Organisasyon

Kahubitan: Usa ka asosasyon o katilingban sa mga tawo kansang mga tinguha ginapatakdo alang sa linaing buluhaton o katuyoan. Ang mga membro sa usa ka organisasyon ginahiusa pinaagig administratibong  mga kahikayan ug pinaagig mga sukdanan o mga tulomanon. Ang mga tawong dedikado ug bawtismadong mga saksi ni Jehova nahasulod sa organisasyon ni Jehova ingong resulta sa personal nga pagpili, dili pinaagig pagkatawo ni sa bisan unsang pagpugos. Sila nahidangat sa iyang yutan-ong kapunongan tungod sa mga pagtulon-an ug mga buhat niana ug tungod kay sila gustong magpakig-ambit sa buluhaton nga ginahimo niana.

Si Jehova aduna ba gayoy organisasyon dinhi sa yuta?

Sa pagtubag nianang pangutanaha, tagda ang mosunod:

Ang langitnong mga linalang sa Diyos, ang mga anghel, organisado ba?

Dan. 7:9, 10: “Ako padayong nagsud-ong hangtod ang mga trono gibutang ug ang Tigulang sa mga Adlaw milingkod. Ang iyang besti maputi sama gayod sa nieve, ug ang buhok sa iyang ulo sama sa lunlon nga balhibo sa karnero. Ang iyang trono maoy mga siga sa kalayo; ang mga ligid niini maoy nagadilaab nga kalayo. Dihay sapa nga kalayo nga mibaha ug migula gikan sa iyang atubangan. Dihay napulo ka libo ka napulo ka libo nga padayong nagtindog sa iya gayong atubangan. Ang Hukmanan misugod sa paghukom, ug dihay mga basahon nga gibuksan.”

Sal. 103:20, 21: “Dayega si Jehova, O kamo nga mga manulonda niya, nga gamhanan sa kalig-on, nagatuman sa iyang pulong, pinaagig pagpatalinghog sa tingog sa iyang pulong. Dayega si Jehova, kamong tanang kasundalohan niya, kamong mga ministro niya, nga nagabuhat sa iyang kabubut-on.” (Ang “kasundalohan” maoy organisadong grupo.)

Giunsa sa Diyos sa pagpadala sa mga instruksiyon nganhi sa iyang mga alagad sa yuta sa miaging kapanahonan?

Sa diyutay pa ang mga magsisimba ni Jehova, siya mihatag ug mga pagtultol ngadto sa mga ulo sa pamilya sama kang Noe ug Abraham, ug unya sila milihok ingong mga tigpamaba ni Jehova ngadto sa ilang mga banay. (Gen. 7:1, 7; 12:1-5) Sa giluwas ni Jehova ang mga Israelita gikan sa Ehipto, siya mihatag kanilag mga pagtultol pinaagi ni Moises. (Ex. 3:10) Didto sa Bukid Sinai, giorganisar sa Diyos ang maong katawhan ngadto sa usa ka nasod, nga nagtaganag mga balaod ug mga tulomanon sa pagmando sa ilang pagsimba ug sa ilang mga relasyon sa usag usa. (Ex. 24:12) Siya mitukod ug pagkasaserdote nga manguna diha sa mga butang sa pagsimba ug sa pagtudlo sa katawhan sa mga tulomanon ni Jehova; may mga panahon nga siya usab mipatunghag mga propeta sa paghatod sa gikinahanglang talambagan ug pasidaan ngadto  sa katawhan. (Deut. 33:8, 10; Jer. 7:24, 25) Busa, bisan tuod si Jehova nagpatalinghog sa mga pag-ampo sa indibiduwal nga mga magsisimba, siya mitaganag instruksiyon alang kanila pinaagig organisasyonal nga kahikayan.

Samtang nagkaduol ang panahon alang kang Jehova sa pagsugod sa paghiusa sa matuod nga mga magsisimba uban kaniya mismo pinaagi ni Jesu-Kristo, ang Diyos nagpadala kaniya nganhi sa yuta sa paglihok ingong Iyang tigpamaba. (Heb. 1:1, 2) Unya sa pagbubo sa balaang espiritu sa Pentekostes sa 33 K.P., ang Kristohanong kongregasyon milungtad. Human si Jesus mibalik sa langit, kining kongregasyona nahimong kahikayan ni Jehova sa pagtudlo ug sa pagpatakdo sa mga panlimbasog sa indibiduwal nga mga Kristohanon. Dihay mga magtatan-aw sa pagpanguna sa lokal nga mga kongregasyon, ug ang sentral nga nagamandong lawas naghimog gikinahanglang mga desisyon ug mitabang sa pagpatakdo sa buluhaton. Matin-aw nga, si Jehova nagpatungha ug usa ka organisasyon ibabaw sa yuta nga gilangkoban sa matuod nga mga Kristohanon.—Buh. 14:23; 16:4, 5; Gal. 2:7-10.

Ang mga buhat ba ni Jehova maylabot sa paglalang sa kinaiyahan nagabutyag nga siya maoy Diyos sa organisasyon?

Isa. 40:26: “Iyahat ang inyong mga mata sa itaas ug tan-awa. Kinsay nagbuhat niining mga butanga? Mao Siya nga nagadala sa ilang panon sa tinagdaghan, ang tanan kanila iyang gitawag gani pinaagi sa ngalan. Tungod sa kadako sa iyang gahom, siya usab kusgan sa kagahom, walay mausa nga makulang kanila.” (Ang mga bituon gigrupo ngadto sa mga galaksiya ug nagalihok nga nahauyon sa usag usa, bisan tuod ang mga kinaiya sa tinagsatagsa ka bituon magkalain. Ang mga planeta nagalihok nga tukma sa panahon, diha sa gikatudlong mga tuyok. Ang mga elektron nga makaplagan sa matag atomo sa kada elemento aduna usab ing mga tuyok. Ug ang gambalay sa tanang butang nagasunod ug matematikal nga mga sumbanan nga masubayon kaayo nga nagpaposible sa mga siyentipiko sa pagtagna sa kalungtaran sa pipila ka elemento antes kini sa aktuwal ilang madiskobrehan. Kining tanan nagahatag pamatuod sa talagsaong organisasyon.)

Ang Bibliya ba nagapakita nga ang matuod nga mga Kristohanon mahimong organisadong katawhan?

Mat. 24:14; 28:19, 20: “Kining maayong balita sa gingharian igawali sa tibuok pinuy-anang yuta alang sa pamatuod ngadto sa tanang kanasoran; ug unya moabot ang kataposan.” “Busa panlakaw kamo ug paghimog mga tinun-an sa katawhan sa tanang kanasoran, nga magabawtismo kanila . . . magatudlo kanila.” (Unsaon man niini sa pagkatuman kon walay organisasyon? Sa gibansay ni  Jesus ang iyang unang mga tinun-an alang niining buluhatona, wala Niya sultihi lamang ang matag usa sa pag-adto sa bisan unsang dapit nga gusto niya ug ipaambit ang iyang pagtuo sa bisan unsang paagi nga iyang gipili. Siya mibansay kanila, mihatag kanilag mga instruksiyon ug gipadala sila diha sa organisadong paagi. Tan-awang Lucas 8:1; 9:1-6; 10:1-16.)

Heb. 10:24, 25: “Mamalandong kita alang sa pagdinasigay sa usag usa sa gugma ug maayong binuhatan, sa dili pagbiya sa panagkatigom sa atong kaugalingon, ingon sa batasan sa pipila, kondili sa paglinig-onay sa usag usa, ug ilabina gayod sa makita ninyo nga ang adlaw nagakahiduol na.” (Apan diin man tultolan sa usa ka tawo ang mga interesado aron ilang masunod kining sugoa kon walay kapunongan uban sa regular nga mga miting nga sila magakatigom?)

1 Cor. 14:33, 40: “Ang Diyos maoy usa ka Diyos, dili sa kasamok, kondili sa pakigdait. . . . Tugoting ang tanang butang pagahimoon nga maligdong ug sa kahikayan.” (Ang apostol nga si Pablo naghisgot dinhi ug mahapsay nga paagi sa mga tigom sa kongregasyon. Ang pagpadapat niining dinasig nga tambag nagakinahanglan ug pagtahod sa organisasyon.)

1 Ped. 2:9, 17: “Apan kamo maoy ‘usa ka kaliwatan nga pinili, usa ka harianong saserdote, usa ka nasod nga balaan, usa ka katawhan nga linaing gipanag-iya, aron inyong igamantala gayod bisan diin ang pagkahalangdon’ kaniya nga nagtawag kaninyo gikan sa kangitngit ngadto sa iyang katingalahang kahayag. . . . Higugmaa ang tibuok katilingban sa kaigsoonan.” (Ang usa ka asosasyon sa katawhan kansang mga panlimbasog gitultolan aron kab-oton ang usa ka linaing buluhaton maoy usa ka organisasyon.)

Sila ba nga matinumanong mga alagad sa Diyos maoy basta mga indibiduwal nga nakatag diha sa lainlaing mga iglesya sa Kakristiyanohan?

2 Cor. 6:15-18: “Unsa mang bahina nga nabatonan sa tawong matinumanon uban sa dili magtutuo? . . . ‘Busa panggula kamo gikan kanila, ug magpalain sa inyong kaugalingon,’ nagaingon si Jehova, ‘ug ayaw na paghikap sa mahugaw nga butang’; ‘ug pagadawaton ko kamo.’ ‘Ug ako mahimong inyong amahan, ug kamo mahimong akong mga anak nga lalaki ug mga anak nga babaye,’ nagaingon si Jehova nga Labing Gamhanan.” (Ang usa ka tawo ba tinuod nga matinumanong alagad sa Diyos kon siya magapadayon sa pag-ambit sa pagsimba uban kanilang pinaagi sa ilang pagkinabuhi nagapakita nga sila sa tinuoray dili mga magtutuo? Tan-awang lintunganayng ulohang “Babilonya nga Bantogan.”)

1 Cor. 1:10: “Karon nagaaghat ako kaninyo, mga igsoon, pinaagi sa ngalan sa atong Ginoong Jesu-Kristo nga kamong tanan kinahanglang  magasulti nga mausahon, ug nga wala gayoy pagkabahinbahin sa taliwala kaninyo, kondili kamo mahiusa gayod sa samang panghunahuna ug sa samang han-ay sa pangisip.” (Ang maong panaghiusa wala magalungtad taliwala sa nagkalainlaing mga iglesya sa Kakristiyanohan.)

Juan 10:16: “Ako adunay ubang mga karnero, nga dili sakop niining torila; kinahanglang pagadad-on ko usab sila, ug sila magapatalinghog sa akong tingog, ug sila mahimong usa ka panon, usa ka magbalantay.” (Sanglit si Jesus magatigom kanila ngadto sa “usa ka panon,” dili ba maoy dayag nga sila dili makatag diha sa mga relihiyon sa Kakristiyanohan?)

Sa unsang paagi ang makitang kapunongan ni Jehova sa atong adlaw mailhan?

(1) Kana gayod nagabayaw kang Jehova ingong bugtong matuod nga Diyos, nagadayeg sa iyang ngalan.—Mat. 4:10; Juan 17:3.

(2) Kana bug-os nga nagaila sa hinungdanong papel ni Jesu-Kristo diha sa katuyoan ni Jehova—ingong tigbayaw sa pagkasoberano ni Jehova, ang Pangulong Tinugyanan sa kinabuhi, ang pangulo sa Kristohanong kongregasyon, ang nagamandong Mesiyanikong Hari.—Pin. 19:11-13; 12:10; Buh. 5:31; Efe. 1:22, 23.

(3) Kana nagatapot gayod sa dinasig nga Pulong sa Diyos, nga ang tanang pagtulon-an niini ug mga sukdanan sa panggawi gipasukad sa Bibliya.—2 Tim. 3:16, 17.

(4) Kana padayong nahimulag gikan sa kalibotan.—Sant. 1:27; 4:4.

(5) Kana nagahupot kanunay sa taas nga lebel sa pagkahinlo sa moral taliwala sa mga membro niini, tungod kay si Jehova mismo maoy balaan.—1 Ped. 1:15, 16; 1 Cor. 5:9-13.

(6) Kana nagagugol sa iyang dakong mga panikaysikay sa pagbuhat sa buluhaton nga gitagna alang sa atong adlaw, nga mao, ang pagsangyaw sa maayong balita sa Gingharian sa Diyos sa tibuok kalibotan alang sa usa ka pamatuod.—Mat. 24:14.

(7) Bisan pa sa tawhanong mga pagkadihingpit, ang mga membro niana nagaugmad ug nagapatungha sa mga bunga sa espiritu sa Diyos—gugma, kalipay, kalinaw, taas-pailob, kalulot, pagkamaayo, pagtuo, kaaghop, pugong-kaugalingon—nga nagapalambo niana sa gidak-on nga nagapalahi kanila gikan sa kalibotan sa kasagaran.—Gal. 5:22, 23; Juan 13:35.

Sa unsang paagi atong ikapakita ang pagtahod sa organisasyon ni Jehova?

1 Cor. 10:31: “Buhata ang tanang butang alang sa himaya sa Diyos.”

 Heb. 13:17: “Magmasinundanon niadtong nagapanguna sa taliwala kaninyo ug magmapasakopon, kay sila nagabantay sa inyong mga kalag ingon nga sila magapanubag.”

Sant. 1:22: “Himoang mga magtutuman sa pulong, ug dili kay mga mamiminaw lamang.”

Tito 2:11, 12: “Ang dili-takos nga kalulot sa Diyos nga nagadala ug kaluwasan sa tanang matang sa mga tawo gikapadayag na, nga nagatudlo kanato sa pagbiya sa pagkadili-diyosnon ug sa mga pangibog nga kalibotanon ug sa pagkinabuhi uban ang maayong hunahuna ug pagkamatarong ug diyosnong pagkamahinalaron.”

1 Ped. 2:17: “Higugmaa ang tibuok katilingban sa kaigsoonan.”