Kagamhanan

Kahubitan: Ang kahikayan sa paghimo ug pagpatuman sa mga balaod. Ang mga gobyerno sagad gimatangmatang sumala sa tinubdan ug gidak-on sa awtoridad niini. Si Jehova nga Diyos mao ang Unibersohanong Magmamando, kinsa nagahatag ug awtoridad diha sa uban sumala sa iyang kabubut-on ug katuyoan. Apan, si Satanas nga Yawa, ang unang rebelde sa pagkamagmamando ni Jehova, mao “ang magmamando sa kalibotan”—kini pinaagig pagtugot sa Diyos alang sa limitadong yugto sa panahon. Ang Bibliya nagahulagway sa globonhong sistema sa politikanhong pagmando ingong usa ka mapintas  nga mananap ug nag-ingon nga “ang dragon [Satanas nga Yawa] mihatag ngadto sa mananap sa iyang gahom ug sa iyang trono ug dakong pagbulot-an.”—Juan 14:30; Pin. 13:2; 1 Juan 5:19.

Posible ba alang sa mga tawo sa pagtukod ug kagamhanan nga magpatungha gayod ug dumalayong kalipay?

Unsa man ang ginapakita sa talaan sa tawhanong kasaysayan?

Eccl. 8:9: “Ang tawo nagmando sa tawo alang sa iyang kadaotan.” (Kini tinuod bisan tuod ang pipila ka gobyerno ug mga magmamando nagsugod pagmando uban sa hataas nga mga mithi.)

“Ang matag buhilaman nga nakalungtad na sa kataposan nahugno. Ang kasaysayan maoy usa ka sugilanon sa mga panlimbasog nga napakyas, o mga pangagpas nga wala matuman. . . . Busa, ingong usa ka historyano, ang usa kinahanglang magkinabuhi uban sa panabot sa pagkadimalikayan sa trahedya.”—Henry Kissinger, politikanhong siyentipiko ug propesor sa panggobyerno, ingon sa gikutlo diha sa The New York Times, Oktubre 13, 1974, p. 30B.

Unsay magapabalda sa tawhanong mga panlimbasog diha sa nataran sa panggobyerno?

Jer. 10:23: “O Jehova, ako nasayod kaayo nga ang dalan sa yutan-ong tawo wala diha sa iyang kaugalingon. Kini wala sa tawo nga molakaw sa pagtultol gani sa iyang lakang.” (Ang Diyos wala mag-awtorisar sa iyang tawhanong linalang sa paglaraw sa iyang kaugalingong dalan nga bulag gikan sa Diyos.)

Gen. 8:21: “Ang tuyo sa kasingkasing sa tawo maoy daotan sukad pa sa iyang pagkabata.” (Dili lamang ang mga magmamando kondili usab silang gimandoan nangatawo ang tanan sa kasal-anan, uban sa mahakogong mga hilig.)

2 Tim. 3:1-4: “Sa kataposang mga adlaw moabot ang makuyaw nga mga panahong sagubangon. Kay ang mga tawo mahimong mga mahigugmaon sa ilang kaugalingon, mga mahigugmaon sa salapi, . . . dili igakasabot, . . . tigpaburot sa garbo.” (Ang mga suliran nga ginaatubang sa katawhan karon dili masulbad nga dumalayon pinaagig usa ka nasod lamang; kini nagakinahanglan ug kompleto internasyonal nga kooperasyon. Apan ang mahakogong intereses nagapugong niana ug nagapabalda gayod sa bisan unsang tinuod nga kooperasyon taliwala sa nagkalainlaing mga organisasyon sa mga kanasoran.)

Ang Bibliya usab nagabutyag nga ang labaw-tawo nga mga puwersa mao ang nagamaniobra sa kalihokan sa mga tawo. “Ang  tibuok kalibotan anaa sa gahom sa daotan.” (1 Juan 5:19) “Kita adunay pakigbugno, dili batok sa dugo ug sa unod, kondili batok . . . sa mga magmamando sa kalibotan niini nga kangitngit, batok sa daotan espirituhanong panon diha sa langitnong mga dapit.” (Efe. 6:12) “Mga pahayag nga dinasig sa mga demonyo . . . nagapangadto sa mga hari sa tibuok pinuy-anang yuta aron sa pagtigom kanila ngadto sa gubat sa dakong adlaw sa Diyos nga Labing Gamhanan.”—Pin. 16:14.

Sa unsang paagi ang katawhan makabaton ug dumalayong kahupayan gikan sa gobyernohanong korapsiyon (pagkamalimbongon) ug pagpanlupig?

Ang pagbutang ba ug laing mga tawo diha sa katungdanan magpasulbad sa problema?

Dili ba tinuod nga sa himoon ang walay limbong nga mga eleksiyon ang mga tawo nga anaa sa poder mapahawa na sa katungdanan sa mga pipila lang ka katuigan? Ngano? Ang kadaghanan dili matagbawon sa ilang mga nahimo.

Sal. 146:3, 4: “Ayaw pag-ibutang ang inyong pagsalig sa mga prinsipe, ni sa anak nga lalaki sa yutan-ong tawo, nga dili iya ang kaluwasan. Mogula ang iyang espiritu, sa yuta siya mobalik; nianang maong adlaw mahanaw gayod ang iyang mga hunahuna.” (Busa, ang bisan unsang mga programa alang sa kaayohan nga ginamugna sa mga magmamando sa dili madugay itugyan ngadto sa mga kamot sa uban ug sagad ginaabanduno.)

Walay sapayan kon kinsa ang magmamando, siya sa gihapon maoy bahin niining kalibotana nga anaa sa gahom ni Satanas.—1 Juan 5:19.

Ang mabangis ba nga rebolusyon mao ang sulbad?

Bisan pa kon ang malimbongong mga magmamando ginapalagpot ug ang dili maayong mga balaod ginawagtang, ang bag-ong gobyerno malangkoban sa dihingpit nga mga tawo ug sa gihapon bahin sa politikanhong sistema nga tin-awng ginabutyag sa Bibliya nga ubos sa pagkontrol ni Satanas.

Mat. 26:52: “Iuli sa sakob kanang imong espada, kay ang tanang magagamit ug espada mamatay sa espada.” (Gisulti kini ni Jesus ngadto sa usa sa iyang mga apostol sa panahong ang gobyernohanong awtoridad gigamit nga dili husto batok sa Anak mismo sa Diyos. Sa unsang mas takos pa nga hinungdan nga ang usa ka tawo makigbugno unta, kon kadto pa ang hustong butang buhaton?)

Prov. 24:21, 22: “Anak ko, kahadloki si Jehova ug ang hari. Kadto silang nagapangagpas ug kausaban, ayaw pagpanghilabot.  Kay ang ilang kalaglagan modangat sa hinanali, kinsa may mahibalo sa pagkalaglag niadtong nagapangagpas ug kausaban?”

Nan, unsa ang sulbad sa mga suliran sa korapsiyon (pagkamalimbongon) ug pagpanlupig?

Dan. 2:44: “Sa mga adlaw niadtong mga haria ang Diyos sa langit magatukod ug usa ka gingharian nga dili gayod malumpag. Ug ang gingharian dili igapasa ngadto sa laing katawhan. Kini magadugmok ug magaut-ot sa tanan niining mga ginghariana, ug kana mismo mao ang magpabilin sa mga panahong walay katinoan.”

Sal. 72:12-14: “Siya [kang Jehova nga tinudlong hari, si Jesu-Kristo] magaluwas sa timawa nga nagatuaw sa panabang, sa kabos usab ug kang bisan kinsa nga walay magtatabang. Siya maluoy sa alaot ug timawa, ug ang mga kalag sa mga timawa iyang pagaluwason. Pagaluwason niya ang ilang kalag gikan sa pagdaugdaog ug panlupig, ug ang ilang dugo hamili sa iyang panan-aw.” (Ang iyang kabalaka sa maong mga tawo sa dinhi siya sa yuta—ang iyang pag-ayo kanila, pagpakaon sa mga panon sa katawhan, paghatag gani sa iyang kinabuhi alang kanila—nagapakita nga siya gayod ang matang sa magmamando nga gitagna diha sa tagna.)

Tan-awa usab ang mga panid 182-187, ubos sa ulohang “Gingharian.”

Nganong kinahanglang sa tininuod atong pagatagdon ang giingon sa Bibliya bahin sa kaugmaon sa kagamhanan?

Ang tawhanong mga magmamando wala man makatagana sa dinaliang gikinahanglan sa katawhan

Tagda kining mga butanga nga gikinahanglan sa katawhan bisan diin, nga ang tawhanong mga gobyerno wala makatagana apan ang Diyos nagsaad niana: (1) Kinabuhi diha sa kalibotan nga walay hulga sa gubat.—Isa. 2:4; Sal. 46:9, 10. (2) Daghang pagkaon alang sa tanan.—Sal. 72:16. (3) Hayahay nga puloy-anan alang sa tanan.—Isa. 65:21. (4) Makatagbaw nga panarbaho alang sa tanan nga nagakinahanglan niana, aron ilang matagan-an ang ilang kaugalingon ug ilang mga pamilya.—Isa. 65:22. (5) Kinabuhi nga dili madaot pinaagig sakit ug balatian.—Pin. 21:3, 4. (6) Hustisya; kagawasan gikan sa relihiyoso, rasanhon, ekonomikanhon, ug nasodnong pagdapigdapig.—Isa. 9:7; 11:3-5. (7) Pagpahimulos sa seguridad, nga walay kapilegrohan sa kinabuhi sa usa o sa propyedad gikan sa mga kriminal.—Miq. 4:4; Prov. 2:22. (8) Usa ka kalibotan nga ang mga hiyas nga labaw  gayong ginapabilhan nagalakip ug gugma, kalulot, kabalaka alang sa isigkatawo, ug pagkamatinud-anon.—Sal. 85:10, 11; Gal. 5:22, 23.

Sa mga linibo ka katuigan, ang politikanhong mga pangulo nagsaad na sa ilang mga ginsakpan ug mas maayong mga kahimtang. Unsa man ang mga resulta? Bisan tuod ang katawhan sa daghang kanasoran adunay mas pang materyal nga mga kabtangan, sila dili mas malipayon, ug ang mga gumonhap nga ilang ginaatubang mas pang komplikado kay sa kanhiay.

Ang mga tagna sa Bibliya napamatud-an nga bug-os nga kasaligan

Usa ka siglo nga abante ang Pulong sa Diyos nagtagna sa kahimtang sa Babilonya sa pagmando sa kalibotan, kon sa unsang paagi usab ang gahom niana sa kataposan mabungkag, ug ang punto nga, sa dihang malaglag na, ang kaulohan niana dili na gayod pagapuy-an pag-usab. (Isa. 13:17-22) Duolan sa duha ka siglo nga abante, bisan gani antes matawo si Ciro, ang Bibliya nagtagna kaniya pinaagig ngalan maingon man ang iyang papel diha sa internasyonal nga mga kalihokan. (Isa. 44:28; 45:1, 2) Sa wala pa mahimong gahom sa kalibotan ang Medo-Persia, gitagna nang daan ang kamandoan niini, iyang duha-kinaiya, ug kon sa unsang paagi kini matapos. Labaw sa duha ka siglo nga abante ang kahimtang sa Gresyanhong imperyo sa kalibotan ubos sa unang hari niini gitagna nang daan, maingon man ang nagsunod nga pagkabahin sa imperyo ngadto sa upat ka bahin.—Dan. 8:1-8, 20-22.

Ang Bibliya nagtagna nga detalyado sa mga kahimtang sa kalibotan sa atong adlaw, ug kini nagapahibalo kanato nga ang tanang tawhanong gobyerno matapos diha sa mga kamot sa Diyos ug nga ang Gingharian sa Diyos diha sa mga kamot sa iyang Anak, si Jesu-Kristo, mao ang magamando ibabaw sa tanang katawhan.—Dan. 2:44; 7:13, 14.

Dili ba maoy dalan sa kaalam sa pagpatalinghog sa tinubdan sa impormasyon nga napamatud-an nga masubayon o kanunayng kasaligan?

Ang kagamhanan sa Diyos mao lamang ang tinuod nga sulbad sa mga suliran sa katawhan

Ang mga problema nga nagakinahanglang sulbaron nagakinahanglan ug gahom, mga katakos, ug mga hiyas nga wala mahupti sa mga tawo. Ang Diyos makaluwas sa katawhan gikan sa impluwensiya sa Yawa ug sa iyang mga demonyo, ug Siya nagsaad sa pagbuhat niana, pero walay tawong makahimo. Naghimo ang Diyos ug tagana sa pagbuhat sa dili gayod malampos sa medikal  nga siyensiya—ang pagwagtang sa sala, nga sa ingon nagatapos sa sakit ug kamatayon ug magpaposible sa mga tawo sa pagkahimong matang sa mga tawo nga gusto gayod nilang makab-ot. Ang Maglalalang aduna nianang gikinahanglang kahibalo (maylabot sa yuta ug tanang paagi sa kinabuhi) aron sulbaron ang mga suliran sa pagpatunghag kalan-on ug sa pagpugong sa makadaot nga polusyon, apan ang tawhanong mga paagi sagad magpatunghag dugang mga problema. Ang Pulong sa Diyos nagpabag-o na ug mga kinabuhi aron sila nga mosanong sa pagtultol niana mahimong maluloton, mahigugmaong mga tawo uban sa hataas nga mga pagtulon-an sa pamatasan, usa ka katilingban sa katawhan kinsa nagadumili sa paggamit ug mga armas batok sa ilang isigkatawo ug nagakinabuhi diha sa tiunayng pakigdait ug panag-igsoonay bisan tuod sila nagagikan sa tanang kanasoran, rasa, ug mga grupo sa pinulongan.

Kanus-a ang Gingharian sa Diyos magwagtang sa presenteng sistema sa kalibotan? Tan-awa ang lintunganayng mga ulohang “Petsa” ug “Kataposang mga Adlaw.”