Nahimutang dapit sa tiyan. Ang Bibliya naggamit sa duha ka Hebreohanong pulong nga chala·tsaʹyim ug moth·naʹyim sa paghisgot niini nga bahin sa lawas. (Isa 5:27; 2Ha 4:29) Ang Gregong pulong nga o·sphysʹ gigamit  usab sa ordinaryong diwa sa paghubit kang Juan nga Tigbawtismo nga may bakos nga panit sa iyang hawak.​—Mat 3:4.

Anaa sa bahin sa lawas nga gitawag ug “balat-ang” ang mga sangkap sa pagsanay; busa ang mga anak gikaingon nga ‘migula gikan sa balat-ang.’ (Gen 35:11; 1Ha 8:19; Buh 2:30) Gigamit ni Pablo kini nga kamatuoran sa dihang iyang gipakita nga ang pagkasaserdote ni Jesus sa paagi nga sama kang Melquisedek maoy labaw nianang kang Aaron, sa pagkaagi nga si Levi, ang katigulangan ni Aaron, maoy diha sa balat-ang ni Abraham, ug tungod niana nga diwa nagbayad ug ikapulo ngadto kang Melquisedek. (Heb 7:5-10; Gen 14:18-20) Si Pablo usab susamang nangatarongan diha sa Roma 7:​9, nga nag-ingon: “Ako [si Pablo nga Hudiyo, diha sa balat-ang sa iyang katigulangan sa wala pa ihatag ang Balaod] kanhi buhi nga bulag sa balaod; apan sa dihang ang sugo miabot, ang sala nabuhi pag-usab, apan ako namatay.”

Ang terminong ‘baksan ang hawak’ nagkahulogan sa pag-isa sa sidsid sa taas nga besti ug pailadman kini sa paha aron sayon ang paglihoklihok ug kini gigamit sa ulahi ingong ekspresyon nga nagpaila sa pagpangandam alang sa hagong mental o espirituwal nga kalihokan, ug usahay, kini naghatag sa ideya sa pagpalig-on.​—Luc 12:35; itandi ang 1Pe 1:​13, “Andama ang inyong kaisipan [sa literal, “Baksi ang hawak sa inyong hunahuna”] alang sa buluhaton.”

Sa Efeso 6:​14, ang mga Kristohanon gisultihan nga kinahanglang ang ilang ‘mga hawak binaksan sa kamatuoran,’ nga mao, gipalig-on sa kamatuoran sa Pulong sa Diyos ingong hinungdanong pangsuportar, sama nga ang hugot nga pagbakos sa pisikal nga mga hawak manalipod kanila batok sa kadaot tungod sa hinobrang tensiyon.

Gitagna ni Jehova ang kasakit ug kagul-anan sa Jerusalem pinaagi sa paghulagway sa “matag lalaki nga lig-on ug lawas nga gihawid ang iyang mga kamot sa iyang balat-ang sama sa usa ka babaye nga nanganak.”​—Jer 30:6.

Ang Hebreohanong pulong nga keʹsel (dapidapi) makita sa daghang higayon diha sa Levitico 3:4-15, nga naghisgot sa mga halad-sa-panag-ambit. Gigamit usab kini sa Job 15:27 ug Salmo 38:7 ug gihubad nga “balat-ang.” Gihubad kini nga “hawak” ug “balat-ang” sa King James Version.

Ang Hebreohanong pulong nga moth·naʹyim gigamit usab sa pagtumong sa “balat-ang” o “hawak,” ang ubos nga bahin sa likod sa lawas.

Ang usa ka bakos sagad anaa sa hawak, ilabina sa sundalo, nga magsuksok ug espada o baraw nga may sakoban ilalom sa bakos o magsab-it sa sakoban sa espada diha niini. (2Sa 20:8; Neh 4:18) Ang sekretaryo nagbutang sa iyang tintiro diha sa balat-ang, nga gipailadman sa iyang bakos o paha. (Eze 9:2) Ang sakong panapton gibakos diha sa balat-ang ingong ilhanan sa pagbangotan.​—Gen 37:34; Am 8:10.

Sa dili pa mohimo ug bisan unsang matang sa hagong pisikal nga buluhaton, ang usa ka tawo ‘magbakos sa iyang hawak,’ sagad pinaagi sa pag-isa sa sidsid sa iyang luag, taas nga besti agi sa iyang bilahan ug palugpitan ang sidsid ilalom sa iyang paha. Ang mga Israelinhon didto sa Ehipto mikaon sa Paskuwa nga binaksan ang ilang mga hawak, nga andam mopanaw pagawas sa maong yuta. Si Elias binaksan usab sa hawak sa dihang siya midagan nga nag-una sa karo ni Ahab.​—Ex 12:11; 1Ha 18:46.

Mahulagwayong Paggamit. Ang mga kaunoran dapit sa balat-ang o hawak hinungdanon kaayo sa pagsakwat ug pagdala sa mabug-at nga mga luwan; busa haom ang giingon sa Salmo 66:​11, “Ang kabug-at gibutang mo sa among balat-ang.” Ang pagpalig-on sa balat-ang nagtumong sa pagpangandam sa paggamit sa kusog, sama sa dihang makig-away. (Nah 2:1) Gikaingon nga baksan sa usa ka maayong asawa ang iyang hawak pinaagi sa kusog ug pabaskogon ang iyang mga bukton aron makabuhat sa iyang daghang mga buluhaton alang sa kaayohan sa panimalay. (Pr 31:17) Sa kasukwahi, kadtong naluya tungod sa kahadlok, kasakitan, o kapildihan gikaingon nga ang mga balat-ang nagkurog. (Sal 69:23; Eze 21:6; 29:7) Ang pagtangtang sa bakos gikan sa hawak sa mga hari nagkahulogan sa pagkuha sa ilang kusog.​—Isa 45:1.

Si Jehova naghisgot sa mga balay sa Israel ug Juda nga kini sama sa usa ka bakos sa iyang hawak, iyang gibakos sila pag-ayo, aron sila mahimong usa ka pagdayeg ug usa ka butang nga matahom alang kaniya. (Jer 13:11) Si Jesu-Kristo gihulagway sa matagnaong paagi nga naghari diin ang pagkamatarong mao ang bakos sa iyang balat-ang ug ang pagkamatinumanon mao ang bakos sa iyang hawak. Kini lagmit nagpunting sa kamatuoran nga ang tanang aktibong gahom ni Jesu-Kristo hingpit nga nagasubay sa pagkamatarong ug pagkamatinumanon. Sama sa usa ka bakos nga nagsuportar, ang hiyas sa pagkamatarong nagpalig-on kaniya sa paglihok ingong tinudlong Maghuhukom ni Jehova.​—Isa 11:​1, 5.