Usa ka dayandayang lukong nga isul-ob sa ulo. Ang Hebreohanong termino nga tsephi·rahʹ (girnalda) gigamit sa simbolikanhong paagi diha sa tagna ni Jehova labot sa paghukom sa Samaria, ang kaulohang siyudad sa Epraim, nga mao, ang napulo-ka-tribong gingharian sa Israel. Ang Samaria sa maong panahon napuno sa politikanhong “mga palahubog,” nga nahubog tungod sa kagawasan nga nabatonan sa amihanang gingharian gikan sa Juda ug tungod sa politikanhong mga pakig-alyansa niini uban sa Sirya ug sa ubang mga kaaway sa gingharian ni Jehova sa Juda. (Tan-awa ang Isa 7:3-9.) Maingon nga ang mga  palahubog nagsul-ob ug girnalda nga mga bulak diha sa ilang mga ulo sa panahon sa ilang pag-inom-inom ug bino, mao man usab ang Samaria nagsul-ob sa girnalda niining politikanhong gahom. Kini maoy usa ka matahom nga dayandayan apan nagakalawos nga bulak nga mahanaw ra. Dayon alang sa mga nahibilin sa iyang katawhan si Jehova mahimong sama sa usa ka dayandayan nga purongpurong ug sama sa usa ka matahom nga girnalda (o “diadema” sumala sa ubay-ubayng mga hubad).​—Isa 28:1-5.

Ang samang Hebreohanong pulong makita sa Ezequiel 7:​7, 10. Apan dili matino sa mga maghuhubad ang kahulogan o kapadapatan sa pulong niini nga mga teksto. Ang susamang Aramaikong pulong nagkahulogang “buntag,” ug ang hubad ni Lamsa sa Syriac nga Peshitta mabasa dinhi nga “kaadlawon,” inay nga girnalda, o diadema. Ang ubang mga maghuhubad (AS, AT, RS) naglangkit niining pulonga sa usa ka nombre nga samag gigikanan diha sa Arabiko ug naghubad niini ingong “kalaglagan.” Ang uban pa, sa pagtuo nga ang lintunganayng kahulogan sa Hebreohanong pulong maoy “pagtuyok,” naghubad niini ingong “pagliso,” nga nagtumong sa pagliso o kausaban sa mga panghitabo.​—JB; JP; “sirkulo,” Ro.

Diha sa Kristohanon Gregong Kasulatan, ang plural nga porma sa Gregong pulong nga stemʹma, “girnalda,” makita sa Buhat 14:13. Ingon sa giasoy sa maong teksto, ang saserdote ni Zeus sa Listra nagdalag mga torong baka ug mga girnalda ngadto sa mga ganghaan sa siyudad aron sa pagtanyag ug mga halad, tungod kay ang mga tawo nagtuo nga si Pablo ug Bernabe maoy mga diyos. Ang mga girnalda lagmit isul-ob unta sa mga ulo ni Pablo ug Bernabe, ingon sa buhaton usahay ngadto sa mga idolo, o diha sa mga partisipante ug sa ihalad nga mga hayop. Ang maong mga girnalda sagad ginama gikan sa mga dahon nga gituohang makapahimuot sa diyos nga ilang gisimba.​—Buh 14:8-18; tan-awa ang KORONA, PURONGPURONG.