[Mga Dalaga; Batan-ong mga Babaye].

Dayag nga usa ka termino sa musika. Lagmit kini nagtumong sa mga tingog nga soprano sa batan-ong mga babaye o sa falsetto sa mga lalaki. Sa 1 Cronicas 15:​20, ang kinuldasan nga mga tulonggon gihubit ingong “gitono uyon sa Alamot,” diin kini nga termino gihatagan lamang ug katumbas nga espeling sa Cebuano. Apan diha sa superskripsiyon sa Salmo 46, ang ʽala·mohthʹ gihubad nga “Mga Dalaga.”

Sa 1 Cronicas 15:​21, ang sunod nga bersikulo sa gisitar sa itaas, adunay laing termino sa musika nga gihatagan usab ug katumbas nga espeling, nga mao ang shemi·nithʹ, nga nagtumong sa “mga alpa nga gitono uyon sa Sheminith.” Diha sa mga superskripsiyon sa Salmo 6 ug 12, kini nga pulong gihubad nga “mas ubos nga oktaba.” Bisan tuod ang duha ka termino nga Alamot ug Sheminith dili magkasukwahi sa kahulogan, ang pipila ka eskolar nagtuo nga kini adunay kalainan sa usag usa. Ang mga kaundan sa gihisgotan nga mga salmo mopatim-aw nga magpaila usab niini: Ang duha ka salmo (6 ug 12) nga adunay shemi·nithʹ diha sa ilang mga superskripsiyon medyo masulub-on ug busa duyogan sa mas masub-anon, ubos nga tingog; samtang ang Salmo 46, nga adunay ʽala·mohthʹ diha sa superskripsiyon niini, maoy masadyaon ug dayag nga duyogan o awiton kini diha sa taas nga tingog.​—Tan-awa ang ALPA; MUSIKA.