human mapahimutang ang pulyeto [nga may 128 ka panid], duawon pag-usab ang mga tawo ug tinoon kon nabasa nila kana. Kon wala pa nila mabasa, hangyoa nga ilang iuli ang libro ug ibalik ang ilang salapi. Suginli sila nga ikaw dili ahente sa libro, kondili nga ikaw interesado sa paghatag niining mensahe sa kahupayan ug kalipay alang sa tanan, ug nga kon sila dili kaayo interesado sa usa ka kamatuoran nga suod kaayong naglangkit kanila . . . , gusto nimong ipahimutang ang libro sa tawo nga mahimong interesado.” Ang mga Saksi ni Jehova wala magpadayon nianang paagiha, kay ilang nakaplagan nga ang ubang membro sa pamilya usahay mobasa sa literatura ug makakuhag kaayohan gikan niana;  apan kon unsay gihimo kaniadto nagpasiugda sa tinuod nga tumong sa mga Saksi.

Sa daghang tuig sila nagtawag sa ilang pag-apod-apod ug literatura ingong “pamaligya.” Apan kanang terminoha nakapahinabog pipila ka kalibog, ug busa sugod niadtong 1929, kana inanay nga giwala. Ang termino wala gayod mohaom sa ilang kalihokan, kay ang ilang buluhaton dili man komersiyal. Ang ilang tumong maoy dili pagpanapi. Ang ilang bug-os nga motibasyon mao ang pagwali sa maayong balita sa Gingharian sa Diyos. Tungod niini, niadtong 1943 ang Korte Suprema sa Tinipong Bansa mihukom nga ang mga Saksi ni Jehova dili mabaoran nga mokuhag lisensiya sa komersiyal nga suroy-pamaligya una pa mag-apod-apod sa ilang literatura. Ug ang Canadianhong hukmanan human niadto mikutlo nga mauyonon sa pangatarongan nga gihimo sa Korte Suprema sa T.B. bahin nianang desisyona. b

Sa daghang kayutaan ang mga Saksi ni Jehova regular nga nagatanyag sa ilang literatura nga may kontribusyon. Ang gisugyot nga kontribusyon gamay kaayo, kon itandi sa ubang mga libro ug magasin, nga daghang tawo ang moamot ug dako pa. Apan dakong paningkamot ang gihimo sa bahin sa organisasyon aron magpabilin nga gamay ang gisugyot nga kontribusyon aron kana maabot sa daghang minilyon sa katawhan nga kabos kaayo sa mga butang niining kalibotana apan kinsa mapasalamaton nga modawat ug Bibliya o literatura sa Bibliya. Hinuon, ang tumong sa pagsugyot ug kontribusyon, maoy dili alang sa pagpadato sa organisasyon sa mga Saksi ni Jehova.

Sa bisan asang nasod nga sabton sa balaod ang bisan unsang pag-apod-apod sa literatura sa Bibliya ingong komersiyal kon ang nagapang-apod-apod mosugyot ug kontribusyon alang sa literatura, ang mga Saksi ni Jehova malipay nga magbilin niana kang bisan kinsa nga mopakita ug interes ug mosaad sa pagbasa niana. Kadtong gustong modonar aron mapauswag ang buluhaton sa edukasyon sa Bibliya makahatag ug bisan pila nga gusto nila. Kana maoy ginahimo, pananglitan, sa Hapon. Sa Switzerland, niining bag-o lang, ang kontribusyon alang sa literatura mahimong dawaton, apan kutob lamang sa gipahayag nga kantidad; busa kon ang mga tagbalay gustong mohatag ug sobra, sa yano ibalik sa Saksi ang sobra o hatagan ang tagbalay ug dugang literatura. Ang ilang tinguha maoy, dili ang pagkolekta ug salapi, apan ang pagsangyaw sa maayong balita sa Gingharian sa Diyos.

Niadtong 1990, tungod sa nabaniog kaayong mga eskandalo sa pinansiyal sa pila ka relihiyon sa Kakristiyanohan, inubanan sa nagatubo nga kiling sa mga kagamhanan sa pag-isip sa relihiyosong kalihokan ingong komersiyal nga negosyo, ang mga Saksi ni Jehova naghimo ug pila ka kausaban sa ilang kalihokan aron malikayan ang sayop nga pagsabot. Ang Nagamandong Lawas nagdireher nga sa Tinipong Bansa, ang tanang literatura nga gipang-apod-apod sa mga Saksi​—mga Bibliya, ingon man sa mga tract, pulyeto, magasin, ug mga libro nga nagapatin-aw sa Bibliya​—ihatag sa mga tawo sa kondisyon lamang nga ila kanang basahon, nga walay isugyot nga kontribusyon. Ang kalihokan sa mga Saksi ni Jehova dili gayod komersiyal, ug kining kahikayana dugang nagpalahi kanila gikan sa relihiyosong  mga grupo nga nagnegosyo sa relihiyon. Siyempre, ang kadaghanan sa mga tawo nasayod nga kinahanglan ug salapi aron makaimprinta sa maong literatura, ug kadtong nagpabili sa serbisyo nga gihimo sa mga Saksi tingali gustong modonar ug salapi aron makatabang sa buluhaton. Gipatin-aw sa maong mga tawo nga ang tibuok-kalibotang buluhaton sa edukasyon sa Bibliya nga gidumala sa mga Saksi ni Jehova gisuportahan sa boluntaryong mga donasyon. Ang mga donasyon gidawat nga malipayon, apan kana wala pangayoa.

Kadtong makig-ambit sa ministeryo sa kanataran wala maghimo niana alang sa pinansiyal nga ganansiya. Ilang gidonar ang ilang panahon, ug sila nagagasto sa ilang transportasyon. Kon ang usa ka tawo magpakitag interes, sila maghikay sa pagbalik kada semana, nga wala gayoy bayad, aron sa paghatag ug personal nga instruksiyon diha sa Bibliya. Gugma lamang alang sa Diyos ug alang sa ilang isigkatawo ang makapalihok kanila sa pagpadayon sa paghimo sa maong buluhaton, bisan pa sa subsob nga kawalay-pagtagad ug dayag nga pagsupak.

Ang mga salapi nga nadawat sa hedkuwarter sa kalibotan sa mga Saksi ni Jehova o sa iyang mga sangang buhatan gigamit, dili aron madato ang organisasyon o si bisan kinsang indibiduwal, apan aron palamboon ang pagwali sa maayong balita. Balik niadtong 1922, ang The Watch Tower nagtaho nga tungod sa lisod nga ekonomiya sa Uropa, ang mga librong giimprinta didto alang sa Sosyedad sa kinadak-an gigastohan sa buhatan sa Amerika ug subsob gipahimutang sa mga tawo nga dili pa makauli sa gasto. Bisan tuod ang mga Saksi ni Jehova karon nagapalakaw ug mga imprintahanan sa daghang kayutaan, ang pila ka nasod nga padad-an sa literatura dili makaarang sa pagpadala sa gawas sa nasod ug salapi nga makapasig-uli sa gastos. Ang dagaya nga boluntaryong mga donasyon sa mga Saksi ni Jehova sa kayutaan nga may daghang katigayonan ang nakatabang sa paghulip sa kakulang sa mga nasod nga kabos.

Ang Watch Tower Society kanunay nga naningkamot sa paggamit sa tanang katigayonan nga nabatonan niini aron sa pagpalambo sa pagwali sa maayong balita. Niadtong 1915 ingong presidente sa Sosyedad, si Charles Taze Russell nag-ingon: “Ang atong Sosyedad wala magtinguha sa pagtigom ug yutan-ong bahandi, apan inay, hinuon, maoy usa ka institusyon nga nagagamit sa salapi niini. Bisan unsang tagana nga ipadala kanato sa Diyos nga wala pangayoa gitinguha nato nga gastohon nga maalamon kutob sa mahimo uyon sa Pulong ug sa Espiritu sa Ginoo. Dugay na kanhi atong gipahibalo nga sa dihang mahurot na ang pundo, ang kalihokan sa Sosyedad mohunong na usab; ug nga samtang ang pondo modako, ang mga kalihokan sa Sosyedad mouswag.” Ang Sosyedad tukmang nagpadayon sa paghimo niana.

Hangtod karong adlawa, ang organisasyon nagagamit sa salaping nabatonan sa pagpadala sa nagapanawng mga magtatan-aw aron sa pagpalig-on sa mga kongregasyon ug sa pagdasig kanila diha sa ilang publikong ministeryo. Kana nagapadayon sa pagpadalag mga misyonaryo ug mga graduwado sa Tunghaan sa Ministeryal nga Pagbansay sa kayutaan diin may espesyal nga panginahanglan. Kana nagagamit usab sa bisan unsang salapi nga mabatonan sa pagpadala ug espesyal nga mga payunir ngadto sa mga dapit nga may diyutay o walay pagsangyaw sa mensahe sa Gingharian. Ingon sa gitaho diha sa 1993 Yearbook of Jehovah’s Witnesses,  sulod sa miaging tuig sa pag-alagad, $45,218,257.56 (U.S.) ang nagasto nianang paagiha.

Wala Mag-alagad Tungod sa Personal nga Ganansiya

Walay bisan kinsang membro sa Nagamandong Lawas, opisyales sa legal nga ahensiya niana, o ubang iladong mga tawo nga nakig-uban sa organisasyon ang nakaganansiya sa pinansiyal gumikan sa buluhaton sa mga Saksi ni Jehova.

Mahitungod kang C. T. Russell, kinsa mialagad ingong presidente sa Watch Tower Society sulod sa kapin sa 30 ka tuig, usa sa iyang mga kauban ang misulat: “Ingong paagi sa pagtino kon kaha ang iyang gibuhat nahiuyon sa Kasulatan, ug usab ingon sa pagpasundayag sa iyang kaugalingong kasinsero, mihukom siya sa pagsulay sa pag-uyon sa Ginoo sama sa mosunod: (1) Ihatag ang iyang kinabuhi alang sa kawsa; (2) Gamiton ang iyang bahandi alang sa pagpakaylap sa buluhaton; (3) Dili mangolektag salapi sa tanang mga tigom; (4) Mosalig sa wala pangayoa nga mga kontribusyon (bug-os nga boluntaryo) sa pagpadayon sa buluhaton inigkahurot sa iyang bahandi.”

Inay nga gamiton ang relihiyosong kalihokan aron makabaton ug materyal nga bahandi alang sa iyang kaugalingon, si Brader Russell migamit sa iyang tanang katigayonan sa buluhaton sa Ginoo. Human sa iyang kamatayon gikataho sa The Watch Tower: “Iyang gideboto ang tanan niyang pribadong bahandi alang sa kawsa nga niana iyang gihatag ang iyang kinabuhi. Siya nagdawat ug gamayng kantidad nga $11.00 kada bulan alang sa iyang personal nga galastohan. Siya namatay, nga walay gibilin nga propiedad.”

Kon bahin niadtong mopadayon sa buluhaton sa Sosyedad, si Brader Russell mikondisyon diha sa iyang testamento: “Kon bahin sa suhol, ako nagtuo nga maalamong ipadayon ang gihimo sa Sosyedad sa nangagi kon bahin sa suweldo​—nga walay pagasuholan; nga ang igoigo lamang nga galastohon ang ihatag kanilang nagaalagad sa Sosyedad o sa bisan unsang buluhaton niini.” Kadtong mag-alagad sa balayng Bethel, sa mga buhatan, ug mga pabrika sa Sosyedad, ingon man ang iyang nagapanawng mga hawas, pagahatagan lamang ug pagkaon, puy-anan, ug kasarangang kantidad alang sa galastohan​—nga paigo sa dihadihang panginahanglan apan “walay igahatag . . . aron tigomon.” Kanang samang sukdanan mapadapat karong adlawa.

Kadtong gidawat alang sa espesyal bug-os-panahon nga pag-alagad sa hedkuwarter sa kalibotan sa mga Saksi ni Jehova tanan mipirma sa panaad sa kakabos, ingon sa gihimo sa tanang membro sa Nagamandong Lawas ug sa tanang ubang membro sa pamilyang Bethel didto. Kini wala magkahulogan nga sila magkinabuhi nga dili malipayon, nga walay bisan unsang kahamugaway. Apan kana nagkahulogan nga sila samang makabaton, nga walay pinalabi, sa igoigong mga tagana sa pagkaon, katulganan, ug pasig-uli sa gasto alang sa tanang anaa sa maong pag-alagad.

Mao nga ang organisasyon nagapadayon sa iyang buluhaton uban sa bug-os nga pagsalig sa tabang nga ginahatag sa Diyos. Nga wala pugsa apan ingong usa ka tinuod espirituwal nga panag-igsoonay nga moabot sa tanang bahin sa yuta, ang mga Saksi ni Jehova malipayong nagagamit sa ilang katigayonan sa pagtuman sa buluhaton nga gihatag kanila sa ilang halangdong langitnong Amahan, si Jehova.

[Mga footnote]

[Blurb sa panid 340]

“Ang pagpangayog salapi wala itugot ni uyoni niining Sosyedara”

[Blurb sa panid 342]

Ang pangunang gipasiugda mao ang kahinungdanon sa pagpaambit sa kamatuoran ngadto sa uban

[Blurb sa panid 343]

Usa ka yano, matinud-anon nga pahayag sa mga tinuod nga panghitabo

[Blurb sa panid 344]

Ang mga kongregasyon nagtinabangay sa usag usa aron makabaton sa gikinahanglang mga Kingdom Hall

[Blurb sa panid 345]

Ang kadaghanan sa mga kontribusyon naggikan sa mga indibiduwal nga may kasarangan lamang nga pangabuhian

[Blurb sa panid 348]

Daghan kaayong literatura ang giapod-apod nga walay bayad​—kinsay nagbayad alang niana?

[Blurb sa panid 349]

Sila malipay nga ibilin ang literatura kang bisan kinsa nga magpakitag tinuod nga interes ug mosaad sa pagbasa niana

[Blurb sa panid 350]

Unsay gihimo sa salapi nga gidonar?

[Blurb sa panid 351]

“Iyang gideboto ang tanan niyang pribadong bahandi alang sa kawsa nga niana iyang gihatag ang iyang kinabuhi”

[Kahon sa panid 341]

Ang Diyos Dili Magpakilimos

“Siya nga miingon, ‘Kon ako gigutom dili ko ikaw suginlan, kay ang kalibotan akoa ug ang kahupnganan niini. . . . Dili ako mokuha ug laking baka gikan sa imong balay, ni sa laking kanding gikan sa imong mga toril; kay ang tanang mananap sa kalasangan akoa man, ug ang mga baka sa linibo nga kabungtoran’ (Sal. 50:12, 9, 10), makaarang sa pagpadayon sa iyang dakong buluhaton nga dili magpakilimos alang sa salapi gikan man sa kalibotan o gikan sa iyang mga anak. Ni mopugos siya sa iyang mga anak sa pagsakripisyo sa bisan unsang butang diha sa iyang pag-alagad, ni modawat siya sa bisan unsang butang gikan kanila gawas sa malipayon, kinabubut-on nga halad.”​—“Zion’s Watch Tower,” Septiyembre 1886, p. 6.

[Kahon sa panid 347]

Ang mga Donasyon Dili Kanunayng Salapi

Ang mga Saksi sa halayong amihanan sa Queensland nangandam ug nagpadala sa dapit sa konstruksiyon sa Watch Tower sa Sydney, Australia, ug upat ka semitrailer nga puno sa maayong tabla nga kaniadto gibanabana nga mobili tali sa A$60,000 ug A$70,000.

Sa dihang ang pabrika sa Watch Tower sa Elandsfontein, Habagatang Aprika, gipadak-an, usa ka Indian nga igsoong lalaki ang mitelepono ug namalihog nga ilang kuhaon ang donasyon nga 500 ka sako (50 kilos kada usa) nga semento​—sa panahon nga nihit kana sa nasod. Ang uban mitanyag sa ilang mga trak aron gamiton sa Sosyedad. Usa ka Aprikanang igsoon mibayad sa usa ka kompaniya aron ihatod ang 15 ka metro-kubiko nga balas alang sa tinukod.

Sa Netherlands sa dihang ang bag-ong mga pasilidad sa sanga gitukod sa Emmen, daghang mga hiramenta ug mga sapot pangtrabaho ang gidonar. Usa ka igsoong babaye, bisan pag masakiton kaayo, migansilyo ug usa ka paris nga medyas delana alang sa matag trabahante sa panahon sa tingtugnaw.

Sa pagtukod ug bag-ong sangang buhatan ug umaabot nga imprintahanan sa Lusaka, Zambia, ang materyales sa konstruksiyon gipalit pinaagi sa salapi nga gihatag sa mga Saksi sa ubang kayutaan. Ang materyales ug hiramenta nga dili makuha sa lokal gihakot pinaagig trak sa Zambia ingong mga donasyon sa buluhaton didto.

Usa ka Saksi sa Ecuador, niadtong 1977, nagdonar ug 34 ka ektarya nga yuta. Dinhi ang Assembly Hall ug bag-ong mga tinukod sa sanga gitukod.

Ang lokal nga mga Saksi sa Panama mibukas sa ilang mga balay aron papuy-on ang boluntaryong mga trabahante; ang pipila nga may mga bus nagtaganag transportasyon; ang uban miambit sa pagpakaon sa 30,000 ka kan-anan nga gidalit sa dapit sa konstruksiyon.

Alang sa mga trabahante sa proyekto sa Arboga, Sweden, ang usa ka kongregasyon nagluto ug nagpadala ug 4,500 ka buok tinapay. Ang uban mipadala ug dugos, prutas, ug panam-is. Usa ka mag-uuma nga duol sa dapit tukoranan, bisan tuod dili Saksi, naghatag ug duha ka toneladang karot.