Ang gasa, salapi, o tabang nga ihatag sa usa ka tawo o mga tawo ngadto sa lain o sa uban pa. Ang Hebreohanong pulong nga teru·mahʹ nagkahulogang “amot; sagradong bahin; gialsa nga halad.” (Ex 25:​2, ftn sa Rbi8; 29:​27, ftn sa Rbi8) Kini naggikan sa berbong rum, nga sa literal nagkahulogang “ipataas; ibayaw; iisa” (Job 22:12; 1Sa 2:1; Gen 14:22) ug diha sa causative form mahimong magkahulogan nga “ipahinabong maisa [ingong usa ka amot],” busa “iamot.”​—Lev 22:15.

Ang usa ka amot mahimong maglangkit o wala maglangkit ug materyal nga paghatag. Si Pablo nagpasalamat sa Diyos tungod sa amot nga gihatag sa mga Kristohanon sa Filipos alang sa maayong balita. Dugang pa sa ilang personal nga pagpakig-ambit sa pagpakaylap sa maayong balita, sila mitabang sa materyal nga paagi kang Pablo ug lagmit usab sa uban, nga sa ingon maunongong nagpaluyo sa pagwali sa maayong balita niining paagiha usab.​—Flp 1:3-5; 4:16-18.

Ang mga Israelinhon nakapribilehiyo sa paghatag ug mga amot alang sa pagtukod ug sa pagsangkap sa mga estruktura alang sa matuod nga pagsimba. Sila miamot ug mga materyales alang sa tabernakulo ug sa mga kasangkapan niini (Ex 25:​1-9; 35:4-9), usa ka “kinabubut-ong halad alang kang Jehova” nga kinahanglang hunongon tungod kay ang mga butang nga gihatag “igo na alang sa tanang buluhaton nga pagabuhaton, ug gani nagsobra pa.” (Ex 35:20-29; 36:3-7) Ang mga amot ni Haring David alang sa pagtukod sa giplano nga templo lakip sa iyang ‘linain nga katigayonan’ nga bulawan ug plata, mikabat ug kapin sa $1,202,000,000. Ang mga prinsipe ug ang mga pangulo sa katawhan usab malipayong miamot ug kapin sa $1,993,000,000 nga bulawan ug plata gawas pa sa tumbaga, puthaw, ug mga bato.​—1Cr 29:1-9.

Ang ubang mga amot gilatid ubos sa Balaod. Sa dihang si Moises nagsenso sa mga Israelinhon, ang matag lalaki nga 20 anyos pataas kinahanglang maghatag ug “tunga sa siklo [lagmit $1.10] sumala sa siklo sa balaang dapit” ingong lukat alang sa iyang kalag. Kadto maoy “amot alang kang Jehova” aron sa pagtabon sa sala sa ilang mga kalag ug “alang sa pag-alagad sa tolda nga tagboanan.” (Ex  30:11-16) Sumala sa Hudiyong historyador nga si Josephus (The Jewish War, VII, 218 [vi, 6]), kini nga “sagradong buhis” gibayran matag tuig human niadto.​—2Cr 24:6-10; Mat 17:24; tan-awa ang PAGBUHIS.

Sa pagsuportar sa mga Levihanon, ang saserdotehanong tribo, gisugo sa Diyos nga ang mga Israelinhon mag-amot ug “ikapulong mga bahin” sa abot sa yuta. Ang mga Levihanon sa baylo mag-amot ug ikapulo ngadto sa hataas nga saserdote aron sa pagsuportar kaniya ug sa iyang banay. (Num 18:26-28; tan-awa ang IKAPULO.) Gipiyal ni Jehova kang Aaron nga hataas nga saserdote ang mga amot nga gihatag sa mga Israelinhon ngadto sa Diyos, aron siya ug ang iyang mga anak nga lalaki makaambit sa ilang mga halad ug sa lana, bino, mga lugas, ug sa unang mga hinog nga bunga sa yuta nga gihatag sa katawhan ngadto kang Jehova ug sila gihatagan usab ug mga bahin sa mga halad nga hayop. Ang usa ka buhis gikan sa mga inagaw sa gubat gihatag ngadto sa hataas nga saserdote ingong “amot nga iya ni Jehova,” ug ang usa ka bahin sa mga inagaw mahiadto usab sa mga Levihanon.​—Num 31:​1, 2, 28-30.

Ang mga Israelinhon naghatag ug nagkalainlaing mga tanyag ug mga halad ngadto kang Jehova, nga ang uban niini espesipikong gilatid sa Balaod. Apan ang ubang mga halad bug-os nga kinabubut-on, sama sa mga halad-sa-pagpasalamat ug mga halad sa panaad.​—Lev 7:​15, 16; tan-awa ang HALAD.

Sa mga adlaw ni Haring Jehoas, ang usa ka kahon gibutang didto sa ganghaan sa balay ni Jehova aron kabutangan sa mga amot alang sa dakong buluhaton sa pag-ayo sa templo. Unya ang mga prinsipe ug ang katawhan nagmaya sa pagdala sa “sagradong buhis,” nga pinaagi niini nahimong malig-on ang balay sa Diyos ug nahimo ang mga galamiton sa templo.​—2Cr 24:4-14.

Ang mga dili-Israelinhon miamot usab alang sa matuod nga pagsimba. Sa dihang si Esdras ug ang nahibiling mga Hudiyo mibiya sa Babilonya aron sa pag-adto sa Jerusalem niadtong 468 W.K.P., sila nagdala ug plata, bulawan, ug mga galamiton, usa ka amot alang sa balay sa Diyos nga gihatag ni Haring Artajerjes sa Persia, sa iyang mga magtatambag, sa iyang mga prinsipe, ug sa mga Israelinhon sa Babilonya. Kining bililhong mga butang gipiyal sa piniling mga lalaki panahon sa ilang panaw.​—Esd 7:12-20; 8:24-30.

Sa ilang pagministeryo, si Jesu-Kristo ug ang iyang mga apostoles midawat ug materyal nga tabang nga giamot. (Luc 8:1-3) Ang mga Kristohanon sa Macedonia ug Acaya ilabinang maikagon sa pagtabang sa ilang kabos nga mga igsoon, nga ‘nahimuot sa pagpaambit sa ilang mga butang pinaagig amot ngadto sa mga kabos sa mga balaan sa Jerusalem,’ nga dayag nga pinaagi sa pag-amot ug salapi.​—Rom 15:26; tan-awa ang PAGPANGOLEKTA.

Sa Roma 15:26 ug 2 Corinto 9:​13, ang Gregong pulong alang sa “amot” (koi·no·niʹa) mahimong isipon nga literal nga nagkahulogang “pagpakig-ambit.” Kining samang Grego nga pulong gigamit diha sa Hebreohanon 13:16: “Ayaw kalimti ang pagbuhat ug maayo ug ang pagpakig-ambit sa mga butang sa uban, kay ang maong mga halad gikahimut-an sa Diyos.”

Daghang Hudiyo ug mga kinabig gikan sa ubang mga dapit nga nahimong mga Kristohanon panahon sa Pentekostes sa 33 K.P. ang dayag nga nagpabilin sulod sa usa ka panahon didto sa Jerusalem aron makakat-on ug dugang pa bahin sa pagtuo. Aron walay usa nga makabsan, sila boluntaryong nag-amot sa ilang mga kabtangan; “giambitan sa tanan ang tanan nilang butang.” (Buh 4:32-37; itandi ang Buh 5:1-4.) Sa ulahi, ang kongregasyon sa Jerusalem naghimog adlaw-adlawng pag-apod-apod ug pagkaon alang sa mga kabos nga mga babayeng balo. (Buh 6:1-3) Si Pablo naghatag ug mga instruksiyon bahin sa paggamit sa giamot nga mga butang sa pag-atiman sa mga babayeng balo nga takos gayod nga tabangan.​—1Ti 5:​9, 10; tan-awa ang HINABANG.

Dili pinugos ang paghatag ug mga amot sa unang Kristohanong kongregasyon. Niining bahina, si Pablo misulat: “Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.”​—2Co 9:7.

Ang gidaghanon sa amot dili gayod maoy sukdanan sa pagkamanggihatagon sa naghatag. Sa usa ka higayon si Jesu-Kristo naniid sa dihang ang mga tawo naghulog ug salapi sa mga panudlanag bahandi sa templo. Ang mga dato naghulog ug daghang sensilyo, apan si Jesus nakadayeg sa kinasingkasing nga pagkamanggihatagon sa kabos nga babayeng balo nga mihulog ug duha lamang ka gagmayng sensilyo nga kubos kaayo ug bili, nga nag-ingon: “Kining babayeng balo, bisan kabos, naghulog ug labaw pa kay kanilang tanan. Kay silang tanan naghulog ug mga gasa gikan sa ilang mga sobra, apan kining bayhana gikan sa iyang kawalad-on naghulog sa tanan niyang panginabuhian.” (Luc 21:1-4; Mar 12:41-44) Maylabot sa paghatag ug mga amot aron sa pagtabang sa kabos nga mga isigkamagtutuo, si Pablo nagkomento: “Kon ang pagkaandam anaa nang daan, kini ilabinang dalawaton sumala sa nabatonan sa usa, dili sumala sa wala kaniya.”​—2Co 8:12.

Bisan tuod walay usa nga makapadato gayod kang Jehova kinsa maoy tag-iya sa tanang butang (1Cr 29:14-17), ang pag-amot maoy usa ka pribilehiyo  nga maghatag ug kahigayonan sa magsisimba nga ipasundayag ang iyang gugma kang Jehova. Ang mga amot nga gihatag, dili aron dayegon sa publiko o tungod sa hinakog nga mga motibo kondili uban ang hustong tinamdan ug aron sa pagpalambo sa matuod nga pagsimba, maghatag ug kalipay ug mga panalangin gikan sa Diyos. (Buh 20:35; Mat 6:1-4; Pr 3:​9, 10) Ang usa ka tawo makaseguro sa iyang kaugalingon nga makaambit niini nga kalipay pinaagi sa paggahin nga makanunayon gikan sa iyang materyal nga mga kabtangan aron sa pagsuportar sa matuod nga pagsimba ug sa pagtabang sa mga angayng tabangan.​—1Co 16:​1, 2.

Gipasundayag ni Jehova ang labing maayong panig-ingnan sa paghatag, kay iyang gihatag sa mga tawo ang “kinabuhi ug gininhawa ug tanang butang” (Buh 17:25), iyang gihatag ang iyang bugtong nga Anak alang sa katawhan (Ju 3:16), ug iyang gibuhong ang mga Kristohanon alang sa tanang matang sa pagkamanggihatagon (2Co 9:10-15). Sa pagkatinuod, “ang matag maayong gasa ug matag hingpit nga regalo naggikan sa itaas, kay kini gikan sa Amahan sa langitnong mga kahayag.”​—San 1:17; tan-awa ang GASA, REGALO.

Tan-awa usab ang BALAANG AMOT.