Sukad sa kinasayohang mga panahon ang paghatag ug mga regalo nahimong mahinungdanong bahin sa adlaw-adlaw nga kinabuhi. Ang tigulang nga alagad ni Abraham mihatag ug mga gasa nga alahas kang Rebeca human makakitag ebidensiya nga si Jehova nagtudlo kaniya ingong asawa ni Isaac. (Gen 24:13-22) Unya, sa dihang nadawat ang pag-uyon ni Laban ug Betuel alang sa kaminyoon, ang alagad ni Abraham mihatag ug dugang nga mga gasa ngadto kang Rebeca ug usab “hamiling mga butang ngadto sa iyang igsoong lalaki ug sa iyang inahan.” (Gen 24:50-53) Sa ulahi, gihatag ni Abraham ang tanan niyang kabtangan ngadto kang Isaac, apan gihatagan niya ug mga gasa ang mga anak sa iyang mga puyopuyo ug gipalakaw sila.​—Gen 25:​5, 6; itandi ang 2Cr 21:3.

Lagmit batasan sa mga panahon sa patriarka ang paghatag ug mga gasa ngadto sa mga nakaagom ug kasakitan. Sa dihang si Jehova nagbali o nagbalit-ad sa binihag nga kahimtang ni Job, ang iyang mga igsoong lalaki, mga igsoong babaye, ug kanhing mga kaila wala lamang moadto sa paghupay kaniya apan ang matag usa mihatag kaniya ug “usa ka pirasong salapi ug usa ka singsing nga bulawan.”​—Job 42:​10, 11.

 Mga Gasa Gihatag Aron Makadawat ug mga Kaayohan. Sagad nga ang mga gasa gihatag aron mabatonan ang butang nga gitinguha. Si Jacob nag-andam ug daghang gasa nga binuhing kahayopan alang kang Esau aron mabatonan ang pag-uyon sa mga mata sa iyang igsoon. (Gen 32:13-18; 33:8) Ang pag-insistir ni Jacob nga dawaton ni Esau kini nga gasa mas masabtan kon tagdon nga, sumala sa batasan sa Sidlakan, ang pagdumili sa pagdawat ug gasa nagpasabot sa dili paghatag ug pabor. (Gen 33:10) Lain pa, aron mabatonan ang maayong kabubut-on sa maharason-manulti nga administrador sa pagkaon sa Ehipto (nga sa pagkatinuod mao ang ilang kaugalingong igsoon nga si Jose), ang mga anak ni Jacob misunod sa sugyot sa ilang amahan sa pagdala ug gasa gikan sa labing maayong mga produkto sa yuta. (Gen 42:30; 43:​11, 25, 26) Si Haring Asa nagpadalag regalo nga plata ug bulawan ngadto kang Ben-hadad aron aghaton siya nga bungkagon ang iyang pakigsaad uban kang Baasa, ang hari sa Israel.​—1Ha 15:​18, 19.

Mahitungod sa mga kaayohan sa usa nga naghatag, ang proverbio nag-ingon: “Ang gasa sa usa ka tawo magabukas ug dakong pultahan alang kaniya, ug tultolan siya niini bisan sa atubangan sa dagkong mga tawo.” (Pr 18:16) Ang usa ka gasa makapakalma sa kasuko, apan kini dili makapuypoy sa kapungot sa usa ka lalaking lig-on ug lawas batok sa tawo nga nanapaw uban sa iyang asawa, bisag unsa pa ka dako ang regalo nga ihatag sa mananapaw.​—Pr 21:14; 6:32-35.

Mga Gasa Ngadto sa mga Hari, mga Manalagna, ug Uban pa. Gipakita nga maoy batasan kaniadto nga kadtong makigkita sa usa ka hari magdala ug mga gasa. Partikular nga gihisgotan nga ang “walay-silbi nga mga tawo” nga walay pagtahod kang Saul wala magdala ug gasa alang kaniya. Si Solomon linaing gihatagan ug daghan kaayong mga gasa niadtong nangabot gikan sa lagyong kayutaan aron maminaw sa iyang kaalam. Ang mga astrologo nga miadto aron makita “ang usa nga natawong hari sa mga Hudiyo” misunod lamang niini nga batasan sa dihang sila mihatag ug mga gasa sa bata nga si Jesus. (1Sa 10:27; 1Ha 10:​10, 24, 25; Mat 2:​1, 2, 11; tan-awa usab ang 2Ha 20:12; 2Cr 17:5.) Sa susama, may mga panahon nga kadtong buot magpakisayod sa usa ka manalagna magdala ug gasa alang kaniya. (1Sa 9:7; 2Ha 8:​8, 9) Apan ang mga manalagna sa Diyos wala magpaabot o magtinguha ug gasa alang sa ilang mga pag-alagad, ingon sa gipakitang pagdumili ni Eliseo sa pagdawat ug “usa ka panalanging gasa” gikan sa kamot ni Naaman.​—2Ha 5:​15, 16.

Ang mga gasa sagad nga gihatag aron iganti niadtong malamposong nakahuman sa usa ka buhat. (2Sa 18:11; Dan 2:​6, 48; 5:​16, 17, 29) Sumala sa Balaod, ang usa ka gipahigawas nga ulipon dili palakton nga walay dala apan makadawat ug gasa, gikan sa panon sa kahayopan, sa giokanan, ug sa lana ug sa pug-anan sa bino. (Deu 15:​13, 14) Dugang pa, ang mga okasyon sa hilabihang paglipay mahimong ubanan sa paghatag ug mga regalo.​—Est 9:20-22; itandi ang Pin 11:10.

Maylabot sa Sangtuwaryo. Gikuha sa Diyos ang mga Levihanon ingong gasa alang sa balay ni Aaron, ingong mga hinatag ngadto kang Jehova aron himoon ang pag-alagad sa sangtuwaryo. (Num 18:​6, 7) Lain pa, ang mga Gabaonhon ug ang uban pa nga gihimong mga alagad didto sa sangtuwaryo gitawag nga Netinim, nga nagkahulogang “Mga Hinatag.” (Jos 9:27; 1Cr 9:2; Esd 8:20) Dugang pa, ang mga amot aron magpadayon ang pag-alagad sa sangtuwaryo ug usab ang mga halad gitawag nga mga gasa.​—Ex 28:38; Lev 23:​37, 38; Num 18:29; Mat 5:​23, 24; Luc 21:1.

Tungod sa iyang pagkamaglalalang, iya ni Jehova ang tanang butang. Busa, sa paghatag ug materyal nga mga butang sa pagpakaylap sa matuod nga pagsimba, giuli lamang sa naghatag ang usa ka bahin sa butang nga sa sinugdan iyang nadawat gikan sa Diyos.​—Sal 50:10; 1Cr 29:14.

Tambag Labot sa mga Gasa. Sanglit ang mga gasa ingong mga hiphip makadaot sa kasingkasing ug magtuis sa hustisya, ang Kasulatan nagtambag sa pagdumot sa maong mga gasa. Kadtong nag-apas ug mga gasa gikondenar. (Deu 16:​19, 20; Ecc 7:7; Pr 15:27; Isa 1:23; tan-awa ang HIPHIP.) Dugang pa, ang “tawo nga nagapanghambog sa iyang kaugalingon bahin sa usa ka gasa nga dili tinuod,” nga wala magabuhat sumala sa iyang gipanghambog, ikatandi sa nipis nga panganod ug sa hangin nga walay ulan. (Pr 25:14) Ang tighatag ug mga gasa tingali daghan ug mga higala, apan ang iyang paghatag dili makapaneguro ug dumalayong panaghigalaay.​—Pr 19:6.

Ang Kristohanon Gregong Kasulatan kusganong nagsaway sa pipila ka batasan labot sa paghatag ug mga gasa. Si Jesus nagkondenar sa mga eskriba ug mga Pariseo tungod sa ilang paglapas sa sugo sa pagpasidungog sa amahan ug inahan. Matod nila, kon ang usa ka tawo nagpahayag nga ang iyang materyal nga mga butang maoy gasa nga gipahinungod sa Diyos, wala siyay obligasyon nga gamiton kini sa pag-abag sa iyang mga ginikanan, apan siya makapadayon sa paggamit niini alang sa iyang kaugalingon. (Mat 15:1-6; tan-awa ang KORBAN.) Walay kapuslanan ang paghatag kon siya naglaom nga makadawat ug balos. (Luc 6:30-36; 14:12-14) Aron makapahimuot kang Jehova, ang paghatag kinahanglang himoon nga dili mahakogon ug dili mapagawalon.​—Mat 6:2-4; 1Co 13:3.

 Ang Kristohanong Paghatag. Ang unang mga Kristohanon mihatag ug mga gasa, o mga amot, alang sa ilang kabos nga mga igsoon. (Rom 15:26; 1Co 16:​1, 2) Apan, kining tanang mga gasa maoy kinabubut-on, sumala sa gipakita sa mga pulong ni Pablo: “Ipabuhat sa matag usa ang sumala sa iyang gihukom diha sa iyang kasingkasing, dili nga kontragusto o pinugos, kay gihigugma sa Diyos ang malipayong maghahatag.” (2Co 9:7) Dugang pa, ilang giabagan kadtong bug-os nga nagpahinungod sa ilang kaugalingon sa Kristohanong ministeryo, sama sa gihimo ni apostol Pablo. Hinunoa, bisan tuod nagpabili pag-ayo sa mga gasa nga gipadala sa iyang mga igsoon ngadto kaniya, si Pablo wala magtinguha ug gasa.​—Flp 4:15-17.

Ang mga Kristohanon makahatag ug mga butang nga mas bililhon kay sa materyal nga mga regalo. Ilang ikahatag ang ilang panahon ug katakos aron dasigon ug palig-onon ang uban sa mental ug espirituwal nga paagi, nga maghatag ug mas dakong kalipay. Ang kinadak-ang gasa nga ikahatag sa usa ka tawo ngadto sa uban mao ang pagsabot sa Pulong sa Diyos, kay kini motultol sa mga makadawat niini ngadto sa kinabuhing walay kataposan.​—Ju 6:​26, 27; 17:3; Buh 20:35; 2Co 12:15; Pin 22:17; tan-awa ang GASA SA KALUOY.